Jamanakuntigi Goyita, ɲininkaliw kɔnɔna na
Marisikalo tile 26 san 1991- marisikalo tile 26 san 2024. A san 33 dafa ye nin ye an ka jamana y’a ɲinin ka don demokarasifanga taabolo la, o min sɔrɔla kεlεba kɔnɔ, fo fasoden dɔw ni tora a la. Walasa ka taasibila ɲεsin o demokarasi sɔrɔli seyidusuw ma, jamanakuntigi Kolonεli Asimi Goyita ye jirifeere da u taasibilayɔrɔ kan kunun sɔgɔma.
Minisiriɲεmɔgɔ Dr Sogεli Kokala Mayiga, bulonba kuntigi Kolonεli Maliki Jawu, fangabulonw ɲεmɔgɔw, kεnyεrεye maraɲεmɔgɔw, gɔfεrεnaman minisiriw, lasigiden minnu bε Mali kɔnɔ, maraɲεmɔgɔw, politikiɲεmɔgɔw ani Bamakɔ laadatigiw, nin bεε tun bε kεnε kan. Mɔgɔ minnu ka wulikajɔ fanga bonyana kosεbε san 1991 koɲεw na demokarasi ani politiki camanko la, o caman fana tun bε kεnε kan.
Jamanakuntigi Kolonεli Asimi Goyita selen kεnε kan, a kεlen kɔ k’a suuli darapo kɔrɔ faso fasa datɔ, a sinna seyidusuw taasibilayɔrɔ la ka jirifeere da o kan fanfari nasiyonali ka suburu mankan kɔrɔ. O kɔfε a ye waati di kunnafonidilaw ma ɲininkaliw la. A y’a jira ko nin y’ale ka kεta ye seyidusuw tɔgɔladon san 33nan laɲεnamayali hukumu kɔnɔ, ka taasibila kε ka ɲεsin u ma, olu minnu sababu la, Mali donna demokarasifanga taabolo kɔrɔ hεrε ni tilennenya kama.
Kolonεli Asimi Goyita bolo, don kεrεnkεrεnnen in laɲεnamayali dɔrɔn ko tε ; a bε dabɔ Mali demokarasi kεlen kɔ ka san 33 sɔrɔ, k’o kiimε. O b’a to an k’a dɔn an bε dakun min na a kow la, ani ka sinikow boloda ni sεbε ye. Jamanakuntigi y’a sinsin donba in kan, ka foli di Maliden musoman ni cεman bεε ma u ka muɲun ni sabali la gεlεyaw kɔrɔ, ka laban k’a ɲinin u fε halibi, an ka fara ɲɔgɔn kan ka taa a fε Maliko la.
Marisikalo tile 26 laɲεnamayali bεnna ni sunkalo ye, mɔgɔw mako bε jɔ dunfεn kεrεnkεrεnnenw na kosεbε o waati la. O siratigε la, a ye foli lase gɔfεrεaman ani julaw ma dabali umanw tigεli la, min b’a to o fεn ninnu tε dεsε Mali kɔnɔ ani suguw la. A ye Ala fo k’a barikada ani k’a deli a k’a ka hinε ni makari se seyidusu ninnu ma.
Jedone JAMA et
Dɔkala Yusufu Jara
Vente de carburant.
Vente des produits phytosanitaires.
Sport/football.
Terrorisme à Kita.
Salon des armements.
Annulation du pèlerinage.
