Filaninbin
kɛli bi, o bɛ Sɛgɛninw wasa Arabi sawuditi fɛ balontan in na ka tɛmɛn ni sɛziyɛmudefinaliw
ye ka porokoto kulu ntolantan tako laban na san 1989 diɲɛ ŋanaw ɲɛkɔrɔ
Mali ye taako 6 kɛ U17
kupudimɔni kɛnɛ kan (san 1997, 1999, 2001, 2015, 2017, 2023), wa Mali sen bɔra
tulon na kulu ntolantanw na siɲɛ kelen dɔrɔn : san 1999 ta la Nuwɛli-Zelandi (Berezili
ye Ɔsitarali gosi o ni na ka sebaaya sɔrɔ). A tɔw la, Mali Sɛgɛninw sera
karidefinali ma, ka kɛ jɔyɔrɔ 4nan ye san 2017, 3nan san 2023 ani 2nan san 2015
(a gosira Nizeriya fɛ 2-0 finali la). Tako fila labanw na (san 2017 ani 2023), Sɛgɛninw
bolo bɔra u ka kulu ntolantan balontan saba dɔ la, nka u kɔni sera ka sebaaya
sɔrɔ ka se wicɛmudefinali ma, sanni don bɛ kɛ demifila kɔnɔ.
O jatew ka di degelikaramɔgɔ Aadama Jefila Jalo n’a ka Sɛgɛninw na, u ni
Arabi sawuditi bɛ ɲɔgɔn sɔrɔ bi sebaaya sɔrɔli nɔfɛ ka se U17 wicɛmudefinali ma
Katari san 2025. Mali ye Nuwɛli-Zelandi gosi 3-0 a bɔko fɔlɔ la, Otirisi fana ye Mali gosi o
3-0 kelen in na a bɔko filanan na ;
o siratigɛ la, Sɛgɛninw ka kan k’u fasa fili kosɛbɛ Arabi sawuditi ɲɛɔrɔ Katari
janjo in na.
Tiɲɛ don, filaninbin da ka di Sɛgɛninw ɲɛmɔgɔ Cɛmɔkɔ Berete n’a tɔɲɔgɔnw na
k’u jigi da jamana seegin ɲinintaw jɔyɔrɔ dɔ kan. N’o kɔni ma se ka kɛ,
soseginni bɛ wajibiya u ma. A ɲuman bɛɛ ye u ka se ka sabaaya sɔrɔ ka kɛ jɔyɔrɔ
fɔlɔ walima filanan ye u ka kulu la, nka Sanba Konarɛ kɔni tɛna ye Mali ka bi
ntolantan na.
Degelikaramɔgɔ Adama Jefila Jalo ka kan ka dabali ɲuman tigɛ bi balontan
kama ; kɛrɛnkɛrɛnnenya la kɔfɛlan ani cɛmancɛ. Ibarahima Jakite bɛ sɔn ka
kɛ balondilaba ye bi ani ka Seyidu Danbɛlɛ bila ka taa kininkɛrɛ la, ka dɛmɛn
don ɲɛfɛlan na. Mali ni Nuwɛli-Zelandi ka balontan na, ani a ni Otirisi ka balontan
na, Ibarahima Jakite ma kɔn ka yɛlɛn kɛnɛ kan ; nka a donni fɛn o fɛn
kɔfɛ, o nafaba yera Sɛgɛninw kan, ka da a kan a ka telin, a galabu ka kɛnɛn, a
bɛ balon di koɲuman mɔgɔ tɔw ma. Otirisi ye Mali gosi don min na, Bamakɔ
balontantɔn « Jean-Marc Guillou » balontanna in kasira kosɛbɛ,
Femafoot mɔgɔ dɔ de ka laadilikanw kosɔn, a sɔnna hali ka dumuni kɛ.
