Mali ni Komɔri bɛ ɲɔgɔn sɔrɔ marisikalo tile 20 san 2025 Bɛrikani ntolantankɛnɛ na, ka Santarafiriki kunbɛn Kasabilanka, kupudimɔni san 2026 ɲɛbila ntolantanw tile 5nan ani 6nan hukumu kɔnɔ. Balontan fila in bɛna kɛ yɔrɔ wɛrɛw la (Marɔku) sabula balontankɛnɛ tɛ jamana fila in si la, saratiw dafalen bɛ min na Afiriki jamanaw ka balontan tɔnba (CAF) ɲɛkɔrɔ. Mali Sɛgɛw farali ɲɔgɔn kan, o daminɛna karidon Marɔku. Degelikaramɔgɔ ka fɔ la, o bɛ balontannaw lafiya ka tɛmɛn ɲɔgɔn makɔnɔni kan Bamakɔ ka sɔrɔ ka wuli ka Marɔku sɛgɛrɛ. O sira ka jan a degun ka bon. Tɔmu Sɛnfiye ye nin kunnafoni in lase kunnafonidilajɛ senfɛ sibiridon, ka laban ka balontanna 25 kofɔ a ni minnu bɛna taama in kɛ balontan fila in kama. Sibiri su k’a dugu jɛ kari la, degelikaramɔgɔ, ɲɛmɔgɔkulu mɔgɔ tɔw ani jɔkɔlɔsila fila (Jigi jara Tanzani (Young African) ka fara Yusufu Koyita (Joliba) kan ani cidenkulu mɔgɔ tɔw wulila Bamakɔ k’u kunda Marɔku kan. U sera Kasabilanka nɛgɛ kanɲɛ 5 masurunna na. U ye lafiɲɛbɔ ta yen lɛrɛ 10 kuntaala, ka sɔrɔ ka wuli ka Ujuda magɛn Marɔku kɛɲɛkayanfan fɛ ka digi kɔrɔn kan, u ni Alizeri dancɛ la, ka jabaaya don yen Lotoli Aradisɔni Sayidiya la. O sayidiya in fana ye Bɛrikani dafɛdugu dɔ ye. Kari su k’a dugu jɛ ntɛnɛn na, balontanna kɔnɔntɔn y’u sɔrɔ yen. N’o ye jɔkɔlɔsila Isimayɛli Jara Jawara (Sirius, Suyɛdi) kɔfɛmɔgɔw Sɛki Umaru Konate (Clermont Foot, Faransi), Siku Ɲakate (Braga, Pɔritugali), Abudulayi Jabi (Saint-Gall, Suwisi), Musa Jara (Alaves, Ɛsipaɲi), cɛmancɛmɔgɔw Aliyu Jɛngi (Al Kholood, Arabi Sawuditi), Lasana Kulubali (Lecce, Itali), ɲɛfɛmɔgɔw Ibarahima Kɔnɛ (Al Okhdood, Arabi sawuditi) ani Mamadu Kamara (Laval, Faransi). Ntɛnɛndon balontanna fila wɛrɛ taara fara u kan, n’o ye kɔfɛmɔgɔ Mamadu Fofana (New England Revolution, Etazuni), cɛmancɛmɔgɔ Mohamɛdi Kamara (Al Sadd, Katari) ani ɲɛfɛmɔgɔ Seku Koyita (CSK Moscou, Irisila) ani Yusufu Ɲakate (Bani Yas, Etazuni). Ni nin balontanna 15 ye, degelikaramɔgɔ Tɔmu Sɛnfiye y’a ka farifoni fɔlɔ kɛ ntɛnɛn su nɛgɛ kanɲɛ 21. Jigi dalen b’a tɔ seli kan bi tarata kupudimɔni san 2026 ɲɛbila ntolantan tile 5nan ni 6nan balontanw kama, fo ka farifoni filanan kɛ. An bɛ waati min na, an m’a mɛn fɔlɔ ko mɔgɔ ye walan sɛmɛn taali la. O b’a jira ko Tɔmu Sɛnfiye bolo bɛ sɔn ka da a ka 25 welelen bɛɛ kan ka Komɔri kunbɛn alamisa Bɛrikani. Hakililajigin na, tile naani balontan kɔfɛ, Komɔri de bɛ ten kan fɔlɔ kulu I in kɔnɔ ni kuru 9 ye, Gana dalen b’o kan ni kuru 9 fana ye, Madagasikari dalen b’o kan ni kuru 7 ye. Mali dalen b’o kan ni 5 ye, Santarafiriki dalen b’o kan ni kuru 4 ye, k’a laban ni Cadi ye kuru 0. Dɔkala Yusufu JARA Umaru SANKARE
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
