Jamana fila
ninnu bɛ ɲɔgɔn sɔrɔ wula in na nɛgɛ kanɲɛ 19 waati la Mamadu Konate tɔgɔla
farikoloɲɛnajɛkɛnɛ na jɔyɔrɔ kelen ɲininni na finali kama, o bɛ sebaaya sɔrɔli
kofɔ ka ye u ka kulu KANI nata kɛnɛ kan. Nin demifinali in na, nɛgɛ kanɲɛ 16
waati la Sɛnɛgali ni Gine-Bisawo bɛ ɲɔgɔn sɔrɔ
U17 (UFOA-A) janjo sera a sɛkilisabasiri ma. A demifinali fila bɛ tan bi
Mamadu Konate tɔgɔla farikoloɲɛnajɛkɛnɛ na. Sɛnɛgali ni Gine-Bisawo bɛ fɔlɔ ka
ɲɔgɔn sɔrɔ. Kupu tɛmɛnnen in bɛ Sɛnɛgali de bolo. O kɔfɛ Mali ni Lajinɛ bɛ
ɲɔgɔn sɔrɔ. Balontan fila in n’a nafaw an’a gɛlɛyaw don, KANI U17 nata tike
ɲininni don jamanaw fɛ, minnu mana se ka sebaaya sɔrɔ ka se finali ma.
Sɛnɛgali ni Gine-Bisawo balontan bɛna kɛ balontan gɛlɛnba ye, Gine-Bisawo
jigi bɛ sebaaya kan a la kosɛbɛ, wa Sɛnɛgali fana t’a fɛ ka dugumasara cɛ a ko
la fiyewu. Mali ni Lajinɛ cɛ fana b’o cogo la ; ni Ala sɔnna Ntɔmikɔrɔbugukaw
bɛna balontan dumanw ye bi. Wula in na, degelikaramɔgɔ Dɛnba Tarawele n’a ka
cɛdenw tɛna fosi ɲinin sebaaya kɔ ; n’o tɛ n’an binna Lajinɛ ɲɛkɔrɔ, nimisa dan
don an ka jamana bolo. Ɲininkali : Balontannaw ɲɛmɔgɔ Isimayili Kamisɔkɔ n’a
tɔɲɔgɔnw dafalen bɛna ye kɛnɛ kan tike kɛrɛnkɛrɛnnen in ɲininni kama wa ? O
siga bɛ bɛɛ la ; wa hali mɔgɔ tɛ se fɔlɔ k’i bɛɛ fɔ jamana fila in si
kelen kan fɔlɔ, ka da a kan u bɛɛ jigi bɛ seli kan finali la.
Lajinɛ degelikaramɔgɔ Sekuba Kamara « Nesta » ye jigisigi kuma fɔ a ka
jamana ye, k’u labɛnnen don koɲuman ka Mali kunbɛn ; wa k’u ka laɲinin tɛ
dɔwɛrɛ ye seli kɔ finali la. A ko jamana min ye nin janjo in labɛn, u n’o de bɛ
ɲɔgɔn na ; o la, ko farikoloɲɛnajɛkɛnɛ bɛɛ b’u juguya la. Fo u k’u janto u
yɛrɛ la Mali ka cɛ duman ninnu ɲɛkɔrɔ. A k’u bɛna u fasa fili ka Mali godo kɛnɛ
fan bɛɛ fɛ sebaaya in nɔfɛ.
Dɔkala
Yusufu JARA
Jɛnɛba BAGAYƆGƆ
Dɔkala Yusufu Jara
Rencontre sur l'AES.
Rencontre Primature.
VBG.
Conseil des ministres.
Amélioration de la crise du carburant.
Arbitres.
