Nin cakɛda in sigili
senkan, halibi a b’a la ka yanga sɔrɔ ni jamana ɲɛmɔgɔw ka cɛsiri ye, ka Mali
kan tan ni kɔ forobaya. Ka fara yɛlɛma donni kan sinsingafew kanko la, olu
kɔnɔko la, kɛrɛnkɛrɛnnenya la sariyasun ani daɲɛgafe kɛrɛnkɛrɛnnenw kan
forobayalen tan ni fila la, o bɛ Amalan ka jaabi ɲuman sɔrɔlenw seereya.
An ka kanw ɲɛtaa cakɛda
in kolatigɛjɛkulu y’a ka laadalatɔnsigiba 13nan kɛ tarata zuwɛnkalo tile 17 san
2025. A ɲɛmɔgɔya tun bɛ kalanko minisiriso sekeretɛri zenerali Bubakari Danbɛlɛ
bolo. Amalan ɲɛmɔgɔba Adama Jɔkolo Kulubali ka fara kolatigɛjɛkulu mɔgɔ tɔw
kan, nin bɛɛ tun b’a kɛnɛ kan.
Lajɛ in senfɛ, u ye lajɛ
tɛmɛnnen seereyasɛbɛn fɛsɛfɛsɛ, sanni u ka laininw kɛ. Baara kɛlenw
seereyasɛbɛn ka fara san 2024 laselisɛbɛn kan an’a wariko seereyasɛbɛn, ka fara
san 2025 baaraw n’u musakasɛbɛn fana kan, o bɛɛ fɛsɛfɛsɛra ka bɛn u kan. A da
sera san 2025 baara kɛta bolodalenw fana ma.
A ɲuman ye k’a faranfasiya, ko Amalan ka san 2025 baarakɛnafolo kiimɛna k’a bila sefawari miliyɔn 635 la ; kasɔrɔ san 2024 ta tun ye miliyɔn 657 ye. Kabini Adama Jɔkolo ka kɔrɔfɔ daminɛ na, a ye foli ni tanuni lase cakɛda in ma, k’a ɲinin a fɛ halibi a ka tɛmɛn ni baara ye. Adama ka fɔ la, u ka cakɛda in tɛmɛnna ni baara ye nɔrɔnkola ani tilennenya kɔnɔ ; ka da a kan u ŋaniya tɛ dɔwɛrɛ ye fasokan forobayalenw ɲɛtaa kɔ, k’u kɛ yiriwali ani bugunnatigɛli sinsinnan ye.
Adama Jɔkolo Kulubali da
sera Amalan ka baara kɛrɛnkɛrɛnnen waleyalenw ma. I n’a fɔ yɛlɛma donni kanko
sinsinnan sariyasɛbɛn kɔnɔko la (sariyasun ani daɲɛgafe kɛrɛnkɛrɛnnenw tariku, dugukolokalan,
nafoloko) fasokan forobayalen tan ni fila la, danbew kalanni baarabolodalen
(PNEV) bayɛlɛmani : o ye gafe ye, min bɛ jamana taabolow dantigɛ k’u gansi.
Ani fana, kalansenbolow labɛnni ka bɛn u kan fasokanw kalanni hukumu kɔnɔ, k’u
kɛ kan filanan suganditaw ye lakɔliw la, ni kalanko baara kɛbaaw ka
bolodiɲɔgɔnma ye.
Amalan ye fasokanw
tɔgɔladon fana laɲɛnamaya ; o kɛra damakasili waati ye ka ɲɛsin kan
camanko ni seko ni dɔnko ma. Nka o ɲɛtaakow n’u ta bɛɛ, Amalan ye gɛlɛya caman
sɔrɔ, kɛrɛnkɛrɛnnenya la a ka wari sɔrɔta hakɛ dɔgɔya, baarakɛminɛnko gɛlɛya
marayɔrɔw la, ani dɔ farali dɔnniyaw kan baarakɛlaw mako bɛ minnu na. Adama
Jɔkolo Kulubali sinsinna a kan, k’o disidako ninnu ye ko kuraw bolodali dusu
don u kɔnɔ ani ka dɔ fara cakɛda in ka muɲun hakɛ kan.
