San 2023-2025 kalandenkulu ye jalatigi 343 ye, Maliden 311 ani dunan 32 don. Kalanden min ye bɛɛ dan kiimɛni na o kɛra Maliden Su-liyetenan Idirisa Tiyama ye ni kuru16/20 kan.
Lakananbaaw
ka sɔrɔdasiya kalanni kalansoba (EMIA) Bubakari Sada Si Kulukɔrɔ, o
kalandenkulu 47 bɔli kɛnɛ ɲɛmɔgɔya tun bɛ furancɛlafanga jamanakuntigi Zenerali
darimɛ Asimi Goyita bolo. A tɔgɔ dara Zenerali de birigadi Pangasi Sangare la. Minisiriɲɛmɔgɔ
Zenerali de diwisɔn Abudulayi Mayiga, furancɛlafanga bulonba kuntigi Zenerali
de kɔri darimɛ Maliki Jawu, lafasa ni sɔrɔdasi kɔrɔw ka minisiri Zenerali de
kɔri darimɛ Sajo Kamara ka fara gɔfɛrɛnaman minisiri wɛrɛw kan, olu tun b’a
kɛnɛ kan. Denfa ka denbaya ka ciden tun ye a furumuso Asitan Tarawele ani
Zenerali de diwisɔn Keba Sangare ye.
San 2023-2025
kalandenkulu ye jalatigi 343 ye. U y’u kali darapo kɔrɔ, faso taamasiyɛn ani
lakananbaaw ɲɛmɔgɔba Zenerali darimɛ Asimi Goyita. U bɔra sikili nɔrɔmali ani
sikili sipesiyali la. Sikili nɔrɔmali mɔgɔ ye 325 ye, muso 34 b’u cɛla ka bɔ
jamana kɔnɔntɔn na, n’o ye Benɛn, Burukina-Faso, Gine-Konakiri, Mali, Moritani,
Nizɛri, Sɛnɛgali, Cadi ani Togo. Maliden 311 na, 159 ye ɲɔgɔndanw kɛ ka na, 88
tun ye baarakɛlaw ye, 83 ye fɔrɔsi sipesiyaliw ka kɔnkuru kɛ ka na, 69 ye sipesiyalisiw
ta kɛ ka na. Nin bɛna kɛ a siɲɛ fɔlɔ ye cakɛda ɲɛmɔgɔso bɛɛ ka ofisiye sipesiyalisiw
sɔrɔ ko kɛrɛnkɛrɛnnen suguya caman na. N’o ye zeni militɛri ɲɛmɔgɔso, lakananbaaw
ka latɛmɛnni, kunnafoniko ani ɛnfɔrɔmatiki ɲɛmɔgɔso, lakananbaaw ka kɛnɛyako
ɲɛmɔgɔso, lakananbaaw ka minɛnko, tajiko ani taamako ɲɛmɔgɔso, ka fara lakananbaaw
ka kunnafoniko ɲɛmɔgɔso (Dirpa) kan.
Maliden
Su-liyetenan Idirisa Tiyama de ye bɛɛ dan o ɲɔgɔndanw kiimɛni na ni kuru 16/20
ye. Sikili sipesiyali ye mɔgɔ 18 ye, o bɛɛ ye Malidenw ye, bana kurakɛla 3
ani bana kɛrɛnkɛrɛnnen furakɛla 15. Mɔgɔ min ye bɛɛ dan o ɲɔgɔndanw kiimɛni na
o kɛra Liyetenan Fuseyini Tarawele ye, bana furakɛla don ni kuru 15/20 ye. Kalandenkulu
47nan in ye kalanw sɔrɔ kalansenbolo kɛrɛnkɛrɛnnenw kan, i n’a fɔ komandoya,
farikolo ni hakili yiriwali kama, cɛncɛn kan kɛlɛ, duguba kɔnɔ kɛlɛ ani jiritu
la kɛlɛ. Muguci degeliw k’i tɛgɛ diya ka bila kɛlɛdagaw ɲɛ.
Lajɛ in
senfɛ, Mali lakananbaaw ɲɛmɔgɔba y’a jira ko lakananbaa ɲɛmɔgɔw ye nin ko in
labɛn waati la, waati min, ni gɛlɛya b’an ka jamana kɔnɔ. Zenerali de diwisɔn
Umaru Jara ko yɛlɛma bɛ don kɛlɛw kɛcogo la ka kɛɲɛ ni kojugubakɛ cogoya ye.
