Bamakɔ bɔlɔnw mana laɲaga cogo o cogo la, ko dɔ bɛ laban k’a nege bɔ i la foroba kɛnɛya ani lamini sanimanko nasira la : nɔgɔ. Ji nɔgɔw sigi-sigilen yɔrɔw la, ɲamanw ladoncogo jugu, nin bɛɛ ye jibolisirantanya ni ɲamanbɔnyɔrɔdɛsɛ ye. Bamakɔ dɛsɛlen don ka ɲɛnamaya kɛyɔrɔ ɲuman di sigidalamɔgɔw ma. Hakililajigin na, waatiw tɛmɛnna jamana ɲɛmɔgɔw tun y’u wakilu kɛ cakɛda dɔ ye min bɛ wele Ozoni Mali, ka fɛn bɛɛ bila o ka bolo kan ɲamancɛko la ; nka o dɛsɛra co, ka Bamakɔ saniya. Yala fura ɲuman kuntaala jan yɛrɛ bɛ se ka sɔrɔ nɔgɔko la bilen wa ? Mɔgɔ caman dalen b’a la k’o bɛ se ka sɔrɔ k’a sababu kɛ dabali tigɛlen minnu waleyali bɛ sen na. Jɛkulu kɛrɛnkɛrɛnnen min sigira Bamakɔ faaba Meriba tɔpɔtɔli kama, o ye ɲɛtaako caman sennaminɛ minnu b’a la ka nɔ bɔ. Bamakɔ b’a la ka bonya fo ka walangata, siraw ni kɛnɛw bɛ ka dɔgɔya jama ni bolifɛnw na, nɔgɔ fanga bɛ ka bonya. O la, a ɲuman ye ka saniya sabaticogo ɲuman kuntaala jan sigi senkan, walasa ka se ka sigidalamɔgɔw ni lamini lakanan. O de kosɔn, Bamakɔ Meriba bɛ ka dabali kura min tigɛ n’a bɛ wele tubabukan daɲɛ surun na (Dsuva), o bɛ ka saniyako ta a kɔnkɔn na. Nɔgɔ kɛlɛli o cogoya la, yɛlɛma ɲuman bɛ sɔn ka don saniyako la ka sigidalamɔgɔw tagan nɔgɔ banaw ma. Zeyiye (GIE) « Alliance » ɲɛmɔgɔba Alasani Tarawele hakilila y’o ye. A ko kabini o ye dabali kura in sennaminɛ, yɛlɛma ɲuman b’a la ka don saniyako cogoya la. A ko hali n’i y’a sɔrɔ jɛɲɔgɔnyaba t’a ni (Dsuva) cɛ, ko a ɲuman ye u k’u fanga kɛ kelen ye a ko la. « Alliance » bɛ san 10 bɔ ɲamancɛ la. A y’a jira fana, ko a ni Kalaban-kɔrɔ Meri tɔpɔtɔjɛkulu kɛrɛnkɛrɛnnen cɛ ka ɲin kosɛbɛ. A ko n’u ye waleya fɛn o fɛn dajira o jɛkulu la saniyako la, o b’a jɔyɔrɔ fa o la min b’a to wasa ka se ka sɔrɔ. Nka walasa ka se ka jaabi ɲuman sɔrɔ ka tɛmɛn nin kan, a k’a ɲuman ye u ka meri ka fura ɲuman ɲinin Kabala sirako la, ka da a kan cɛncɛntabɛniw bɛ cɛncɛn suuruli min k’u nɔfɛ, o bɛ boli gɛlɛya mototigiw bolo. Yitinan-Kolonɛli Sekuba Tarawele ye Bamakɔ Meriba saniyako ɲɛmɔgɔba ye. O y’a jira ko ale ka cakɛda in jɔyɔrɔ ka bon kosɛbɛ Bamakɔ dugu jɛyaliko la. A ko k’a ta ɲaman tayɔrɔ la fo a bilayɔrɔ, ko caman b’o kɔnɔ. Ɲaman tali bɛ daminɛ kabini duw kɔnɔ da ni da. Ɲamanw tali u bɔnyɔrɔ fɔlɔw la kin dɔw kɔnɔ, o fana bɛ sen na. O ɲamanbɔnyɔrɔ fɔlɔw tɔpɔtɔli bɛ (Dsuva) bolo. Sekuba Tarawele ka fɔ la, ɲamanw tali du ni du ka se a bɔnyɔrɔ fɔlɔ ma, gɛlɛya b’o la. Sabula a bɛ to ka suuru bɔlɔnw ni siraw kan u nɔfɛ. Hakililajigin na, cɛncɛn furanni ka bɔ sirabaw kan, o baaraw daminɛna o bɛ san kelen bɔ sa. Alasani Jigiba ye telefɔni feerela ye, min ka bitikinin bɛ Kalaban-kura Tarantimɛtɛrɛ da la Bamakɔ faaba komini 5nan na. O ka fɔ la, waatiw tɛmɛnna o sira in tun falen don cɛncɛn na. Nka sisan a furanni baaraw bɛ ka kɛ. Su caman na a k’i bɛ furannikɛlaw ye baara la. O la, a b’a ɲinin (Dsuva) fɛ, halibi a ka dɔ fara cɛsiri kan wasa ka se ka sɔrɔ kosɛbɛ ka taa a fɛ Bamakɔ saniyako la. Ɲamanbɔnyɔrɔ mugan ni kɔ bɛ Sebeninkɔrɔ kɔnɔ Bamakɔ faaba komini 4nan na. Wa kow b’o cogoya kelen na yen. I bɛ (Dsuva) furannikɛlaw ye baara la yen sanga ni waati bɛɛ la. Jibirili Jara ye kafe