Karamɔgɔ-ɲinininkεla in ka fɔ la, yanni jamana ka minε k’a mara, a weletɔgɔ fɔlɔ tun ye Ho-Fulowu ye. Tubabukan don ; a bamanankan ye « ba sanfεlan ». Jamana minεni k’a mara, o daminε waati la, a tɔgɔ yεlεmana ka kε Ho-Sεnεgali-Nizεri ye. O fana ye tubabukan ye ; o kɔrɔ ye « Ba Sεnεgali ni Bajoliba sanfεlan ». A welela tugu Seneganbi. O waati la, a tun bε Sεnεgali mara faamaw ka fanga kɔnɔ. San 1920 waati de la, jamana in welela Sudan Faransε. O tɔgɔ tora an ka jamana kan fo ka yεrεmahɔrɔnya dugu jε, Pr Amadu Tunkara ka fɔ la. San 1959 waatiw la, Afiriki ɲεmɔgɔ dɔw y’a ‘ŋaniya, k’an ka jamana bɔ marabaa juguw ka bolo kan. Mali faraɲɔgɔnkan hakilila bangera o kɔnɔ ; n’o ye Sudan Faransε ni Sεnεgali farali ye ɲɔgɔn kan.
Pr ka fɔ la, faraɲɔgɔnjamana in tɔgɔ dali Mali la, o dajirala Sεnεgali ɲεmɔgɔ Leyopoli Sedari Sεngɔri fε. Tuma min na u ye Mali faraɲɔgɔnkan jamana sariyasunba labεn, tɔgɔ datɔ a la, Leyopoli Sedari Sεngɔri y’a jira ko tɔgɔ in bε da, ka Sunjata Keyita ka Mali koɲumandɔn ; sabula tɔgɔ in tεna dan Sεnεgali ni Sudan Faransε fila dama ma, a bε tεmεn o bεε kan. Mali bε jamana naani kofɔ : Sudan Faransε, Sεnεgali, Hotiwɔlita n’o ye Burukina Faso ye, ani Dahome, n’o ye Benεn ye. Nka, o tɔgɔ in tun tε ɲεmɔgɔ dɔw fεko ye, kεrεnkεrεnnenya la, Kɔnɔwari jamanakuntigi Felikisi Hufuwεti Buwaɲi ; Ale de ye ko bεε kε, o kana se ka sira sɔrɔ. Kɔnɔwari kεlen k’a ban, jamana naani tɔw ye lajε kε Bamakɔ desanburukalo la san 1958. San kelen o kɔfε, n’o ye zanwuyekalo san 1958 ye, u ye ɲɔgɔn sɔrɔ Dakaro, Sεnεgali faaba kɔnɔ, Mali faraɲɔgɔnkan jamana sariyasunba labεnni kama. A ɲininna jamanakuntigi kelenna fε, u ka segin ka taa sariyasunba in kɔnɔko ɲεfɔ u ka jamanadenw ye, n’u bε jεn n’a ye. O de senfε, Hotiwɔlita ni Benεn y’u foosi ka bɔ jε la. U y’u ban ka bεnkan bolonɔbila ; sabula Felikisi Hufuwεti Buwaɲi y’u kɔnɔnasu, k’u kana sɔn ; Pr Amidu Tunkara ka fɔ la.
MANDEN FANGA- Karamɔgɔ-ɲinininkεla in ko, nin waati y’a sɔrɔ Dahome batondankan bε ka dilan Faransi fε. Hufuwεti Buwaɲi ko ni Dahome sɔnna a ma, u ka poroze in baara bε jɔ ». Bankun dɔwεrε kεra Hotiwɔlita siriko jugu ye Abijan batondankan na. O de kosɔn, nin jamana fila y’u foosi ka bɔ bεnkan kɔnɔ. Nka o n’a ta bεε, tariku dɔnbaa ŋana in ka fɔ la, jamanakuntigi Modibo Keyita ni Leyopoli Sedari Sεngɔri y’u fasa fili, min b’a to Mali faraɲɔgɔnkan jamanako bε se ka sira sɔrɔ. U sera ka balan caman kɔsagon, fo ka se san 1960 zuwεnkalo tile 20 ma ; o don in de la, Mali faraɲɔgɔnkan jamana y’a ka yεrεmahɔrɔya sɔrɔ. Nka ɲɔgɔn faamubaliya jamanakuntigi fila ninnu cε, ani u ka jamanadenw cε, Faraɲɔgɔnkan daga walola wakawu, san 1960 utikalo tile 19 sufε, k’a dugu jε a tile 20 na. Sεnεgalikaw ye Modibo Keyita n’a jεɲɔgɔnw minε k’u kε tεrεn kɔnɔ, fo Bamakɔ.
