Tarata ɔkutɔburukalo tile 22, siraw fɛtaama tun ka gɛlɛn kosɛbɛ. K’a daminɛ Kalaban-kura fo Sabalibugu, ka tɛmɛn Dawudabugu fɛ ka se Pɔn Fadi ma, siraw tun gerennen bɛ jama fɛ.
Munna ? Tajiko gɛlɛy’a tun bɛ ka siradaw fa mototigiw ni mɔbilitigiw la k’u jɔ ka juruninton ɲɔgɔn kɔ taji nɔfɛ tajitayɔrɔw la.
Tajitayɔrɔ min bɛ Kalaban-kura o tun falen bɛ jama na. Umu Ja tun b’olu cɛla, ale ye kɔntabulu ye o bɛ san bi saba ni kɔ bɔ, a y’a jira o kabini nɛgɛ kanɲɛ 7 a jɔlen bɛ yen esansi nɔfɛ ka kɛ a ka moto la.
Nɛgɛ kanɲɛ 8 tɛmɛnnen ni sanga 50 ye, se kɛra a ma, nka a sɛbɛkɔrɔ muɲunna. Wajibi don ni se kɛra i ma, i ka sin k’i ka esansibara fa, hali n’a ma ɲɛ ko i bɛ taa kɔfɛ baarakɛyɔrɔ la.
A y’a jira ko ale kɔni timina ma goya a ko la, ka da a kan ko don bɛ na an ka jamana bɛna lafiya sɔrɔ nin bɛɛ kɔfɛ. Tajiko gɛlɛya tɛ diɲɛ wuliko ye, Ala de ye nin lase an ma, wa ale Ala kelen de y’a gɛlɛya wulibaa ye. Umu Ja ko ale dalen bɛ jamana ɲɛmɔgɔw la, a b’a ɲinin mɔgɔw k’u hakili kɛ kelen ye.
Bamakɔ-kura, Usumani Tarawele ye cakɛdatigi ye, tajiko gɛlɛya in b’a fana kan. Nka pano solɛri minnu sigilen b’a ka cakɛda la o bɛ lataama ni gurupu ye, a b’a la k’a ka baara kɛta bɛrɛ bɛn n’a seko ye kuranko la.
A ko fo n’a kɛra baarakɛlaw nabaliya ye joona, degunba t’u kan. Usumani ka fɔ la, nin gɛlɛya in bɛ tɛmɛn, waatilako don. Ko jamana si tɛ se ka hɛrɛ sɔrɔ n’i ma ɲani ku. O siratigɛ la, a b’a ɲinin mɔgɔw fɛ, u k’u fanga fara ɲɔgɔn kan, ka muɲun gɛlɛya in kɔrɔ.
Lopitali Gaburuyɛli Ture kɔnɔ, Saran Ture ye yɔrɔlasiniya ye, furannan ni palan tun b’a bolo, gɛlɛya min b’a kan baarakɛyɔrɔ in lasɔrɔli la a y’o lakali. A y’a jira ko kɔrɔlen, a bɛ bolifɛntigiw lajɔ sɔgɔma nɛgɛ kanɲɛ 4 waati la walima ka Sotarama ta ka na ; nka ko tajiko gɛlɛya in na a jɔlen bɛ se ka lɛrɛ caman kɛ makɔnɔni na k’a sɔrɔ bolifɛn kelen ma sɔrɔ.
A ko kɔsa in na ale bɛ na kɔfɛ kojugu baarakɛyɔrɔ la k’a sababu kɛ tajiko gɛlɛya ye. Nka ko tajiko gɛlɛya kɔni t’a to ko a tɛ na baara kɛ, hali ni a bɛ na a sen na. A ko ni bɛɛ tora so, o de bɛ gɛlɛya juguya, jugu sago bɛ sɔrɔ. Saran bɛ Ala deli jamana ɲɛmɔgɔw ka se ka fura sɔrɔ nin tajiko gɛlɛya in na, yanni o cɛ an ka muɲun.
