AES minisiriw ka lajε : Wagadugu bεnkanw

Lajε in laɲinin tun ye ka sariyasεbεnw labεn, minnu bεna dajira AES  jamanakuntigiw la u ka lajε senfε, u k’u fεla di u kan. U ka baara daminεni dantigεli kɔrɔfɔw kɔnɔ, cidenkuluw ɲεmɔgɔw ye foli ni tanuni lase jamanakuntigiw ma ; olu minnu ye ŋaniya ta ka Burukina Faso, Nizεri ani Mali foosi ka bɔ Afiriki tilebinyanfan nafoloko tɔnba (Cedeao) la ; ka da a kan, o ye a sigikan sira bila. Burukina cidenkulu ɲεmɔgɔ bolo, nin foosili in ye hεrε kura dɔ sira ye jamana saba ninnu bolo, u ka se ka u yεrεw ka sɔrɔfεnw yiriwa ani ka dɔ fara u sekow kan o la. 

Bεn kεra fεn minnu kan jamanaw tɔgɔlamɔgɔ minnu fε u ka lajε senfε, minisiriw y’o sεbεnw fεsεfεsε k’u fεla di u kan ; kεrεnkεrεnnenya la, AES bεnkan, bεnkanporoze min bε sahelikungo jamanaw ka faraɲɔgɔnkan (kɔnfederasɔn) sigi senkan, sigikun tun ye poroze min ko ye, barabolodalen ani laseli laban min kεra AES jamanakuntigiw fε. Baaraw kuncεli la, minisiriw bεnna ninnu kan : fεn min ye AES bεnkan ye, u m’a ɲinin ka yεlεma don o kɔnɔko la. 

Nka fεn min ye (Cedeao) bεnkan yεlεmanen ye, ani bεnkan min tara k’u foosi ka bɔ (Cedeao) la, n’o bɔli tε bila ka balan kɔnɔ, u y’a jira ko kɔnfederasɔn sigili senkan o bεnkan b’a hakilimajɔ o foosili in fε. Fεn min ye kɔnfederasɔn sigili senkan o bεnkan ye, u y’a ɲinin ka sinsinyɔrɔw kε sahelikungo jamanadenw yεrεw tarikuw ye. U ye AES fangabulon mankan cogoyaw fana dajirali kε ; jamanakuntigiw ka lajεw, minisiriw ni bulonbaw ka cidenw ka lajεw kofɔra o kɔnɔ. U y’a ɲinin kɔkankow minisiriw fε, olu ka tεmεn ni hakiljakabɔ ye AES bεnkan kan, ni yεlεma ɲuman bε se ka don a yɔrɔ min na halibi, yanni jamanakuntigiw ka AES jamanakuntigiw ka lajεba daminεni sendon.  

Fεn min ye Liputako-Guruma kolatigεkulu ye, minisiriw y’a ɲinin o ka don AES jamanakuntigiw ka don nata lajε baara kεta bolodalenw kɔnɔ. Fεn min AES jεkuluba in ja ye, u bεna o kɔnɔfεn ŋaniya sirilenw kan jamanaw tɔgɔlamɔgɔw ye minnu dantigε u ka lajε senfε. Fεn min ye AES kunnafoniko ye, yanni AES waleyali ka daminε, minisiriw jεnna ni baara kεta dabali dajiralenw ye, walasa dɔ ka fara a yeli kan joona ani AES jamanadenw ni jεɲɔgɔnw kεli k’a k’u ta ye. 

U ye laɲinin caman kε. O dɔ ye AES kuntilennasεbεn dilanni ye jamanaw ka kɔnfederasɔnko kama, ka kunnafoniko baara kεta dajiralenw waleyali sennateliya ani ka bεnkan ja labεn, bεnkanporoze ŋaniya sirilen minnu ye farankan ye sekow tilali ye kɔnfederasɔn ni jamana kafolenw cε, bεnkanporoze minnu ye farankan ye hamadamadenw n’u bolofεnw taakaseginni na u fεrε ma, lafasa ani basigi la, walasa ka se ka AES jamanaw foosili ka bɔ (Cedeao) la, k’o kɔlɔlɔw kunbεn. 

Ani ka hakilijakabɔkulu dɔ sigi o foosili in kɔlɔlɔw kunbεnni kama ani ka jεɲɔgɔn kεrεnkεrεnnenw dantigε. Minisiriw y’u ka nisɔngoya jira ɲangili jugu tali la ka Nizεri tεgε ko ka bɔ a halalaw la (Uemoa) la ni (Beceao) ka sira ye. U y’u ka dεmεn jira Nizεri gɔfεrεnaman ani Nizεri jamanadenw na, ani k’a wajibiya o gεrεntε jugu ka wuli ka bɔ yen, ka Nizεri ka hakεw lasegin a ma, o kana bila ka balan kɔnɔ. U labanna ka ɲɔgɔndεmεn hakilila kεrεnkεrεnnen kelen jira Nizεri jamanadenw na.

Jadone JAMA

Dɔkala Yusufu JARA