feerela ye o siraba in da la. O y’a jira ko furannikɛla ninnu ka cɛsiri kosɔn lafiya bɛ ka don sigidalamɔgɔw ma gɔngɔnko la. A ko «Dsuva » bɛ baara ɲuman na ni nɔgɔ kɛlɛli ye. Wa k’u ka kan k’a dɛmɛn baara in ka se ka ɲɛ a bolo. O la, ko mɔgɔ si man kan tuguni, ka ɲaman bɔn siraw kan. Yitinan-Kolonɛli Tarawele ko ɲamanbɔnyɔrɔ fɔlɔw hakɛ man ca kominiw kɔnɔ. Nka ko dɔɔnin min b’an bolo kɔrɔ an ka kan k’olu don ba la. O de kama kosa in na, a k’u bɔra ka kogo jɔ Darasalamu ɲamanbɔyɔrɔ la, Bamakɔ faaba komini 3nan kɔnɔ. Bamakɔ jɛyali hukumu kɔnɔ, a y’a jira ko ɲamanbɔnyɔrɔba mugan ni kɔ bɛna labɛn k’a sababu kɛ poroze dɔ ye, min tɔgɔ tubabukan daɲɛ surun ye (Pruba) ye. Sekuba Tarawele ka fɔ la, jɛkulu kɛrɛnkɛrɛnnen sigilen Bamakɔ Meriba tɔpɔtɔli la (Dsuva) bɛna sɔn ka se k’a jɔyɔrɔ fa saniyako la kosɛbɛ. A k’u ye u kandi o baara in kama k’u jigi to dugumɔgɔw ka dɛmɛn kan. Don nataw la Bamakɔ bɛna se ka kɛ dugu sanimanba ye ; sabula dabali caman tigɛlen don o baara in sabatili kama. Yitinan-kolonɛli Tarawele ko olu ka baara in musaka fanba b’u yɛrɛ kan, Meriba b’o min bila u ka bolo kan. A ko tuma dɔw fana na jɛɲɔgɔnw b’u dɛmɛn ; i n’a fɔ Pemi Mali. A ma mɛɛn fɔlɔ, o ye kamiyonbɛni saba di u ma k’u bolomagɛn n’o ye. « Dsuva » ɲɛmɔgɔba in b’a ɲinin sigidalamɔgɔw fɛ, u ka fara u kan k’u dɛmɛn Bamakɔ saniyali la, ka saniya hakilila talenw senkɔrɔmadon Bamakɔ jɛyaliko la, u kana ɲamanw fana bɔn yɔrɔ wɛrɛw la min t’u bɔnyɔrɔ dantigɛlenw ye. A b’a ɲinin u fɛ fana, u k’u jilaja ɲamanw ka se bɔnyɔrɔ fɔlɔ la cogoya ɲuman na. « Dsuva » min ka baara bɛ daminɛ o yɔrɔw la ka taa laban ɲamanbɔnyɔrɔba la Bamakɔ kɔfɛ, a b’a to baara bɛ se ka nɔgɔya o fana bolo. Fɛn min ye ɲamanbɔnyɔrɔ fɔlɔ ye Badalabugu kulu sanfɛ, (Dsuva) ɲɛmɔgɔ ka fɔ la, o tɛ ka ladon cogoya ɲuman na. O ye degunba ye kalanden kɔrɔbaw kan. A k’olu ye ɲaman in cɛ waati dɔ la ; sabula ko ɲaman tun woyora ka na fo sira kan, ka tɛmɛnni gɛlɛya mɔgɔw bolo. A k’olu y’u jilaja ka ɲaman in cɛ ka bɔ yen lɛrɛ 48 kuntaala kɔnɔ. Walasa yɔrɔ in bɛ se ka minɛ ka ɲɛ sigidalamɔgɔw bolo, a k’u ni komini 5nan Meri bɛ lafaamuyaliw la, min b’a to mɔgɔw bɛ se ka hakili ɲuman sɔrɔ ka na u ka ɲamanw ton ka ɲɛ. A kɔlɔsira ko mɔgɔ caman de bɛna a ka ɲaman yeri sufɛ ka tɛmɛn n’a yɛrɛ ye. Ni lafaamuyali sarati dafara k’a sɔrɔ o waleya jugu in ma dabila, min mana minɛ a la o bɛ ɲangi. Tarawele ko bɛɛ ka kan k’a seko kɛ min b’a to Bamakɔ b’a waati kɔrɔ ɲɔgɔnna bɔ saniyako la. « Dsuva » ka wulikajɔ kunba y’o ye. Misali la yɔrɔ kɛrɛnkɛrɛnnen dɔw la i n’a fɔ Dibidanin, Dabanaani, nfuwari kɔrɔ walima Jikɔrɔnin-Para mɔbilitayɔrɔ, ɲamankɛsubaw sigira yen ; ɲaman m320, 10 fo 7 bɛ se ka k’o dɔw kɔnɔ. Poroze wɛrɛ sigira senkan min waleyali bɛna daminɛ. O b’a to ɲamankɛsu ka se ka sigi Bamakɔ fan caman fɛ, mɔgɔw kana ɲamanw ni manaw fili duguma walima siraw kan tuguni. Dɔkala Yusufu JARA Abudulu Karimu KULUBALI
Dɔkala Yusufu Jara
Coupe du monde.
Perturbation des transports des hydrocarbures au Mali.
Le contrôle de services publics.
Journée internationale de la Jeune fille édition 2025.
Journée internationale de la Jeune fille édition 2025.
Mali - Etats-Unis.
