Alimaɲi min tun ye diɲɛ ŋana ye, o sen bɔra tulon tɔ la, n’o tɛ kɔnfederasɔnw ŋana tɔ bɛɛ da foronnen bɛ diɲɛ kupu nɔfɛ k’a daminɛ wicɛmudefinaliw la. Sɛbɛnw kan,
u ka ca ni jamana 16 ye janjo tɔ la U17 kupudimɔniko la
Katari san 2025 : Erɔpu tɔn 7 (Faransi, Itali, Otirisi, Suwisi, Angiletɛri, Irilandi,
Pɔritugali), Afiriki tɔn 4 (Mali, Burukina Faso, Uganda, Marɔku), Azi gun tɔn 3
(Zapɔn, Koredinɔri, Uzubekisitan), Ameriki woroduguyanfan tɔn 1 (Berezili) ani
Ameriki kɛɲɛkayanfan tɔn 1, Ameriki cɛmancɛ tɔn kelen (Mɛkisiki).
Diɲɛ ŋana Alimaɲi kɔni sen bɔra tulon tɔ la, o kɛra sɛziyɛmudefinali senfɛ,
Burukina Faso y’a gosi 1-0, nka jamana tɔ wɛrɛw bɛ yen halibi, minnu delila ka
diɲɛ kupu in ta, o dɔ ye Berezili ye, ale y’a ta siɲɛ naani (san 1997, 1999,
2003, 2019, jamana don min y’a tako camantigi 2nan ye Nizeriya kɔfɛ), Mɛkisiki
tako fila (san 2005, 2011), Angiletɛri tako kelen (san 2017), Suwisi tako kelen
(2009), Faransi (san 2001).
Jamana 11 tɔ jumɛnw bɛna se ka sebaaya sɔrɔ ka wicɛmudefinaliw tɛmɛn ? Ka
da a kan a si ma deli fɔlɔ ka kupudimɔni U17 ta, wa ni a bɛɛ hami ye bi k’a
sɔrɔ walasa u tɔgɔ ka don tariku kɔnɔ. Ni Alimaɲi, diɲɛ ŋana kɔrɔ, a binna, an
b’a kɔlɔsi kɔnfederasɔn tɔ bɛɛ ŋanaw bɛ wicɛmudefinali in na. N’o ye Marɔku (Afiriki
balontan kɔnfederasɔn), Pɔritugali (Erɔpu balontan kɔnfederasɔn), Mɛkisiki (Afiriki
kɛɲɛkayanfan balontan kɔnfederasɔn ani Ameriki cɛmancɛyanfan ni Karayibu), Uzubekisitan
(Azi gun balontan kɔnfedesarɔn) ani Berezili (Ameriki woroduguyanfan balontan
kɔnfederasɔn). Nin ŋana ninnu bɛna ɲɔgɔn sɔrɔ bawolo sima kan.
Marɔku-Mali bɛna kɛ Afiriki ŋanaya bɛ min bolo (Marɔku) ani a ŋana-dankan
cɛ. O bɛna kɛ balontan gɛlɛnba ye ; ka da a kan a bɛna kɛ tajurusara
ɲininni ye Mali Sɛgɛninw bolo, hakililajigin na, Marɔku ye Mali gosi mɔɔnɔbɔw
(0-0) bɛɛ kɔfɛ penalititanw na. Jamana 16 minnu ye sebaaya sɔrɔ ka se nin
wicɛmudefinali ma, Itali ani Otirisi, o fila bɛɛ y’u ka balontan bɛɛ sebaayaw
sɔrɔ kabini U17 kupu in balontanw daminɛna.
Tako fɔlɔ la, Otirisi ye Arabi sawuditi gosi (1-0), ka Mali gosi (3-0)
ani ka Nuwɛli-Zelandi gosi (4-1), ka laban ka Tunizi gosi sɛziyɛmudefinali la (2-0).
