Lafasa ani basigi Afiriki kɔnɔ (BAMEX 2025), o tako fɔlɔ bɛ furancɛlafanga jamanakuntigi Zenerali Asimi Goyita ka ɲɛmɔgɔya kɔnɔ, a baaraw daminɛna tarata tɛmɛnnen in na Bamakɔ bolofɛnjira pariki (FEBAK) la minisiriɲɛmɔgɔ Zenerali de diwisɔn Abudulayi mayiga fɛ.
A kuntaala b’a ta nowanburukalo tile 11 na ka se a tile 14 ma Bamakɔ ani Kulukɔrɔ, bolofɛnjira in bɛ kɛ diɲɛ ko kuraw filɛyɔrɔ ye ani hakilila falen kɛnɛ walasa ka se ka Afiriki basigilen jɔ, kologɛlɛnba ani min ka yɛrɛya b’a bolo. Bonya dara Turukiye kan k’o wele a kɛnɛ kan.
Kɛnɛ in labɛnna ni basigi ni siwiliw lakananni minisiriso ani Turukiye cakɛda « The Peak Defense » ka jɛɲɔgɔnya ye, BAMEX 2025 ye dakunba ye jɛkabaara lafasa ani basigi hukumu kɔnɔ. Diɲɛ bilama kɔnɔ kojugubakɛ ani sibɛrikiriminate b’a la ka sannayɛlɛn, Mali b’a fɛ ka sɛmɛn yɔrɔ ɲuman na basigiko la Afiriki kɔnɔ.
Minisiriɲɛmɔgɔ ka kɔrɔfɔ kɔnɔ, a ye hakililajigin kɛ ko, diɲɛ kalalen ɲɔgɔn na in kɔnɔ, dancɛ tɛ kojugubakɛ la tuguni. kojugubakɛjɛkuluw bɛ ka minɛn kura nafamaw labaara, yɛrɛfaga doroninw ani hadamaden hakili donnen mansinw na k’olu labaara. Ka da nin bagabagaliw kan, a ye damakasili kɛ Afiriki ka lafasa ani basigi sabatili waleyaw la an yɛrɛ ma, ka sinsin jɛkabaara ani fangaw farali la ɲɔgɔn kan.
Minisiriɲɛmɔgɔ y’a jira ko saheli kungo jamanaw ka
jɛkulu (AES) sigili senkan sɛtanburukalo la san 2023, n’o bayɛlɛmana ka kɛ
kɔnfedersɔn (CES) ye zuluyekalo la san 2024, Burukina Faso, Mali ani Nizɛri cɛ.
O jɛkulu in b’a ɲinin ka kojugubakɛ kɛlɛ ka ban ni faraɲɔgɔnkan kɛlɛboloba ye. A
ye Mali fasojama ka kologɛlɛya foli kɛ, k’a jigi to a kan ko BAMEX bɛna se ka
nɔgɔya don CES izininko an’a lafasa la.
Lafasa ni
sɔrɔdasi kɔrɔw minisiri Zenerali de kɔri darimɛ Sajo Kamara ka fɔ la, Mali bɛ
Turukiye, Afiriki ani diɲɛ bisimila. A y’a jira ko nin bolofɛnjira kɛnɛ in y’a
siɲɛ fɔlɔ ye Afiriki tilebinyanfan fɛ, a bɛ jɛkabaara sɛbɛ kofɔ Bamakɔ ni
Ankara cɛ ani ka Mali ŋaniya jira diɲɛ kɔnɔ.
Turukiye
lasigiden min bɛ Mali kɔnɔ Efe Seyilan, o ye Mali ɲɛmɔgɔw ka cɛsiriw foli kɛ
kojugubakɛ kɛlɛli la ani k’u ka jamana ŋaniya jira dɔ farali la jɛkabaara fanga
kan lakanan ani basigi nasira la.
Siwiliw lakananni ni basigi sabatili minisiri Zenerali de diwisɔn Dawudi Ali Mohamedini ka fɔ la, BAMEX ye hakilila falen pilatifɔrɔmu (kɛnɛ) kelen ye lakananbaaw, ko dɔnbaa ŋanaw ani izininitigw cɛ.
Turukiye
marifa dilanna bi saba ni kɔ minnu lakodɔnnen bɛ diɲɛ kɔnɔ kosɛbɛ, olu bɛ yan
k’u bolofɛnw kofɔ ani k’a dɔw jira, minnu bɛ kɛlɛ kɛ duguma, sanfɛ ani ji kan,
ka fara sibɛrikiriminate furaw kan ani
mansinw fɛ kɛlɛ. Ɲɛjiraliw bilalen bɛ ka bi novanburukalo tile 13 kɔnɔ ka se a
tile 14 ma Kulukɔrɔ, walasa ka se ka minɛn jiralenw fangaw kiimɛ sanni u ka
bila mɔgɔw ka bolo kan.
Dɔkala
Yusufu JARA
Suleyimani SIDIBE
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