Kojugubakɛlaw bɛ k’u dogo sisan ka to ka bin sigidlamɔgɔw kan. Diinɛ mɔgɔw ka
kumaw bɛ ka boli politikiko kan sisan, ka kɛlɛ kɛ ni nafoloko gɛrɛntɛli ye,
kɛrɛnkɛrɛnnenya la sira dali minɛnw donni ɲɛ jamana woroduguyanfan fɛ, k’o
kɔkɔrɔmadon ni kunnafoni lankolonw ye. Ka kɛɲɛ n’o kow cogoya ye, jamana
lakananbaaw wulilen don k’u jɔ o bagabagaliw kama, k’u kɛlɛkɛcogo fana mabɛn
n’o ye, ka juguw bali ka u sago sɔrɔ.
Zenerali de
diwisɔn Umaru Jara ka fɔ la, jalatigi kuraw sɔrɔli bolo kɔrɔ o bɛ dɛmɛn don
kosɛbɛ dɔ farali la sekow kan. A y’a sinsin nin kɛnɛ in kan ka hakililajigin
kɛ, ko Maliko baara bolodalen kuncɛra ani ko sɔn kɛra Dugukoloko fɛɛrɛ tigɛlen
ma san 2025-2030 kuntaala kama. O fɛɛrɛ in laɲinin ye ka tɛmɛn ni lakananbaaw
sigili ye jamana fan bɛɛ fɛ ani ka lakananbaaw ka baara kɛtaw mabɛn ni ɲɔgɔn ye
jamana lafasali kama. A ye foli lase furancɛlafanga jamanakuntigi ma a ka
cɛsiri la lakananbaaw ka baara kɛcogo jiidili la ka taa a fɛ. Kɛlɛbolo
sennateliman (Bir) sigili senkan, lakananbaaw tɔpɔtɔcogo ani minɛn kuraw,
sɔrɔdasi karitiw waleyali, delili lakananbaaya taabolo la, olu b’o seereya, adw.
A ye laseli kɛ ka ɲɛsin jalatigi kura ninnu ma, k’a ɲinin u fɛ u k’u banban
jalatigiya danbew kan ; n’o ye timinandiya, tilennenya, kɛtakɛ ani fasoden
ɲumanya, k’an ka jamana ka yɛrɛya an’a kelenya lafasa.
Zenerali de
diwisɔn Umaru Jara da sera ɲɛmɔgɔ ɲuman taamasiyɛnw ma ; o dɔ ye kodɔn, jamaɲɛmɔgɔya,
kulubaara kanu, cɛdenw labɛnko ɲuman. A ko dan tɛ ɲɛmɔgɔ ka cɛsiri la ani ka to
k’a yɛrɛ mabɛn ni kow cogoyaw ye.
KƐLƐ CƐ FARINW- EMIA komandan Kolonɛli Daramani
Danbɛlɛ ko nin kɛnɛ in dabɔra lakananbaaw joli kama u ka kɛtaw kama, ka
tilennenya don u kun na ani u ka se ka basigi taabolo kuraw matarafa. A ye
hakililajigin fitinin kɛ Mali lakananbaaw tariku kan, i n’a fɔ Manden Sunjata
Keyita, Logo-Sabusiri Yamodi Sisɔkɔ, Kumi Jose Tarawele, Sikaso Babɛnba Tarawele
ani Bazannin Tera. Ka fara nin cɛ farin kɔrɔ ninnu kan, a da sera cɛ ŋana wɛrɛw
ma minnu y’u jeninyɔrɔ fin kosɛbɛ ka taa ka cɛn to an bolo. I n’a fɔ Seku
Tarawele, Fasali Agi Kiba, Karimu Niyangi, Abudulayi Jalo, Musa Siyaka Kɔnɛ, Ali
B. Kamara. A ka fɔ la, Mali kɛra sɔrɔdasi ŋana caman tigi ye. An bɛnbaw ye kɛlɛ
fɛɛrɛ caman latɛmɛn an kɔmɔgɔw ma ka sinsin bonya, danbe ani kɛtakɛ kan. A ko
an ka jamana bɛ cɛn in latɛmɛn ni jalatigiw labɛnni ye ka kɛɲɛ ni sisan kow
cogoyaw ye.
