N’a wɔɔsilenba nɔgɔlen ye, Musa nana sɔ san sɔfeerela dɔ bolo Jikɔrɔnin-Kura, Manden komini kɔnɔ. Nin kɛra ntɛnɛndon dɔ fɛ zanwuyekalo kɔnɔ. Nɛgɛ kanɲɛ 21 tun ka surun. A b’i n’a fɔ a kamana gannen tun don. Sabula a tun t’a dɔn ko sɔfeerela in bɛna sɔn k’a ka kɛmɛ naani biye fiɲɛma in minɛ. Bitikitigi caman tun banna k’a minɛ a su kelen in na. Musa ka fɔ la, n’a tun b’a dɔn ko nin wari in bɛna kunko lase a ma nin cogo la, a tun tɛna a minɛ yaalayaala feerekɛla muso in bolo a yɛrɛ tɛ min dɔn. A jigila tigɛlen ye nin fɔ k’a yuuru k’a sigi sannikɛlaw sigiyɔrɔ la. Sɔfeerela Asan ko ale ye nin ɲɔgɔnna gɛlɛyaw sɔrɔ nin waati in na. A ko sannikɛla dɔw bɛ na ni waribiye fiɲɛma dɔw ye. Nka n’ale y’o ɲɔgɔnna lasegin u ma, u bɛ ban k’o minɛ. Tuma dɔw yɛrɛ la k’ale bɛ dɛsɛ ka feere ɲɛnama kɛ k’a sababu kɛ nin gɛlɛya suguyaw ye. A kɔni ye Musa ka kɛmɛ naani kolon in minɛ ka dumuni feere a ma. A y’o kɛ k’a jigi to a kan, ko a fana bɛna se k’a di esansifeerela dɔ ma. Ka da a kan tajifeerelaw tɛ ban ka wari fiɲɛmaw minɛ u ka sannikɛlaw bolo. Kasɔrɔ o sannikɛla ninnu tɛ sɔn k’o ɲɔgɔnna minɛ feerekɛla bolo. Tajifeereyɔrɔ dɔ kotigi Suleyimani Banba y’a jira ko nin waleyaw bɛ sen na a mɛɛnna Nka ko a juguyara o bɛ san kelen bɔ. A k’a dɔw yɛrɛ b’a to i ka taji k’u kun fɔlɔ, ka sɔrɔ ka waribiye fiɲɛma bɔ ka di i ma. Ni cogoya wɛrɛ t’i bolo, i wajibiyalen k’a minɛ ; ka da a kan a b’a jira i la ko wari wɛrɛ t’a bolo n’o tɛ. A ko don dɔw la olu bɛ se ka sefawari dɔrɔmɛ ba bi saba (d30 000) dalajɛ waribiye fiɲɛmaw dama na. A k’ale yɛrɛ bɔra ka banki saba yaala nin ko kelen in na. Ka da a kan banki dɔw fana bɛ ban o waribiye suguya ninnu na n’i ko i bɛna i ka wari lamara u fɛ yen i ka kɔnti la. U b’a woloma ka ɲumanw tɔmɔ ka bɔ a la, k’a tɔ lasegin i ma k’u tɛ se k’olu minɛ. A ko a sera banki dɔ de la min ka jama man ca kosɛbɛ, olu y’a minɛ, nka u ye dɔ tigɛ ka bɔ a waribiye fiɲɛma kelenna bɛɛ hakɛya la. Walasa ka se ka fu siri nin waleya jugu in dan na, a miiri ye mɔgɔ si kana wari kolon di mɔgɔ ma, bankiw tɛ sɔn ka minnu minɛ. Dunfɛnfeerelaba dɔ Bamakɔ suguba kɔnɔ, o y’a jira k’ale ma sɔn Banba ka kuma ma. A ko ni feerekɛlaw bnna ka waribiye fiɲɛmaw minɛ sannikɛlaw bolo, u bɛ sɔn ka mɛɛn k’a sɔrɔ u ma feereli kɛ, sabula wari kolon ka ca kosɛbɛ sisan. A k’ale miiri ye mɔgɔw ka taa u ka waribiye kolonw falen waribiye kɔrɔ falennaw fɛ yen. Ko a mana kɛ cogo o cogo, i bolo lankolon tɛ bɔ yen. Ale k’o kuma bɛ sɔn ka kɛ fura ɲuman ye mɔgɔ caman ma. Nin taratadon in na, nɛgɛ kanɲɛ 10 tun sera an bɛ se waribiye kolon falenna dɔ fɛ yen waati min na Bamakɔ faaba komini 4nan bɔlɔn dɔ kɔnɔ. Mikoro b’o bolo, saki dalen b’a kɔ la. Nka a ma sɔn k’a bugunnatigɛ di an ma ka da a kan ko ale tɛ mɔgɔ dogolen ye, a tun b’ a la ka wele da ko : «zetɔn silen, ani waribiye kolon». A y’a jira k’ale bɛ san caman bɔ nin baara in na, ka waribiye kolonw bɔ mɔgɔw bolo. Kabini an ɲɛna yen, muso dɔ y’a mankan mɛn k’a wele. Sefawari dɔrɔmɛ ba kelen (d1 000) biye kolon tun b’o bolo, a b’a fɛ ka min falen. Waribiye kolon falenna in ye kɛmɛ kɔnɔntɔn dili dajira a la, n’o ye kɛmɛ tigɛli ye a kun falensara ye. Muso in sɔnna o ma, sabula a ko nin tun y’a dɔgɔkun fila ye a bolo mɔgɔ si sɔnnen tɛ k’a minɛ. Kabini san 2020, waribiye kolon falennaw tɛ ka se ka « Bceao » lasɔrɔ tuguni k’u ka wari kolon minɛnenw falen Waribiye kolon falenna in ka fɔ la, biye kolon tigilamɔgɔ de ka ca bi . A ko dɔw bɛ se ka na ni sefawari dɔrɔmɛ ba kɛmɛ (d100 000) ɲɔgɔnna ye biye kolon dama na k’o falen. A k’ale ka nimɔrɔ b’a caman bolo u b’a wele ; ka da a kan olu t’a masɔrɔ ka taa falenyɔrɔ wɛrɛ la. Nka a ko olu k’o baara in b’a la ka gɛlɛya sisan. Sabula k’u caman bɛ ɲinin k’a dabila ka da a kan k’u fana tɛ u bolo wari ninnu falenyɔrɔ sɔrɔ bilen. A y’a jira ko ni olu ma sɔn ka minnu ka biye kolon minɛ, i b’a ye u bɛ sin k’a fara i jɔlen kɔrɔ ka taa n’u yɛrɛ ye. WARIBIYE KOLON- O bɛ fɔ waribiye ma, fiɲɛ bɛ minnu na. U yɔrɔ dɔ ma dafa, u sɛbɛkɔrɔ folonkotolen don, u jeninnen don, ji bɛ k’u tiɲɛ walima u bɛ tiɲɛcogo wɛrɛw la. O la, da tɛ se ka kɛ u la bilen ni wari ɲumanw don. O de kosɔn « Bceao » tun ye yɔrɔ dɔ kɛrɛnkɛrɛn o biye suguyaw falenni kama. A’ mana bɛn u falencogo min kan, o bɛ di i ma. Nka a waribiye kɔrɔ dɔw tiɲɛcogo fɛ, u tɛ se ka sɛgɛsɛgɛ ka ban yɔrɔnin kelen. Olu falenni bɛ se ka bila waati wɛrɛ la sanni u k’u faamuya koɲuman. Walasa i ka wari kolonw ka se ka falen « Bceao » la, wajibi ye i bugunnasɛbɛn dɔ sɔrɔli y’i bolo. O bɛ se ka kɛ NINA, biyometiri walima karadantɛ ye. U tun bɛ falen fu la fɔlɔ dɔrɔmɛ tun tɛ sara a kunkɔrɔ. Mɔgɔw ka fɔ la, waribiye kolonw tun bɛ falen « Bceao » la nɔgɔya la sanni koronawirisiko ka daminɛ. I tun mana na ni biye hakɛ fɛn o fɛn ye u tun b’o bɛɛ falen. Nka sisan, u dan ye biye 50 falenni ye mɔgɔ kelen bolo. Kabini san 2020, waribiye kolon falennaw ka fɔ la, « Bceao » lasɔrɔli man nɔgɔ olu bolo bilen. I bɛ wajibiya ka bɛnkan sɔrɔ i n’a baarakɛla dɔ cɛ, min b’i dɛmɛn u ka se ka falen ; nka i bɛ musaka sara o kunkɔrɔ. Bakurubafɔ la, « Bceao » yɛrɛ de bannen bɛ waribiye kolonw falenni ma sisan. O de bɛ ka wariko gɛlɛya juguya Bamakɔ kɔnɔ, ani jamana mumɛ kɔnɔ. An bɛ waati min na, an ka timinandiya fosi selen tɛ ka « Bceao » mɔgɔ lasɔrɔ fɔlɔ k’u fana hakilila dɔn a ko la. Dɔkala Yusufu JARA Fadi SISE
Dɔkala Yusufu Jara
Vente de carburant.
Vente des produits phytosanitaires.
Sport/football.
Terrorisme à Kita.
Salon des armements.
Annulation du pèlerinage.