O kɔfɛ, a y’a jira ko
san 2025 kama, Amalan b’a fɛ k’a sinsin a ka dɔnniyakulu ni fɛɛrɛkulu labaarali
kan ani tɔndenw ka lajɛba, ka fara fasokanw walangatali ka don foroba kɛnɛ
caman kan, ladamuni na, tilennenya ani kunnafoniko cakɛdaw la.
Kalanko minisiriso
sekeretɛri zenerali y’a jira ko nin lajɛ in bɛ ka kɛ waati gɛlɛn na cakɛda in
bolo. O n’a ta bɛɛ, awirilikalo tile 24 san 2025, bulonba jɛnna ni fasokan
forobayalenw labɛnncogo, an’u labaaracogo sariya ye Mali kɔnɔ.
A ka fɔ la, nin ɲɛtaa in
tariku kɔnɔ, o bɛ jamana ɲɛmɔgɔw ŋaniya jira, ka fasokanw kɛ baarakɛminɛn
ɲumanw ye mara, kalan, tilennenya, foroba kumaɲɔgɔnya ani donɲɔgɔnna kama. A labanna k’a jira ko
nin sariya in bɛ dɔ fara Amalan ka ciw fanga kan, ka Amalan kɛ fasokanw
waleyali sinsinyɔrɔ ye, ka kɛɲɛ ni san 2023 zuluyekalo tile 22 sariyasunba
sariyasen 31nan kɔnɔko ye, o min bɛ fasokanw forobayali kofɔ.
Nin sariya in ye ɲɛtaaba ye tariku kɔnɔ, dakun jɔnjɔn don fasokan forobayalenw donni na ba la, o tɛmɛnsira la, k’u kɛ kalan kanw, kumaɲɔgɔnya kɛlanw, mara kɛlanw, kiiri kanw ani dilanni kanw ye. A bɛ Amalan ka baara kɛtaw don sariya kɔnɔ, k’a kolo gɛlɛya, ka kan camanko baju sigi labaarali ni yɛrɛya kɔnɔ, ka sinsin an seko ni dɔnko bugunnatigɛ kan, Bubakari Danbɛlɛ ka fɔ la. A ye faranfasiya di, ko san 2025 baarabolodalen ye ŋaniyaba labɛnko ɲuman ye, ka boli karankoba duuru kan : kanko ɲɛɲininni, mara, damakasili, bayɛlɛmani ani kumaɲɔgɔnya.
Dɔkala Yusufu JARA
Tamba CAMARA
Cɛ saba minnu si b’a ta san 30 la ka se 40 ma, olu minɛna kɔsa in na Senu, Bamakɔ lamini na yen polisiso fɛ. Mɔgɔ fɔlɔ tɔgɔ ni jamu daminɛ tubabukan na, o siginindenw ye M.T ye san 33, filanan ta ye B.S ye san 40, sabanan ta ye A.S ye san 30. Siga kɛlen don nin cɛ saba la namaratɔ j.
Madamu Buwarɛ Fili Sisɔkɔ ye ɲɛfɔli kɛ, k’a jira k’ale ye wariko baara bɛɛ kɛ jɛlenya kɔnɔ ni ŋaniya ɲuman ye. A ko fana, ko jamanakuntigi ka pankurun sanna sefawari miliyari 18,5 ; nka ko miliyari 21 tɛ, i n’a fɔ kiiriso bɛ k’a sinsin jate min kan ka kɛɲɛ ni faso wagand.
Kiiri in daminɛna kunun dɔrɔn, jamanakuntigi ka pankurun ani lakananbaaw ka minɛnw sanniko kan, Bamakɔ kiiritigɛsoba (kuru dasizi) la, a cɛra k’a bila tarata wɛrɛ la sɛtanburukalo in tile 24..
