Minisiriw
y’u ka laadalatɔnsigi kɛ araba ɔkutɔburukalo tile 22 san 2025 jamanakuntigiso
la Kuluba, a ɲɛmɔgɔya tun bɛ furancɛlafanga jamanakuntigi Zenerali darimɛ Asimi
Goyita bolo.
Don baara bolodalenw fɛsɛfɛsɛlen kɔfɛ minisirilajɛ :
- jɛnna ni sariya poroze dɔ ye ;
- ka mɔgɔ dɔw sugandi ka bila jɔyɔrɔ dɔw la ;
- ani ka kumaɲɔgɔnyaw lamɛn.
SARIYAKOW DAKUN NA
Ka kɛɲɛ ni kiiriko, hadamadenw ka hakɛw labatoli ni jamana taamasiyɛnw marali minisiri ka
laselisɛbɛn kɔnɔko ye, minisirilajɛ jɛnna ni dekere poroze dɔ ye min bɛ notɛri
ka kɛtaw latɛmɛnni dantigɛ.
Notɛri ye mɔgɔ yamaruyalen ye forobako la ani minisirisow la min tɛ wuli ka
bɔ a jɔyɔrɔ la, ɲɛnamaya baara don. Ɔrɔdonansi n°2013-027/P-RM min tara desanburukalo
tile 31 san 2013 o bɛ notɛriw ka koɲɛw dantigɛ, u ka baaraw kɛcogo, n’u tɛ yen
ani u ka kɛtaw latɛmɛnni.
O ɔrɔdonansi kɔnɔko waleyali hukumu kɔnɔ notɛriw ka jɛkuluba hakilila
ɲininnen kɔfɛ, dekere poroze min tara ni jɛn kɛra n’o ye, o bɛ Mɛtiri Seyini
Sana JARA Bamakɔ, o ka baara yɛlɛma Kucala.
MƆGƆ DƆW SUGANILI KA BILA JƆYƆRƆ DƆW LA DAKUN
Minisiilajɛ ye nin mɔgɔw sugandi ka bila nin jɔyɔrɔw la :
LAFASA NI SƆRƆDASI KƆRƆW MINISIRISO
- Sɔrɔdasiw ka basigi ɲɛmɔgɔ : Zenerali de Birigadi Sanbu Mɛnkɔrɔ JAKITE.
- Lakananbaaw ɲɛmɔgɔ-dankan : Zenerali de Birigadi Elize Zan DAWO.
- Dugumakɛlɛcɛw ɲɛmɔgɔ-dankan : Zenerali de Birigadi Tumani KƆNƐ.
KUMAƝƆGƆNYAW DAKUN
1. Kɔkanmalidenw ni Afiriki donɲɔgɔnna
minisiri ye minisirilajɛ ladɔnniya kulubaara ka lajɛ 12nan bɛnkanw na min kɛra
tungarankew labaaracogo jugu kan ɔkutɔburubalo tile 9 ka se a tile 10 ma san
2025, Wiyɛni Otirisi faaba la.
O lajɛ 12nan in masalakun tun ye : « sariyakow ni disidakow taabolo tungarankew
labaarcogo jugu la », a b’a ɲinin ka dɔ fara diɲɛ jɛkabaara fanga kan ani
jamanaw fanga kan tungarankew labaaracogo jugu kɛlɛli la, k’u ka hakɛw lakanan.
Minisiriw, sariyakow dɔnbaa ŋanaw, lasigidenw ani diɲɛ jɛkuluw ka cidenw tun
b’a kɛnɛ kan ka hakilila falenw kɛ tugarankew labaaracogo jugu kɛlɛli baara
waleyataw la.
Kɔkanmalidenw ni Afiriki donɲɔgɔnna minisiri ka kɔrɔfɔ kɔnɔ, a y’a jira ko Mali
cɛsirilen don tugarankew labaaracogo jugu kɛlɛli fɛ, ani ka hakililajigin kɛ o
hukumu kɔnɔ, ko bɛn kɛra sariya dɔ kan mɔgɔw labaaracogo jugu kɛlɛli la ani
waleya jugu fɛn o fɛn, faso ka tungafɛtaa politiki, ka fara tugarankew
labaarabaa juguw ni hadamadenw ka hakɛw labatobaliw gɛrɛnntɛli kulu dɔ sigili la
senkan.
Baaraw kuncɛtɔ la, laɲinin caman kɛra, kɛrɛnkɛrɛnnenya la jamanaw ka
sariyaw mabɛni, dɔ farali jamanaw cɛ ani marayɔrɔ jɛkabaara fanga kan, tugarankew
lakananni ani yɛlɛma ɲuman donni dancɛw tɔpɔtɔcogo la. Minisiri ye lajɛ kɛ ni
AES mɔgɔ sigilenw ye Otirisi.
2. Izininko ni jago minisiri ye minisirilajɛ
ladɔnniya ladiyalifɛn dili la Mali ma « Awards Suguya OAPI » lajɛba
5nan senfɛ ɔkutɔburukalo tile 8 ka se a tile 10 ma san 2025, Liberewili Gabɔn
faaba la.
Nin lajɛ 5nan in masalakun tun ye : « Suguya, sinsinnan don cakɛdaw seko la
», a bɛ Afiriki cakɛdaw jansan, minnu ye waleya ɲumanw kɛ ni ko kuraw labaarali
ye tigiya hukumu kɔnɔ dɔ farali la sangaɲɔgɔnma fanga kan ani u tɔgɔ bɔli ka
taa a fɛ Afiriki suguba la.
Diɲɛ jalatigɛlaw y’a jira ko Awards Suguya OAPI ladiyalifɛn, n’a bɛ wele Gabɔn
jamanakuntigi tɔgɔla ladiyalifɛn, o ka di « sosiyete Pilasitiki e Elasitomɛri
di Mali » ma, o min bɛ matelamusiw dilan n’a ka taamasiyɛn DODO ye.
Nin ladiyalifɛn in bɛ cakakɛda in ka dɔnniya lakodɔn, ko kura ani « sosiyete
Pilasitiki e Elasitomɛri di Mali » ka timinandiya, ni taamasiyɛn kologɛlɛn
lakanannen dilanni ye, k’a ka baara ɲuman jira Afiriki kɔnɔ tɔndenjamana 17
cɛla tigiyako nasira la, ni mɔgɔ miliyɔn 200 ni kɔ b’a ka minɛnw labaara.
Nin ladiyalifɛn in bɛ Mali ka taamasiyɛn tɔgɔ labɔ kosɛbɛ, ka kɛnyɛrɛye
cakɛda in jira diɲɛmaa na ani foroba politikiw kɛcogo ɲuman minnu sigira senkan
izininko sangaɲɔgɔnma ɲɛtaa la ani Mali taamasiyɛnw donni ba la marayɔrɔ suguw
la ani diɲɛ suguba yɛrɛ la.
3. Kɛnɛyako ni hadamadenya yiriwali minisiri
ye minisirilajɛ ladɔnniya banako cogoya la jamana kɔnɔ, kɛrɛnkɛrɛnnenya la dɔ
farala sumayaba ka mɔgɔ minɛnen hakɛ kan ka sanga ni dɔgɔkun tɛmɛnnen in ta
cogoya ye.
Furancɛlafanga jamanakuntigi b’a ɲinin jamanadenw fɛ, dabali minnu tigɛra
banaw kunbɛnni ani u kɛlɛli kama, k’olu labato a ɲɛma.
Gɔfɛrɛnaman sekeretɛri zenerali
Esɔri
sɛbɛnnijɛkulu
Dɔkala Yusufu
JARA
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
