Yanni ka Mali darapo yεlεn jumadon sεtanburukalo tile 22, jamana ka yεrεmahɔrɔnya sɔrɔli san yεlεma 63nan kama, sirabakan kasaara juguba kεra Bugunin. Nin laseli in kεra siwiliw lakananni cakεda fε Bugunin. Taamakεjεkulu min bε wele « Jalo taransipɔri », o kaareba dɔ tun bε boli dantεmεn na (RN7) kan, ka bɔ Sikaso fan fε. A ye sira bila pewu ni hakε min ye, o janna ni mεtεrε kεmε ye. Wa fεn o fεn tun b’a ɲε o furancε kan, a y’a bεε fofo a nɔfε, ka taa a dafiri.
Mɔgɔ caman ni tiɲεna. Naani tora yɔrɔnin kelen. Kelen ka joginda ma ku o la, o fatura kεnεyaso la. Mɔgɔ 38 minnu ta kεra joginni ye, o tilancε jogincogo ka jugu kosεbε. U cεra ka se Bugunin kεnεyaso la. Kasaara in kεra yɔrɔ min na, o ni Mono babili cε man jan. Bugunin gɔfεrεnεri Zenerali Keba Sangare taara a ɲε da kasaara in kεyɔrɔ kan, ka laban ka dεmεn don u la.
Maraɲεmɔgɔ wεrεw ni politikimɔgɔw tun b’a nɔfε nin waleya in na, ka fara lakananbaa dɔw kan. A ye dugawudon kε ka ɲεsin fatulenw ma, ani ka nɔgɔyada kε joginnenw ye. Gɔfεrεnεri y’a jira mɔbilibolilaw la, u k’u jilaja k’u ka baara in kε hadamadenya lakananni kɔnɔ, ka foli lase Bugunin siwiliw lakananni cakεda ma u teliyali la k’u wasa don mɔgɔw la. Dugumɔgw fana sεbεkɔrɔ fora mɔgɔ joginnenw dεmεnni na.
Boli dantεmεn ani k’a ɲinin ka tεmεn tamako cakεda wεrε ka mɔbili dɔ la, ka taa mɔgɔ tataw ɲinin ɲεfε, o natalaboli de bεna ni kasaara ye an ka siraw kan. U tε ɲε u ka karatɔya kɔ, u bε taamadenw bɔnε u ni na ten fu.
Basigi sabatili siraw kan, o dɔgɔkun kelen kuntaala lafaamuyali kεra o ma mεεn fɔlɔ. A tun jirala o senfε, ko an ka siraw bε fagali kε, lafaamuyaliw n’u ta bεε, taamako ani sirako minisiriso fε.
Baba Haribεri Ture
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
