San o san ni mangoroko sera, i b’u tonnen ye suguw ni bɔlɔnw kɔnɔ fan bɛɛ fɛ Bamakɔ. I b’a dɔn ko mangoroko daminɛna. A bilennen ni geren, sannikɛlaw b’u sago woloma u la. Mangoro ye dunfɛn min ye, a man ka di feereyɔrɔ la kosɛbɛ. Mɔgɔw bɛ girin a kan. dɔw b’a feere, dɔw b’a san, dɔw yɛrɛ b’a bayɛlɛma. Sabalibugu sugu donda la Bamakɔ komini 5nan, mangoro tonnen bɛ sɔrɔ yen, jama b’a kunnan sanga ni waati bɛɛ la. I bɛ mangorokɛsuw ni mangorosegiw sigilen ye. Wa mangoro suguya caman b’a la : kɛrɛnkɛrɛnnenya la, Kɛnti de ca a la kosɛbɛ ; n’o ye nunkurununnnin ye. Ale man ka di mɔgɔ caman ye. Iriwini n’o ye denbilennin ye, o fana b’a la. Urukiyatu Jara ye mangoro feerela ye. Ale ko mangoroko waati sera ; o ye waati ye bɛɛ bɛ sigi ka min makɔnɔ. An y’a sigilen sɔrɔ a ka mangoro kunnan bɔlɔn furancɛ dɔ la parasɔli kɔrɔ, a bɛ ka mangoro kofɔ ka sannikɛlaw wele. Ale ka fɔ la, ɲinan mangoro ka di, wa a sɔngɔ ka nɔgɔ. Cɛkɔrɔba dɔ tun b’a la ka mangorow woloma segi kɔnɔ sanni kama. Nka ale ko mangoro bɛ ka bɔ, nka a da ka gɛlɛn fɔlɔ. Bamakɔ yan, mangoro tɛ dunfɛn dɔrɔn ye ; a donnen b’an ka laadaw kɔnɔ. Mangoro bɛ feere suguw ni bɔlɔnw kɔnɔ ani siradaw la. Mangoro feerelaw bɛ sigi yɔrɔ bɛɛ la, fo sannikɛla tɛ tɛmɛn yɔrɔ minnnu fɛ. Jiriden suguya minnu ka di mɔgɔw ye kosɛbɛ sunkalo kɔnɔ, o ye mangoro, namasa, lenburu, melɔn an’a tɔw ye. Musa Tarawele ye mangoro feerela ye Kalaban-kura sugu da la. A k’u bɛ yan o bɛ lɛrɛ 6 bɔ, wa sannikɛlaw tɛ ka kɔtigɛ. Don o don sannikɛlaw bɛ na ; a dɔw bɔyɔrɔ ka jan. U bɛ na mangoro ɲuman de nɔfɛ. SƆGƆNW TƐ KELEN YE- Musa ka mangoro bɛ bɔ Kulukɔrɔ mara kɔnɔ. A ka fɔ la, mangoroko ma daminɛ a ɲɛma kosɛbɛ, a tasara fana ka ca. O de kosɔn a da ka gɛlɛn fɔlɔ. O bɛ dɔw bila tɛrɛmɛnniba la ka laban k’a to yen ka taa n’u yɛrɛ ye. An bɛ waati min na (marisikalo dɔgɔkun filanan) mangoro den kelen sɔngɔ ye sefawari dɔrɔmɛ bi naani fo bi wɔɔrɔ ye. Mangoro den saba sara walima den duuru sara sɔngɔ b’a ta dɔrɔmɛ kɛmɛ na ka se kɛmɛ fila ma. Dɔrɔmɛ kɛmɛ bɛ fɔ mangoroden dɔw yɛrɛ la. Modibo Keyita tɔgɔla pankurunjiginkɛnɛ sira kɛrɛdaw la, fan bɛɛ b’a la ka kɛ mangoro feereyɔrɔw ye. Musokulu dɔw bɛ ye yen jiriw kɔrɔ mangoro feere la bolifɛntigiw ni sennamɔgɔw ma. Hali ni sannikɛlaw ka c, a caman bɛ mɛɛn tɛrɛmɛnni na ka da mangoro sɔngɔ cogoya kan fɔlɔ, ani ɲɛnawolomani. O sira in lakodɔnnen bɛ ni jiriden kɛnɛ feere ye san waati bɛɛ la. Sotigiw mana na ni mangoro ye denbaya kɔnɔ, o y’a damana nisɔndiya ye. Fatumata ye denbatigi ye min nana a ka mɔbili jɔ ka mangorow lajɛ. A ko denmisɛnnin caman jigi bɛ mangoro kan o cogo la u mansaw bolo. A ko ni mangoro bɔra kosɛbɛ, a da bɛ nɔgɔya. Bintu Jara fana ye denbatigi ye ; a ka fɔ la, mangoro ka gɛlɛn ɲinan kosɛbɛ fɔlɔ ka tɛmɛn san tɔw kan. Nka ko o t’u bali k’a san sabula a ka di denmisɛnninw ye so. Mangoro feerela dɔ ko dɔ faralen bɛ mangoro sɔngɔ kan ɲinan, wa mangoro ka di fana. Balamɔ caman tonnen tun b’ale kɔrɔ. A ko ni mangoroko kanpaɲi mɛɛnna sen na, a bɛ se ka kɛ sɔrɔdaba ye feerekɛlaw bolo an ka jamana kɔnɔ. Ni mangoro bɔra ka tɛmɛn nin kan, Bamakɔ dugu fan bɛɛ bɛ kɛ mangoro feereyɔrɔ ye. Mangoro minnu bɛ yen sisan, o caman bɛ bɔ Kulukɔrɔ mara kɔnɔ Manden komini na, ani Sikaso mara. Mangoro fanba bɛ bɔ Sibi ka Bamakɔ lasɔrɔ. Mangoro sɔrɔyɔrɔba ye yen ye. O de la kabini feburuyekalo daminɛ na, mangoro caman de bɛ bɔ yen ka na Bamakɔ. Sibi ni Bamakɔ cɛ ye km60 ɲɔgɔnna ye Lajinɛ sira kan. Mangoro bɛ bɔ o laminiw fana na ; i n’a fɔ Bankumana, Karan, Narenna, Samaya, adw). Dɔkala Yusufu JARA Makan SISƆKƆ
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