O b’a jira ko balontan naani na, Otirisi ye bi 10 don, 1 de donna a la. Itali
fana ye kabako kɛ. Kuluntolantanw na, a ye jatigi Katari gosi (1-0), ka Boliwi
gosi (4-0) ani ka Afirikidisidi gosi (3-1), ka sɔrɔ ka Repubiliki-Cɛki bɔ a la sɛziyɛmudefinali
la 2-0.
Bɔko naani na Itali ye bi 10 don, hali bi kelen ma don a la. Otirisi
ni Angiletɛri min bɛna ɲɔgɔn sɔrɔ, o ye sebaaya 3 kɛ, ka binko 1 kɛ, ka bi 13
don, bi 4 donna a la, Itali dun, ale ni Uzubekisitan min bɛna ɲɔgɔn sɔrɔ, o ye
sebaaya 2 kɛ, ka filaninbinko 1 kɛ, ka binko 1 fana kɛ, ka bi 10 don, bi 5
donna a la.
Wicɛmudefinali tɔw la, Mali ni Marɔku bɛna ɲɔgɔn sɔrɔ, Burukina Faso ni
Uganda bɛna ɲɔgɔn sɔrɔ, o min ye Sɛnɛgali bɔ a la sɛziyɛmudefinali la (1-0).
Suwisi ni Irilandi, Mɛkisiki ni Pɔritugali, Bererezili ni Faransi, Koredinɔri
ni Zapɔn, olu bɛ ɲɔgɔn sɔrɔ. Bi donnen mumɛ ye 287 ye balontan 88 kɔnɔ, o ye
bɛrɛmakɛɲɛ na bi 3,26 ye balontan kelen o kelen na. Jamana min ɲɛfɛlan ye
jɔyɔrɔba fa ko in na o ye Marɔku ye fɔlɔ, bi 17 b’a bolo, a ye Nuwɛli-Kaledoni
gosi 16-0 kulu ntolantanw tile 3nan na, o ɲɔgɔnna bi caman tun ma deli ka don
kupudimɔni balontan senfɛ, o y’a sɔrɔ a binna a ka balontan fila la Pɔritugali
ɲɛkɔrɔ (6-0) ani Zapɔn ɲɛkɔrɔ (2-0).
Kɔfɛlan ɲumantigiw ye Itali ani Otirisi ye, o fila bɛɛ y’u bɔko bɛɛ sebaaya
sɔrɔ. Zapɔn, Berezili ani Faransi, bi 1 donna o kelenna na u bɔko naani na. Jamana minnu ɲɛfɛmɔgɔw ma
bi caman sɔrɔ ka don o ye Faransi ani Uganda ye, u ma se ka tɛmɛn bi 4 donni
kan u bɔko naani na. Nka Uganda kɔni ye jɔ bagabagako caman kɛ biko la a bɔko
kelenna bɛɛ la. Kunnafoni na, Uganda ni Mali bɛ jabagala ye lotoli kelen ye ka
fara Burukina faso kan. Wa Mali, Burukina Faso, Marɔku ani Uganda u bɛɛ
degelikaramɔgɔw y’u yɛrɛ ka jamanadenw ye.
Balontanw bolodacogo
Tarata nowanburukalo tile 18 san
Nɛgɛ kanɲɛ 15 tɛmɛnnen ni sanga 30 ye : Uganda-Burukina Faso
- Itali-Uzubekisitan
Nɛgɛ kanɲɛ 16 : Mɛkisiki-Pɔritugali
Nɛgɛ kanɲɛ 16 tɛmɛnnen si sanga 30 ye : Berezili-Faransi
Nɛgɛ kanɲɛ 17 tɛmɛnnen ni sanga 45 ye : Suwisi-Irilandi
Nɛgɛ kanɲɛ 18 tɛmɛnnen
ni sanga 15 ye : Koredinɔri-Zapɔn
Nɛgɛ kanɲɛ 18 tɛmɛnnen ni sanga 45 ye : Marɔku-Mali
- Otirisi-Angiletɛri
Dɔkala Yusufu JARA
Solomani
Bobo TUNKARA
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
