Jamana ɲɛmɔgɔw ni « Cinsere-FNR » mɔgɔw jamanakuntigiso la Kuluba
Jɛkulu min
ɲɛsinnen bɛ sigikafɔba laɲininw waleyali kɔlɔsili ma (Cinsere-FNR), n’a welecogo
kɔrɔ tun ye (Cincere-ANR) ye, juma utikalo tile 29 san 2025, o y’a ka kɔlɔsili
kɛlenw seereyasɛbɛn don furancɛlafanga jamanakuntigi Zenerali darimɛ Asimi
Goyita bolo jamanakuntigiso lajɛkɛso kɔnɔ Kuluba. Minisiriɲɛmɔgɔ, mara ni
desantaralizasɔn minisiri Zenerali de diwisɔn Abudulayi Mayiga, furancɛlafanga
bulonba kuntigi Zenerali de kɔri darimɛ Maliki Jawu ka fara fangabulonw ɲɛmɔgɔw,
gɔfɛrɛnaman minisiriw, i n’a fɔ jamana jɔli kura minisiri ka ɲɛsin gɔfɛrɛnaman
ni fangabulonw cɛ koɲɛnabɔ ma Bakari Tarawele, olu tun b’a kɛnɛ kan.
« Cinsere-FRN »
ka baaraw mabɛnbaa Mɛtiri Amadu Cɛwulen Jara ye hakililajigin kɛ, ko masalakunw
ɲɛmɔgɔw, ko dɔnbaa ŋanaw ani kɔlɔsili-kiimɛni kɛbaaw, olu ye wulikajɔ kɛ mɛkalo
tile 23 san 2024 kɔfɛ, walasa ka se ka hakilijakabɔ kɛ dɔ faracogo la ko
waleyalenw fanga kan, min b’a to san 2024 seereyasɛbɛn bɛ se ka di marisikalo
tile 31 san 2025. A ka fɔ la, o sarati
in de mɔɔnɔbɔra ni furancɛlafanga jamanakuntigi ka yamaruya ye, walasa « Cinsere-FNR »
ka se ka lajɛba tɔw laɲininw fara a kan. O sera k’a to ni fɛɛrɛ poroze dɔ labɛnna
k’o walangata ni faso kɔnɔ lajɛba kɛlen tɔw kɔnɔkow ye ; kɛrɛnkɛrɛnnenya
la malidenw yɛrɛ dama cɛ sigikafɔba, kalanko, kɛnɛyako, denmisɛnya,
tungarankew, seko ni dɔnko ani bololabaara ni ɲɛ daamuda sigikafɔbaw.
Mɛtiri Amadu
Cɛwulen Jara y’a jira, ko nin seereyasɛbɛn in y’u ka laadalataacogo tɔnɔ ye ka
sinsin lajɛw kɔnɔkow kan minisirisow ni minisiriɲɛmɔgɔso mɔgɔw fɛ. A ye
hakililajigin kɛ ko fɛɛrɛ in jamana jɔli kura la laɲinin 517 b’a kɔnɔ, 55 y’o
la karankobaw ye, 153 bɛ da olu kan dafaw ye, 309 fana bɛ tugu olu la minnu tɛ
karankobaw ye ani kɔlɔsili ni kiimɛni seereden 1.340. San 204 desanburukalo
tile 31 y’a sɔrɔ karankoba laɲinin kɛlenw na, 28 waleyara ka ban ; n’o y’u
50,91% ye, 26 bɛ waleyali sira kan ; n’o ye 47,27% ye, kelen de na se ka waleya
fɔlɔ (kɔlɔsili ni kiimɛni cakɛda dɔ sigili senkan walasa ka gɔfɛrɛnaman fanga
jate minɛ a ka baara kɛtaw la). O b’a jira ko laɲinin 55 la, 44 de waleyara ka
ban walima ka ye waleyali sira kan, n’o y’u 98,18% ye.
