San fila
Kidali dugu bɔɔsilen kɔ Mali sɔrɔdasiw fɛ, Uniwɛrisite Kurukanfuga Bamakɔ, o ye
tariku donba in laɲɛnamaya
Hadamaden ka
hakɛw Uniwɛrisite Bamakɔ, o lajɛkɛsoba fara i ko da kɔnɔ ɲin juma tɛmɛnen
nowanburukalo tile 14 san 2025, barosigi la, min masalakun tun ye : « fanga
seginni a ɲɛma Kidali : a nɔgɔyaw n’a gɛlɛyaw ani siniɲɛsigikow jamana ka yɛrɛya
sɔrɔli hukumu kɔnɔ ». A barosigi labɛnna ni sannayɛlɛnkalan ɲɛmɔgɔso ani
ɲininni ɲɛmɔgɔso ka jɛɲɔgɔnya ye, lajɛ in kɛra juma tɛmɛnnen in furancɛlafanga
jamanakuntigi Zenerali Asimi Goyita ka yamaruya kɔnɔ. A ɲɛmɔgɔya tun bɛ sannayɛlɛnkalan
ni ɲininni minisiri Pr Burema Kansayi bolo.
Gɔfɛrɛnaman
minisiri caman tun b’a kɛnɛ kan, kɛrɛnkɛrɛnnenya la Abudulayi Jɔpu (kɔkankow ni
diɲɛ tɔnbaw cɛ koɲɛnabɔ minisiri), Bakari Tarawele (jamana jɔli kura minisiri
ka ɲɛsin gɔfɛrɛnaman ni fangabulonw cɛ koɲɛnabɔ ma), Dr Amadu Si Sawanɛ (kalanko
minisiri) ani Abudulu Kasimu Fɔnba (denmisɛnya ni farikoloɲɛnajɛ, ka ɲɛsin
fasodenya ladamuni ani fasoden ɲuman dilanni ma).
Uniwɛrisite
mɔgɔw, ko dɔnbaa ŋanaw ani kalandenw ye hakilila falen kɛ fanga ani jamana
lakananbaaw segincogo kan Kidali, basigi disidakow, yɔrɔ tiɲɛnenw labɛnni ani
fɔkabɛn, ka fara laɲininw kan bɛn kuntaala jan sɔrɔli la.
O hukumu
kɔnɔ, Poli Tarawele min bɛ Uniwɛrisite Kurukanfuga koɲɛnabɔla nɔ na fɔlɔ, o ye
hakililajigin kɛ Uniwɛrisite in ka laɲinin min na Mali sera ka tagan tilali ma,
a labanna k’a jira ko Ala ni Mali lakananbaaw ka cɛsiri kosɔn o tilali in
balila nowanburukalo tile 14 san 2023.
Fɛn min ye
laɲinin filanan ye da sera san 2023 sariyasunba sariyasen 24, alineya 1 ani 2 ma ;
o min b’a jira ko faso lafasali ye fasoden bɛɛ kunko ye, ko lakananbaaw dɔrɔn
kunko tɛ. Poli Tarawele ka fɔ la, ka kunnafoni di, ka kumaɲɔgɔnya kɛ Mali kan, k’i
ka dɛmɛn lase lakananbaaw ma, o waleya bɛɛ ye jamana lakananbaaw dɛmɛnni ye. Fɛn
min ye laɲinin sabanan ye, a ye gɛlɛyaw kofɔ i n’a fɔ nɔgɔyada bayɛlɛmani ka kɛ
foroba baara kɛta ye ka sinsin yɛrɛya, nafa jɔnjɔnw ani jamana ka sugandiliw
bonyani kan.
Hakilijakabɔ
kɔnɔ, Pr Burema Kansayi sinnina sebaaya dɔnniya kan. A ka fɔ la, Kidali bɔɔsili
ma kɛ kɛnɛkankɛlɛ dama ye, a kɛra ni maliden bɛɛ hakili ye, ani a ye
hakililajigin kɛ ko marayɔrɔ tun kɔlɔsilen jamana fanga la kabini san 2012
marifatigijɛkuluw fɛ, ka jamana fara ka bɔ ɲɔgɔn na ani ka dan kari a ka yɛrɛya
la.
Nowanburukalo
tile 14 san 2023 kɛra wulikajɔba ye furancɛlafanga ɲɛmɔgɔw fɛ ka fu siri o
waleya jugu in dan na. Jamana lakananbaaw ka sebaaya kɔfɛ, minisiri Kansayi ye
disidakow dantitɛ : ka segin ka jɔli kɛ dɛnkɛrɛfɛ kana k’o la, ka dannaya
lasegin a cogoya kɔrɔ la Malidenw cɛ ani ka kelenya sinsin sigiɲɔgɔnw cɛ. O
siratigɛ la, a ye wele bila uniwɛrisite mɔgɔ bɛɛ ma ani karamɔgɔ-ɲininnikɛlaw
ma, bin kɛra jamana kan cogo min na k’o fɛsɛfɛsɛ, k’a kɔlɔlɔ kiimɛ ani ka
sigidaw maracogo kuraw dajira ; ani min ye kalandenw ye, u ka kɛ nin hɛrɛ kura
in lasigidenw ye k’a sababu kɛ ɲininni
ani hakililaw ye kow la.
Walasa ka se
k’o haminanko in waleya, karan ka kan ka kɛ ɲininni porogaramu minnu sigili ma
senkan, basigi ani yiriwali kama, a bɛ k’a kun don olu kɔrɔ, ka dusu don
hadamadenya ni masalakun talenw kan ba la ani ka kuntilenna di foroba hakilila
ma ka taa jamana basigili laɲininw ye. A ka fɔ la, an bɛ ka siniɲɛsigi soba de
jɔlen kurunbonkari : ka Kidali kɛ Malidenw ka muɲunni ani taama ka taa yiriwali
ani bɛn ye, o taamasiyɛn ye.
O kɔfɛ,
dunduguma kɔlɔsili la, minisiri Kansayi ye Faransi kunnafonidiso dɔw ka kunnafoni
kolonw gansili lagosili kɛ. A b’u jate kojugubakɛlaw ka soloninw ye ka Afiriki
marali kura tasuma dadon. O waleyaw tɛ kunnafonidi ye tuguni, jojugubakɛ
jonbololi don.
Nin
hakilijakabɔ don in bɛ furancɛlafanga ɲɛmɔgɔw ŋaniya kɔnɔ ka nowanburukalo tile
14 kɛ taamasiyɛndon ye jamana ka yɛrɛya an’a kelenya laseginni na a ma, ka Mali
uniwɛrisitew jɔyɔrɔ ɲɛgɛn a kɔnɔ jamana dɛmɛnni siratigɛ la ɲɛtaa la.
Dɔkala
Yusufu JARA
Amara Bɛni Yaya TARAWELE
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