DAMAKƐƝƐ DAN BƐƐ- Tile fila balontan kɔfɛ, Otirisi bɛ jɔyɔrɔ fɔlɔ la u ka kulu L kɔnɔ ni
kuru 6 ye, Mali ani Arabi sawuditi ɲɛ, kuru 3 b’o kelenna bolo, Nuwɛli-Zelandi
ta ye kuru 0 ye. Sɛgɛninw ye bi 3 don, saba fana donna u la, Arabi sawuditi
binna a bɔko fɔlɔ la, a gosira Otirisi fɛ 1-0, ka Nuwɛli-Zelandi gosi a bɔko
2nan na 3-2. O la ni o jamana fila ninnu sera ka ɲɔgɔn gosi (0-0, 1-1, 2-2, 3-3),
u ka kuruw hakɛ bɛ kɛ kelen ye (4), wa bi 0 danfara bɛ k’u ni ɲɔgɔn cɛ.
Sariya bɛ mun fɔ jamana fila farali la ka bɔ ɲɔgɔn na ? FIFA ɲɛmɔgɔ dɔ ka
fɔ la, n’o suguya kɛra, karitɔn sɔrɔlen hakɛ bɛ jate (nɛrɛmaw ni bilenmanw) fan
fila bɛɛ fɛ walasa ka se k’u fara ka bɔ ɲɔgɔn na. Nin waati in na, ni jate tara
karitɔnko kan, o da ka di Sɛgɛninw na, u ye nɛrɛna kelen nai bilenman kelen de
sɔrɔ, Arabi sawuditi ta ye nɛrɛma 6 ani bilenman 2 ye. Arabi sawuditi ka nɛnɛma
5 ani bilenman 2 sɔrɔla u ni Otirisi ka balontan senfɛ, o labanna u ka mɔgɔ 9,
Otirisi ka mɔgɔ 10 na, ka da a kan Otirisi fana ka mɔgɔ kelen gɛnna.
Binni kɔfɛ Otirisi ɲɛkɔrɔ, Sɛgɛninw ka kan k’u
fasa fili kosɛbɛ walasa ka se k’u senkɔrɔmadonbaaw jigi sigi
Arabi sawuditi ni Nuwɛli-Zelandi ka balontan na sibiri tɛmɛnnen in, Arabi
sawuditi fɔlɔla ka bi don kabini sanga 2nan na ; O bi donna Abudulu Rahiman
Sufiyani fɛ ; sɛgɛnnafiɲɛbɔ kɛra o kan. Tako filanan na, Matiyasi Numɛzi
y’o kuru jibɔ sanga 55nan na, nka Nuwɛli-Zelandi k’o nisɔndiya ma kɛ ko
kuntaala jan ye, Sabiri Dahali ye Arabi sawuditi ka bi filanan don sanga 58nan
na. Jaki Pemisikiye labanna k’o kuru fana jibɔ Nuwɛli-Zelandi ye sanga 88nan
na. O n’a ta bɛɛ, Tari Sayɛdi yɛlɛnnen tako filanan in kɔnɔ, o ye Arabi
sawuditi ka bi 3nan don sanga 90nan +1 na.
Arabi sawuditi, a ka ca a la u bɛ balon tan 4-4-2 la, wa ɲɛfɛ u jigiba bɛ Sabiri
Dahali ani Waleyɛdi Alinuru fila de kan ; Mali dun bɛ balon tan 4-2-3-1 na.
Arabi sawuditi cɛmancɛmɔgɔ Abudulu Rahiman Sufiyani dɛmɛnbaaw cɛmancɛ la o ye
Mahɛri Tawasi, Ibarahimu Azamu ani Abudulazizi Alifawazi ye. U ka
degelikaramɔgɔ ye Abuduluwahabu Aliharibi ye. Hakililajigin na, Arabi sawuditi
ye san 1989 U17 kupudimɔni ta Ekɔsi janjo la. O waati la balontanna minnu si tɛ
tɛmɛn san 16 kan olu de tun b’a janjo kɛ. K’a daminɛ san 1991 de la bɔ kɛra U16 la ka don U17 la,
Gana kɛra jamana fɔlɔ ye diɲɛ kɔnɔ ka U17 kupudimɔni ta.
Dɔkala Yusufu JARA
Sulemani
Bobo TUNKARA
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