Umaru Dunbiya tun sigilen b’a ka mototakisi kan sirakun na ka kiliyanw kɔmɔ. Ale y’a jira ko kabini sɔgɔma nɛgɛ kanɲɛ 6 ale bɛ taji ɲinin na, a y’o sɔrɔ fo nɛgɛ kanɲɛ 11 waati la, hali o la a ma a ka tajibara fa sɔrɔ.
A ko ni taa kɛra nin cogo la taamasaraw bɛ sɔn ka yɛlɛn, wa u tɛna se ka boli caman fana kɛ bilen tile kɔnɔ. A ko Ala de bɛ se k’an ka jamana dɛmɛn ka bɔ nin gɛɛya in kɔnɔ, a man ɲi an ka jamana ma, a man ɲi jamanadenw fana ma.
Karicedifulowu la nɛgɛ kanɲɛ 11 waati la tajifeereyɔrɔ wɛrɛ tun falen don jama na. Sidi Guwanle tun b’o mototigiw cɛla, jagokɛla don, a tun wɔɔsilenba b’a ka moto kan. A ko nin waati in ka gɛlɛn, nka ko lajarabikow don u bɛ tɛmɛn. A ko jamana ɲɛmɔgɔw b’u seko la fura sɔrɔli la tajiko gɛlɛya in na.
Ko sigidalamɔgɔw de ka kan k’u senkɔrɔmadon u ka cɛsiri la, ka da a kan u bɛ wuli ka bin na anw de ka hɛrɛ kama. A b’a ɲinin Malidenw fɛ an kana fara-fara, an ka fasokanu jirako dɔ de ye nin ye.
Tajitayɔrɔ wɛrɛ la, Musa Ture ni gɔfɛrɛnaman tɔgɔla baarakɛla don o n’a ka mɔbili bɛ lɛrɛ fila bɔ taji nɔfɛ. A fari tun bɛ ɲinin ka faga a ko la, ko ale y’a ka baara bila ka na taji ɲinin na o tɛ ka sɔrɔ fɔlɔ. A y’a jira ko degun kɔni bɛ yen, nka baara ye wajibi ye. Ni baara jɔra o tɛ hɛrɛ ye jamana sɔrɔ ma, o bɛ sɔn ka juguya n’a tɔ bɛɛ ye. A ka fɔ la, walasa ka se ka nɔgɔya don kow cogoya la, ko mɔgɔw bɛ se k’u ka mɔbiliw to so ka foroba mɔbiliw ta.
Musa ko ale bɛ hami ni sɔrɔdasiw ye, minnu bɛ da tajitamɔbiliw kan ka don jamana kɔnɔ, ka da a kan tuma caman na bin bɛ k’u kan o senfɛ. A ka fɔ la, jamana ɲɛmɔgɔw ka kan k’a to mɔbiliba bolila ninnu ka fɔ ka bɛn kɛ ni marifatigi jɛkuluw ye fura sɔrɔli la politiki kunda, ka sɔrɔ k’a ɲinin mɔgɔw fɛ u ka sabali ka muɲun ɲɔgɔn kɔrɔ tajitayɔrɔw la. Dɔw fana ko mɔgɔw bɛ se ka to u ka so ka baara kɛ ɛntɛrinɛti fɛ, ani mɔgɔ minnu ka baarakɛyɔrɔlataa tɛ koba ye, ka jɛn olu ma fɔlɔ baara la, k’o bɛɛ bɛ sɔn ka nɔgɔya don kow cogoya la.
A ko an ka jamana ye dɔ kɛ baara kɛli la ɛntɛrinɛti fɛ Koronawirisiko waati la. Dɔw yɔrɛ y’a jira ko taji dɔɔnin ka kɛ mɔgɔw kun tajitayɔrɔw la min b’a to tɔw bɛ se k’a sɔrɔ joona ka kɛɲɛ n’u taayɔrɔw cogoya ye. Bamakɔkaw ta ye muɲun ni sabali dan bɛɛ ye ɲɔgɔn kɔrɔ. K’a ɲinin jama ka jamana ɲɛmɔgɔw senkɔrɔmadon, an ka se ka nin kɔrɔbɔliko in latɛmɛn.
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
