Burukina Faso minisiri y’a jira ko poroze dɔ bɛ sen na AES kɔnɔ, min b’a to a jamanadenw bɛ se ka kumaɲɔgɔnyaw kɛ fu la Numerikiko tako filanan dɔgɔkun kelen kuncɛli hukumu kɔnɔ alamisadon zuwɛnkalo tile 29 san 2024, o min daminɛna zuwɛnkalo tile 25 ka se a tile 27 ma, furancɛlafanga jamanakuntigi Kolonɛli Asimi Goyita ye AES nafoloko minisiriw bisimila jumadon : N’o ye Mali nafoloko minisiri Alihamudu Agi Iliyɛni, Burukina Faso ta Madamu Aminata Zɛriko ani Nizɛri ta Sidi Mohamɛdi Araliyu ye. Ɲɔgɔnye kuncɛlen, Nizɛri nafoloko minisiri ka fɔ la, u bisimilala jamanakuntigi fɛ. A ko u tun taalen bɛ foli di a ma u weleli la AES tɔgɔ la, ka na numeriki dɔgɔkun kelen tako filanan kɛnɛ kan, ani k’a fo tuguni a ka jatigiya kɛcogo ɲuman na ka ɲɛsin u ma a kuntaala kɔnɔ. A k’u da sera numeriki nafaw ma ni furancɛlafanga jamanakuntigi Kolonɛli Asimi Goyita ye, ka sɔrɔ ka foli di a ma u senkɔrɔmadonni na. Minisiri ninnu ye jamanakuntigi ka dɛmɛn sɔrɔ, walasa ka se ka numeriki don yiriwali ko bɛɛ la, min b’a to nafoloko ni basigi ɲɛtaa ka sabati. Fosi tɛ se ka kɛ numeriki kɔ bi ; a kɛra basigiko ye walima lafasa, nin bɛɛ sirilen bɛ numeriki la. Jamanakuntigi saba ninnu ye u fanga farali min kɛ ɲɔgɔn kan basigiko la AES kɔnɔ, u da sera o nafa ma. Sabula a k’a bɛ an bila k’an jɔyɔrɔ fa, ka da an yɛrɛ la. A ko an yɛrɛ y’a kɔlɔsi, AES denmisɛnw b’a la ka wulikajɔ minnu kɛ, o b’an jigi sigi yɛrɛmahɔrɔnyako la. A ko n’an taara nin bolo kan, a ka ca a la, wasa bɛ sɔrɔ don dɔ la. Burukina Faso nafoloko minisiri ye hakililajigin kɛ. A ko kabini nowanburukalo tɛmɛnnen in, olu ka jamana sera k’u ka numeriki dɔgɔkun kelen wulikajɔ tako 18nan kɛ ; u ye Mali ni Nizɛri wele o kɛnɛ kan. A k’u ye baara kɛ laɲininsɛbɛn dɔ labɛnni kan, min b’a to u bɛna se k’u fanga fara ɲɔgɔn kan cogo min na yɛlɛmani na numeriki kan ; sabula k’o bɛna kɛ sababu ye ka sira dayɛlɛ ko tɔ bɛɛ ye. A ka fɔ la, dakun caman b’o laɲininsɛbɛn in kɔnɔ, wa ko AES jamanakuntigi bɛɛ ka senkɔrɔmadon b’u ye a la. Fangaw farali ɲɔgɔn kan numerikiko la, o forobayɔrɔw jɔli kɔfɛ, Kow ɲɛdɔnbaa ŋanaw seko fana farali ɲɔgɔn kan AES kɔnɔ, o ɲɛsigilen don laɲinisɛbɛn in kɔnɔ. O b’a to u ka se ka hakilijakabɔ kɛ an ka gɛlɛyaw kan ka jɛ ka fura jɔnjɔn ɲinin u la, ka kalanw boloda ani ka denmisɛnw bilasira. O bɛɛ kun ye o waleyaw ka se k’u jɔyɔrɔ fa furancɛlako in kɔnɔ sanni yɛlɛma bɛ kɛ numerikiko kan a ɲɛma AES kɔnɔ. Burukina Faso nafoloko minisiri in y’a jira ko poroze dɔ bɛ sen na AES kɔnɔ, min b’a to jamanadenw bɛ se ka kumaɲɔgɔnyaw kɛ fu la u taayɔrɔw la. Baba Kulubali Dɔkala Yusufu JARA
Dɔkala Yusufu Jara
Sports.
Retour de l'Administration à Kidal.
Sports.
Concours fonction publique.
Vente de carburant.
Vente des produits phytosanitaires.