Furancɛlafanga
jamanakuntigi ye laseli kɛ kunnafonidilaw ye kɛnɛ in kuncɛtɔ, a y’a jira a ka
kɔrɔfɔ kɔnɔ, ko nin kɛnɛ in kɛlen bɛ laada ye an bolo min donnen bɛ lakananbaaw
ka ɲɛnamaya kɔnɔ. Jalaw dili mɔgɔ 343 ninnu ma, o kɛra ka kɛnɛ datugu, ani ka
sira di u ma u ka lakanan baaraw la. O waleya in bɛ furancɛlafanga ɲɛmɔgɔw ka yecogo
kɔnɔ, n’o ye ka lakananbaaw sɔrɔ bolo kɔrɔ, ka bɛn ni bagabagaliw cogoyaw ye.
Zenerali
darimɛ Asimi Goyita ye foli di Mali fasojama ma a ka muɲun ni sabali la, ani
furancɛlafanga ɲɛmɔgɔw faamuyali la joona. Jamana ɲɛmɔgɔw hami tɛ dɔwɛrɛ ye dɔ
farali kɔ lafasa minɛnw kan. O tɛ ɲɛ mɔgɔw tali kɔ ka fara lakananbaa hakɛ kan,
ka kalan ɲuman di u ma, k’a ɲinin ka lakananbaaw an’u ka denbayaw ka hɛrɛ
sabati ani ka yɛlɛma ɲuman don u ka ɲɛnamaya an’u ka baaraw kɛcogo la,
baarakɛminɛn nafamaw b’o la ka kɛɲɛ ni bagabagaliw cogoyaw ye. Jamanakuntigi ka
fɔ la, nin ko suguya ninnu jɔyɔrɔ ka bon kosɛbɛ lakananbaaw fanga bonyani na.
Zenerali
darimɛ Asimi Goyita ka fɔ la, zewopolitiki cogoya ka fara kojugubakɛlaw kɛwalew
kan, a ɲuman ye ka lakanan fɛɛrɛw mabɛn u kama, ka jugu kunbɛn yɔrɔ bɛɛ la ani
waati bɛɛ la ani cogoya bɛɛ la jamana dugukolo kan sigidalamɔgɔw an’u bolofɛnw
lakananni na. A ka fɔ la, lakananbaaw (FAMa) ka kan ka yɛrɛya ani sɔrɔ lafasa. Kojugubakɛlaw
bɛ ka yɛlɛma don u ka mɔgɔ kɛlɛtaw la ka kɛɲɛ n’u dɛmɛnbaaw kuntilennaw ye
jamana kɔkan, o la, an fana ka kan k’an labɛn k’an kɛlɛkɛcogo mabɛn n’o ye,
k’an faso lafasa. Jamanakuntigi ye foli ni tanuni lase jalatigi kuraw ma ani
k’a ɲinin u fɛ jogo ɲuman minnu kofɔra u ka kalandenkulu denfa Zenerali de
birigadi Pangasi Sangare kan, k’o sira taama. U ka kan k’a to u hakili la, ko
jamana lakanankulu fanga ye a kɛlɛden cɛman ni musoman ye. Don nataw la, a bɛ
ɲinin u fana fɛ u ka mɔgɔ tɔw kalan, k’u mako don u kɔmɔgɔw la ; n’o tɛ
kɛlɛ sebaaya sɔrɔ man di, Zenerali darimɛ Asimi Goyita ka fɔ la.
Nin y’a siɲɛ
fɔlɔ ye kalandenkulu ka san fila sɔrɔ u ka kalanw na, ka da a kan k’a daminɛ
kalandenkulu 48nan nata la, EMIA kalan kuntaala bɛna kɛ san saba ye. Kɛnɛ
kuncɛra ni sɔrɔdasiw ka yɛrɛmajira taama ye ani kaareba kelen dili EMIA ma
furancɛlafanga jamanakuntigi fɛ.
Dɔkala Yusufu JARA
Namori KOUYATE
Dɔkala Yusufu Jara
Page noire.
Sport.
Lutte contre les terroristes.
Réunion ministres AES.
Fin des fils devant les stations d'essence.
Réunion ministres affaires étrangères à Ouaga.