U kεlen k’u yεrε sɔrɔ o la, politikitɔn US-RDA ye lajεba balalen boloda. O senfε, u bεnna a kan, ka yεrεmahɔrɔnya ta, ka jamana tɔgɔ bɔ Sudan Faransε la, k’a da « Mali » la. o don ni bi cε, jamana in bε ka wele Mali. Pr ka fɔ la, daɲε « Mali » ye kuma fɔcogo yεlεmani ye. Lakaliw y’a jira, k’a bε « Manden » de kofɔ. Larabu sεbεnnikεla minnu ye Manden fanga tariku sεbεn, olu de ye jamana wele Mali la. Hali ni dɔw hakilila ye, ko Mali ye baji kɔnɔ mali tɔgɔ ye, faamuya sera min ma kosεbε, o ye Manden ye. O de yεlεmana ka kε Mali ye. Pr Amidu Tunkara ye hakililajigin kε, ko n’a fɔra « Manden », o ye jamana dɔ de ko ye. Jamana caman tun bε yen ; kεrεnkεrεnnenya la, Manden, Soso, Wasolon, Jitumun, ani dɔwεrεw. Wa, a jaana bεε tun maralen don masakε dɔ fε. Bεnbabilen Dunbiya
Dɔkala Yusufu Jara
Ŋununŋunun tun bɛ sen na a bɛ tile damadɔ bɔ. Furancɛlafanga gɔfɛrɛnaman y’a sɛmɛntiya alamisa utikalo tile 14 san 2025, ko lakananbaa ani siwili caman minɛna. Zenerali fila bɛ u cɛla, minnu tun b’a fɛ ka jamana fangabulonw dafiri, nka a ko ma se ka sira sɔrɔ ka da gɔfɛrɛnam.
Minisiriw y’u ka laadalatɔnsigi kɛ araba utikalo tile 13 san 2025 jamanakuntigiso la Kuluba. A ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo..
Wulikajɔ demokarasiko ani politikitɔn camanko la an ka jamana kɔnɔ, o cɛba dɔ taara i da. Kɔkankow ni diɲɛ tɔnbaw cɛ koɲɛnabɔ minisiri kɔrɔ Cɛbilen Daramɛ fatura kunun utikalo tile 12 Pari, Faransi faaba la k’a si to san 70 la bana kuntaala jan senfɛ. A ka denbaya de ye nin kunn.
Nun donna kunun, furancɛlafanga jamanakuntigi Zenerali darimɛ Asimi Goyita fɛ ; n’o ye faso ka san 2025 fɛɛrɛ tigɛlen ye, k’a ɲinin ka dɛmɛn don dɛsɛbaatɔ miliyɔn 2,3 la baloko la jamana kɔnɔ..
Lamɛnnen kɔ siɲɛ fɔlɔ la juma utikalo tile 1lɔ, minisiriɲɛmɔgɔ kɔrɔ Dr Sogɛli Kokala Mayiga welela kokura k’a lamɛn kunun faso nafoloko an’a wariko kɔlɔsili cakɛda fɛ, ka laban k’a lamara bolo kɔrɔ. Kunnafoni in dira a ka awoka Me Sɛki Umaru Konarɛ fɛ..
Minisiriw y’u ka laadalatɔnsigi kɛ araba utikalo tile 6 san 2025 jamanakuntigiso la Kuluba. A ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo..
