Mali kɛlɛbolow bɛ k’u labɛn ka don Kidali, bɛn ni lafiya sabatili kama

Mali sↄrↄdasiw bɛ ka pankurunw ni doroniw wuli k’u jↄ, bawo yↄrↄ in bɛ banbaanciw n’u jɛɲↄgↄn terorisiw bolo bi.

Mali kɛlɛbolow ka kunnafonidicakɛda, DIRIPA/DIRPA y’a jira, taratadon, nowanburukalo tile 7, ko kojugukɛlaw kↄlↄsili hukumu kↄnↄ, sanfɛkɛlɛkɛfɛnw ye banbaanciw bon siɲɛ caman, k’u ka bolifɛnw ni maramafɛn caman bↄ baara la : kɛlɛkɛmobili belebele fila b’o la, Minusima taara ka minnu to yen, ani kɛlɛkɛmobili fitinin caman wɛrɛw minnu bɛ wele pikↄpu/ pick-up.

O kɛlen minkɛ, terorisiw wulila n’u ka dabaliw ye, ka kunnafoniw ni jaw bila bↄlↄlↄsiraw kan, k’a jira ko denmisɛnnin caman tora Mali ka bonni ninnu na ani Kidali mↄgↄba dↄw. U bɛ k’a jira diɲɛmↄgↄ la, ko Mali finitigiw bɛ ka firi Kidali kan, k’a kɛ fiyentↄbere ye ani nijuguyawale damadama kasↄrↄ tiɲɛ tɛ.

Tiɲɛ ye min ye, o ye k’a fↄ ko Minusima dagayↄrↄ fɛn o fɛn tun bɛ kↄrↄn fɛ, sango Anefisi ani Tesaliti, banbaanciw n’u jɛɲↄgↄn terorisiw tun y’olu bɛɛ minɛ Minusima taalen kↄ. Kɛlɛbaw de kɛra Mali finitigiw fɛ walasa k’o yↄrↄ ninnu minɛ. Kidali ta in fana b’a fɛ ka kɛ o ɲↄgↄnna de ye. Nka Kidali ta wulikajↄ fanga bɛ sↄn ka bonya ni yↄrↄ tↄw ta ye, bawo ale tun ye Minusima dagayↄrↄba ye. O bↄlen kↄ yen,  Minusima y’a dagayↄrↄ bila Kidali k’a sↄrↄ a ma Jamana yɛrɛmaↄrↄnyalenw ka tↄnba (ONI/ONU) ka sariya 2690 nan labato. O sariya in b’a yamaruya dagayↄrↄ in ka latɛmɛ Mali ma fↄlↄ, o kↄfɛ, u bↄli in kɛcogo bɛ kↄlↄsi Mali sↄrↄdasiw fɛ walasa balannako si kana ye a la.

Mali kɛlɛbolow bɛ k’u labɛn ka don jamana marabolo 8 nan kↄnↄ, n’o ye Kidali ye, ka kelenya ni badenya sabati. O kosↄn, u ni Kidalika caman bɛ ɲↄgↄn fɛ, minnu b’a fɛ ka na u sigi u faso la.

Aboubacar TRAORE / Mahamadu KƆNTA