Seko ni dɔnko, bololabaara, lotoliko ni ɲɛ daamuda minisiri Mamu Dafe, ka fara kɛnɛyakow ni hadamadenya yiriwali minisiri Kolonɛli-mazɔri Asa Bajalo Ture ni Amap ɲɛmɔgɔba Alasani Suleyimani kan, olu tun b’a kɛnɛ kan. Sɛnɛgali ni Lajinɛ kunnafoni cakɛdaw fana ɲɛmɔgɔbaw ni ciden wɛrɛw ka bɔ Siniwajamana na olu yɛrɛ tun bɛ yen.
Ni baara kɛtaw wulili kura lajɛ ye, Amap b’a fɛ ka yɛlɛma kura don baara kɛcogo la, ka cakɛda in ye yecogo ɲuman na ani ka foroba hakilijakabɔ kɛ Mali kunnafoni yɛrɛya kan. Lajɛ in daminɛna kunun ntɛnɛn ɔkutɔburukalo tile 27, a bɛ kuncɛ a tile 29 (CICB) la, Barosigiw, lajɛbaw ani baaraw bɛ kɛ a tile 3 kɔnɔ. Amap ɲɛmɔgɔba ka fɔ la, cakɛda in ka baara kɛtaw wulili kura ye, o b’a ɲinin ka jɔyɔrɔ kɛrɛnkɛrɛnnen di Amap ma, k’a kɛ sira jɛlen ye jamana yiriwali kunnafoniko la.
Amapuko nana cogo min na Alasani Suleyimani ye ɲɛfɔli k’o kan, ka hakililajigin kɛ, ko Amap sigira senkan san 1961 k’a wele ko Mali ka kunnafoniko cakɛda n’o tubabukan daɲɛ surun ye (Anim). A yɛlɛmana ka kɛ Faso ka kunnafoni cakɛ ye o kɔfɛ, fo bi n’a bɛ wele Amap. A jɔyɔrɔ ka bon kosɛbɛ kunnafoni kafoli, a fɛsɛfɛsɛli an’a gansili la jamana kɔnɔ ani diɲɛ kɔnɔ.
Nka o n’a ta bɛɛ, Amap ɲɛmɔgɔba Alasani Suleyimani ka fɔ la dɔ tora ka bɔ a ka fangadigi hakɛ la k’a sababu kɛ mara kɛcogow ye fo k’a kɛ i n’a fɔ a bɛna kɛ yɔrɔ silasalen ye, hali n’i y’a sɔrɔ a ka baarakɛla hakɛ ka ca jamana marayɔrɔw la, an’a ka kɛta forobakow kunnafoniw ɲininni na jamana kɔnɔ. Kɛlɛ kunnafoniko, politiki yɛlɛma ani basigi disidakow nasira la, ni kura fiyɛli Amap la o kɛlen bɛ jamana karankoba ye ; o de ye nin lajɛba in sigikun ye.
Kunnafoni, numeriki sɔrɔ ni fanga ka baara yɛlɛma kura minisiri Alihamudu Agi Iliyɛni y’a jira a ka kɔrɔfɔ kɔnɔ, ko Amap ye baarakɛminɛn jɔnjɔn ye jamana bolo. O siratigɛ la, dɔ ka kan ka fara a fanga kan, ka yɛlɛma kura don a ka baaraw kɛcogo la ani k’a don ba la, min b’a to a bɛ se ka jaabi ɲumanw sɔrɔ fasojama ka laɲininw na, ka foroba politikiw dɛmɛn ani ka jigisigi kɛ kunnafoni jɛlen lasɔrɔli la bɛrɛmakɛɲɛ kɔnɔ ani yɛrɛya.
Minisiri ka fɔ la, nin lajɛ in ye dakunba ye baaraw wulili kura la. A masalakun ye : " kunnafoni ɲuman lasɔrɔta ani yɛrɛya kama " Amap ka baara kɛtaw wulili kura ye, o lajɛ ye hakilila falen kɛnɛ ye barosigiw, kumaɲɔgɔnyaw cakɛda in ka kunnafoniko cogoya kan, lajɛbaw dɔnniya laɲinin kɛrɛnkɛrɛnnenw kan walasa cakɛda in ka se ka sira kura ɲuman ta ni faso ani diɲɛ ko dɔnbaa ŋanaw ka dɛmɛn ye.
Ka da baarabolodalen bonya kan, Amap ɲɛmɔgɔso ye min ŋaniya siri, minisiri ye dugawu kɛ lajɛ in ka kɛ sababu ɲuman ye laɲinin jɔnjɔnw ka bɔ a kɔnɔ ani kandiliw kuntilennasɛbɛn nafama sɔrɔli la Amap siniɲɛsigi kama, ani kunnafoni cakɛda tɔ bɛɛ, foroba taw ani kɛnyɛrɛyew taw. Kuma kuncɛ la, minisiri ye jigisigi kɛ, ko gɔfɛrɛnaman ka kandili a ɲɛma yɛlɛma ɲuman donni na baara kɛcogo la baara kɛbaaw bolo, ka dɔ fara u ka dɔnniyaw kan ani ka jigisigi kɛ u ka basigiko la u ka baara kɔnɔ.
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
