Kunun tile daminεyanfan fε, Banba Gawo mara la, Mali sɔrɔdasiw ni kojugubakεlaw karila ɲɔgɔn na. Hali ni jate ma sɔrɔ o kow kan fɔlɔ, a bε mɔgɔ hakili jigin u ye binni min kε baton « Tumutu » kan ani Banba sɔrɔdasiw dagayɔrɔ kan Guruma-Ararusi ; mɔgɔ 64 ni tora o la. Nka sɔrɔdasiw labanna ka ta da u kan, u mɔgɔ 50 ni kɔ tora sisi la.
Sɔrɔdasiw y’o bɔrɔntɔli min da kojugubakεlw kan, o kεra sababu ye k’u jolo kari kosεbε. Jigilatigε kojugubakεla ninnu ɲεnacin ka kε sigidalamɔgɔ siwiliw de kan sisan. Wa dεmεnbaa b’u la dansagonwale ninnu na. Diɲεmaa bεnna hadamadenw ka hakεw labatoli sariya minnu kan kεlε kɔnɔna na, o tε ka bɔ a sira fε kojugubakεla ninnu fε. Kasɔrɔ Mali sɔrɔdasiw bε sira ɲuman kan o la. U tε k’u bila kojugubakεlaw fε mɔgɔ lebu jirali la.
Kojugubakεlaw ta kεra sa, ka mɔgɔw gosi u hakili la. Nka u b’u yεrε sεgεn. Mali sɔrɔdasiw fana jεnnen don u ni kɔ jamana kunmabɔli kεlε kama. U t’a fε abada, jamanaden tɔw ka dannaya ta ka bɔ u kan. U k’u b’u faso lakanan a ka se k’a ka yεrεmahɔrɔnya yεrεyεrε sɔrɔ.
KOW YE KOTIGI TA YE – Mali sɔrɔdasiw ka wulikajɔ bεε kun ye kojugubakεlaw mana u kun bɔ jamana fan o fan fε, ka tasuma da u tεgε. U kεlen ka baton « Tumutu » bon ni mugu jugu ye, u ye caman fana kerun Tumutu pankurunjiginkεnε kan, fo ka pankurunw taakasegin sennasumaya kosεbε. Lere fana ɲangatara u fε Tumutu mara kelen in kɔnɔ, ka Burεmu fana ɲangata Gawo mara kɔnɔ, fo ka se Gawo yεrε n’a dafεlanw ma. U ka tɔɔrɔ sera nin bεε ma.
O t’a bεε ye : sεtanburukalo tile 27 sɔgɔmada la, sɔrɔdasiw ni kojugubakεlaw karila ɲɔgɔn na Asarani. O ni Tumutu cε ye km35 ɲɔgɔnna ye tilebin fε ka digi woroduguyanfan kan. O don kelen fana na, nεgε kanɲε 20 waati la, sɔrɔdasi minnu dagalen don Muruja, olu fana n’u karila ɲɔgɔn na. Nka binkanni ninnu si janjo ma diya u la.
Tuma min na u y’a ɲinin ka kɔsegin ka na u ka suw tɔmɔ Muruja, tiga ma don fana na na. An bε waati min na kotigi ta y’a ka ko ye a kεlεdaga bεε la.
Sεtanburukalo tile 28, kojugubakεlaw binna Jura sɔrɔdasiw dagayɔrɔ kan Tenεnkun sεrεkili kɔnɔ. O juguyara kosεbε. Pakurunw ye tasuma jigin o caman kan, tɔw y’u yεrε ta. Kojugubakεlaw ka nin binkanniwale bεε b’a la ka kε Minusima taali kɔnɔ ka Mali bila.
Minusima dun ka kan ka bɔ pewu Mali kɔnɔ yanni desanburukalo tile 31 san 2023 ka tεmεn ; wa Mali sɔrɔdasiw b’u bɔcogo kɔlɔsi ; sabula n’u bɔra dagayɔrɔ min na, olu bε sigi yen. Bεri, Tumutu mara la, o dagayɔrɔ de sɔrɔli kεlε bunna kosεbε sɔrɔdasiw ni kojugubakεlaw an’u dεmεnbaaw cε.
A bɔra da o da fε, furancεlafanga jamanakuntigi ka fɔ la, diɲε tɔnba ka basigi sabatilijεkulu ye sariya 2690 min ta Minusima bɔliko la Mali kɔnɔ, Mali b’o kɔ a ka jamana kelenya sɔrɔli la, min b’a to a bε se ka hadamadenya sabatiyɔrɔw sigi u nɔ na jamana kɔnɔ. Kolonεli Asimi Goyita fε, sɔrɔdasiw jεnsεnni jamana fan bεε fε, o b’a to u ka se ka nɔbɔ kojugubakε kεlεli a ɲεma.
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.
