Ntolantantɔn
ŋanaw ka Ligi tile 2nan na, Bamakɔ Sitadimaliyɛn ye sebaaya sɔrɔ kari jan
tɛmɛnnen in kuluntolantanw na. A ye Tanzani « Simba » gosi. Nka Joliba
AC binna Kɔnɔwari « FC San Petro » ɲɛkɔrɔ kɔnfederasɔn kupu la
Afiriki
ntolantantɔnw ka ɲɔgɔndanw tile 2nan balontanw kɛra dɔgɔkun jan tɛmɛnnen in na.
O siratigɛ la, Bamakɔ Sitadimaliyɛn ye Tanzani « Simba » bisimila
26Mars farikoloɲɛnajɛkɛnɛ na Bamakɔ. A ye sebaaya sɔrɔ o kan 2-1.
N’o sebaaya
in ye kuru 4 bɛ kɛ Mali ŋana bolo, o y’a sɔrɔ a ye kuru 1 sɔrɔ a ni « Espérance
Sportive de Tunis » ka balontan filaninbin na (0-0) tile fɔlɔ la. Kuru 4
fana bɛ Angola « Petro Luanda » bolo. Nka Sitadimaliyɛn bɛ jɔyɔrɔ
fɔlɔ la u ŋanaw ka Ligi kulu D kɔnɔ.
Fɛn min ye
kɔnfederasɔn kupu ye, Joliba AC selen tɛ ka wo ye o la fɔlɔ. Dɔgɔkun kelen a
gosilen kɔ Bamakɔ yan 1-0 Marɔku « Olympique club de Safi » fɛ, kari
jan tɛmɛnnen in fana n’o ye tile 2nan ye, a gosira tuguni Kɔnɔwari « FC San
Pedro » fɛ 2-0. Kuru 0 de bɛ Joliba bolo halibi u ka kulu kɔnɔ, kasɔrɔ min
bɛ jɔyɔrɔ fɔlɔ la o ka kuru ye 6 ye.
Nin tile 2
kɔfɛ, Afiriki ntolantantɔn ka ɲɔgɔndanw bɛna sɛgɛnnafiɲɛbɔ dɔɔnin kɛ (sanni ka
KANI 2025 kuncɛ Marɔku) ; o min bɛna daminɛ desanburukalo in tile 21 san
2025 k’a kuncɛ zanwuyekalo tile 18 san 2026. Ni san 2026 zanwuyekalo sara,
tɛmɛn bɛ kɛ ni Afiriki ntolantantɔnw ka ɲɔgɔndanw tɔ ye.
Dɔkala
Yusufu JARA
Alasani Sisuma
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