Karankoba
laɲinin dafa 153 la, Mɛtiri Amadu Cɛwulen Jara ko 16 waleyara ka ban, n’o y’u 10,46%
ye, ani ko 14 ma se ka waleya fɔlɔ ; n’o y’u 9,15% ye. A ka fɔ la, furancɛ
ye 139 ye a 153 la, n’o ye 90,85% ye laɲinin waleyalenw na walima minnu bɛ
waleyali sira kan. Laɲinin 309 minnu tɛ karankobaw ye, a jirala ko 194 waleyara
o 309 na ; n’o y’u 62,78% ye. O siratigɛ la, Mɛtiri Amadu Cɛwulen Jara ye
ɲɛfɔli kɛ, ko baara 28 waleyara, 166 bɛ waleyali sira kan. Bakurubafɔ la,
furancɛ ye 387 ye laɲinin 517 la, n’o ye 74,85% waleyali ye.
Nka, a ka fɔ
la, ko dɔw sennasumanyanen don. Olu la, izininko, jirituru ani baraziko porozew
b’o la. A ko baarabolodalen fana ɲɛ ka misɛn. A ko jamana labɔli siraw la, o ka
nɔgɔn ; nka a ɲɛ ka misɛn ka da marayɔrɔw ani sigidaw cogoyaw kan.
Jamana jɔli
foroba poroze in, Mɛtiri y’a jira san 2024 seereyasɛbɛn in kɔnɔ, ko baara dɔw
kɛra k’a sababu kɛ jamanakuntigi ka hakilila talenw ye. O dɔ ye joli falenni
kɛnɛyasow ye, pano solɛriw sigili kɛnɛyaso dɔw la san 2024 kɔnɔ. Jibondon 400
ni kɔ jɔra ka fara a tɔw kan. « Cinsère-FNR » ka baaraw mabɛnbaa in
ka fɔ la, jamanakuntigi ka nin waleyaw sera k’a to yɔrɔ dɔw ani sigidalamɔgɔ
dɔw ka se ka nisɔndiya sɔrɔ, ka ɲinɛ jiko gɛlɛya kɔ.
Furancɛlafanga
jamanakuntigi y’a jira, ko ale ka baaraw bɛ bila hukumu min kɔnɔ, o ye bɛrɛmakɛɲɛ
ye hadamadenya la, ka se ka dɔ bɔ hadamadenya sabatili baju fɛnw lasɔrɔli
gɛlɛya la. O siratigɛ la, a bɛ dɛmɛn don kosɛbɛ laɲinin dɔw waleyali la an ka
foroba poroze in kɔnɔ kajamana jɔli siratigɛ la, n’u waleyali tɛ taa ɲɛbilako
dɔw sabatili kɔ. A ka fɔ la, jaabi minnu b’a la ka sɔrɔ laɲininw waleyali la,
olu ka kan ka fɛsɛfɛsɛ koɲuman, walasa k’a dɔn n’a y’a sɔrɔ kun ani laban bɛ
laɲinin kelenna na.
Jamanakuntigi
ko laɲininw tɛ fɛɛrɛko dama ye, ko sɔrɔko ni hadamadenya fana b’a la. A labanna
k’a faranfasiya, ko a b’a kun bɔ ka dɔ fɔ baarakɛminɛn kura kan min ye yecogo
san 2063 ye, ko an ka jamana sɔrɔ ɲɛtaa an’a bayɛlɛmani minɛn fana don.
Sɛnɛ ni izininko kɔfɛ, jamanakuntigi Goyita jigiba bɛ an ka dugujukɔrɔfɛnw kan, minnu bɔli bɛ se k’an ka jamana sɛnɛ sɔrɔ jiidi. O siratigɛ la, a ye hakililajigin kɛ ko a tun b’a kun bɔ ka kɔmasegin kɛ nin seereyasɛbɛn in kan malidenw ye jamana kɔnɔ an’a kɔkan, kɛrɛnkɛrɛnnenya la ɲɛtaa sɔrɔlenw fasojama haminankow waleyali la, u ye minnu dantigɛ sigikafɔba senfɛ jamana jɔli kura kama, min kɛra san 2021 desanburukalo la.
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
