Minisiri Sanu filɛ ka ɲɛfɔli kɛ lajɛ kuncɛlen
San caman cɛsiri kɔfɛ mɔgɔko ni minɛnko la lakananbaa kunda jamana basigili
kama, a b’i n’a fɔ jamana ɲɛmɔgɔw ŋaniya ye ka kow sennateliya jamana basigili
kama ni yiriwalikow ye. «Mali Kura Ɲɛtaasira ka bɛn san 2063 ma», o yecogo
sinsinnansɛbɛn waleyali bɛna daminɛ. A waleyali an’a kɔlɔsili cakɛda minnu bɛna
ɲɛsin o ma, sɔɔnin olu bɛna sigi senkan. O de kɔlɔsira kunun lajɛ senfɛ
jamanakuntigiso la Kuluba cidenkulu ka fɔ la, min bisimilala furancɛlafanga
jamanakuntigi Zenerali darimɛ Asimi Goyita fɛ, n’a ɲɛmɔgɔya tun bɛ nafoloko ni
wariko minisiri Aluseni Sanu bolo.
Aluseni Sanu bɔlen lajɛ la, a ka fɔ la, o siniɲɛsigiko in kama, an b’a fɛ
ka cakɛda fila in sigi senkan. A fɔlɔ ye jamanakuntigiso la yiriwalijɛkulu ye,
min bɛna yecogo waleyali kɔlɔsili kɛrɛnkɛrɛnnen kɛ. A filanan bɛna kɛ
fɛɛrɛjɛkulu ye, min bɛna daga nafoloko ni wariko minsiriso la ka porozew
waleyali kɔlɔsi. Ani fana, dakun minnu bɛna bɔ-bɔ ɲɔgɔn kɔrɔ fo ka se
sɛtanburukalo nata in ma, a ko a y’o bɛɛ dantigɛ jamanakuntigi ye. N’o ye
gɔfɛrɛnaman ani jamana fama fangama bɛɛ kɛli ye ka sɛbɛn in k’u ta ye jamana
kɔnɔ ani lasigidensow la.
Nafoloko ni wariko minisiri n’a nɔfɛjama y’a sinsin nin kɛnɛ in kan ka Mali
ka san 2063 yecogo dantigɛ jamanakuntigi ye kokura, ani k’a ka senkɔrɔmadonni
ɲinin sɛbɛn in waleyaliko la. Hakilila falenw kuncɛtɔ, minisiri Sanu ye
hakililajigin kɛ, ko furancɛlafanga jamanakuntigi tun y’o laɲinin kɛ ani ka
yamaruya di hakilijakabɔw la ; n’o bangera Mali ka san 2063 yecogo labɛnni
na.
Aluseni Sanu ka fɔ la, o yecogo in bɛ hakililaw ani siniɲɛsigikow dantigɛ
Mali ye san 40 kuntaala kama, min sigi-sigilen don dakun naani ye. O siratigɛ
la, a y’a jira ko sɛbɛn in bɛna se k’a to Mali ka bɔ a yɛrɛ la ani k’a ka sɔrɔ
jiidi ni 10% ye k’a daminɛ san 2033 la fo 2063. O yecogo in ɲɛsinnen bɛ baara
kɛta suguya bɛɛ ma poroze nafama 11 kɔnɔ. A ɲuman ye k’o waleya bi, ni jamana
ɲɛmɔgɔw ka senkɔrɔmadonni ani dɛmɛn kɔtigɛbali ye. Nafoloko ni wariko minisiri
ko a wasalen bɔra nin lajɛ in kɛnɛ kan, sabula ko jamanakuntigi y’a ka
senkɔrɔmadonni sɛmɛntiya u ye sɛbɛn in waleyaliko la ani ka dusu don u kɔnɔ ko
tɔ la.
A ko jamanakuntigi Asimi Goyita ye hakililajigin k’u ye, k’u kana ɲinɛ musow ni denmisɛnw kɔ a ko la. Ko jamanakuntigi ma ɲinɛ k’u hakili jigin fana, ko yecogo waleyali ko tɔ bɛ bɔ kɛrɛnkɛrɛnnenya la, Maliden bɛɛ ka kɛtaw, u ka faamuyali an’u ka dɛmɛn mabɛnni na. Ko furancɛlafanga jamanakuntigi ye foli di an fasoden ɲɔgɔnw ma u ka muɲun na. K’o muɲun de kosɔn, bi an sera ka nin hakilila in sɔrɔ, nafoloko ni wariko minisiri ka kɔrɔfɔkuncɛ la.
Dɔkala Yusufu Jara
Sports.
Retour de l'Administration à Kidal.
Sports.
Concours fonction publique.
Vente de carburant.
Vente des produits phytosanitaires.
