Diɲε tolantan tɔnba (FIFA) y’a ka ɔkutɔburukalo kulusigili jaabi da kεnε kan.

Kulusigili kura in kɔnɔ, Mali yεlεnna ni jɔyɔrɔ fila ye diɲε kɔnɔ. A bε jɔyɔrɔ 47nan na Urumani ɲε. O bε jɔyɔrɔ 48nan na. WenezuWela bε jɔyɔrɔ 49nan na, Silowaki bε jɔyɔrɔ 50nan na. Afiriki kɔnɔ, Mali bε jɔyɔrɔ 8nan na. Jamana tan fɔlɔ min bε ten kan, Mali b’o la. Ka sɔrɔ FIFA ka sεtanburukalo kulusigili la, Mali tun bε jɔyɔrɔ 49nan na diɲε kɔnɔ.

SAmatasεgεw ɲεmɔgɔ Hamari Tarawele n’a tɔɲɔgɔnw ye nin sannayεlεn in sɔrɔ k’a sababu kε a ye sebaaya fila min sɔrɔ a ka teriyantolantan tεmεnnenw na. A ye Uganda gosi 1 ni 0, ka Arabi Sawuditi gosi 3 ni 1. Hakililajigin na, Marɔku bε jɔyɔrɔ 13nan na diɲε kɔnɔ, Sεnεgali bε jɔyɔrɔ 20nan na, Tunizi bε jɔyɔrɔ 32nan na. Arizantini de bε ten kan diɲε kɔnɔ, Faransi bε jɔyɔrɔ 2nan na, Berezili bε jɔyɔrɔ 3nan na, Angiletεri bε jɔyɔrɔ 4nan na, bεliziki bε jɔyɔrɔ 5nan na.

FIFA ka kulusigili nata ye nowanburukalo ye. Kupudimɔni 2026 ɲεbilantolantan tile fila fɔlɔw bε daminε o kalo in na Afiriki jamanaw cε. O ɲεbilantolantanw hukumu kɔnɔ, Mali ni Cadi bε ɲɔgɔn sɔrɔ Bamakɔ yan, ka sɔrɔ ka taa Santarafiriki kama Komɔri. U bε ɲɔgɔn kunbεn yen. Ni Mali sera k’o ntolantan fila sebaaya sɔrɔ, FIFA ka nowanburukalo kulusigili fana na, a bε sannayεlεn Afiriki kɔnɔ ani diɲε kɔnɔ.

Ni kupudimɔni ɲεbilantolantanw kuncεra, se bε kε KANI Kɔnɔwari 2023 koɲεw ma. Mali ni Tunizi, Afirikidisidi ani Namibi bε kulu kelen kɔnɔ. U dagayɔrɔ bεnna Korogo ma. A ka ntolantan fila fɔlɔ la, a ni Afirikidisidi bε ɲɔgɔn sɔrɔ ; o kɔfε Tunizi, Amadu Gɔn Kulubali tɔgɔla farikoloɲεnajεkεnε kan. Jamana fila fɔlɔ minnu mana ye ten kan u ka kuluw kɔnɔ, olu de bε sebaaya sɔrɔ ka wicεmudefinali kε, nka jɔyɔrɔ sabananw cεla ŋana de bε sugandi ka fara u kan. 

Jεnεba BAGAYƆKƆ

Dɔkala Yusufu JARA