Basikɛtikɛtɔn fila ninnu bɛna Afiriki jɔyɔrɔ fa u ka kupudimɔni kɛnɛ kan ; Nizeirya ni Kameruni fana bɛ kɛ yen
Afiriki masamusow n’a masakɛ kuraw kɔseginna so. U donna Bamakɔ ntɛnɛndon sɛtanburukalo tile 16,
lɛrɛ 24 Aforobasikɛti Afirikidisidi san 2024 kupuw
talen kɔfɛ, jama bɔra k’u kunbɛn ni bonya ye. Minisiriɲɛmɔgɔ
Dr Sogɛli Kokala Mayiga tun bɛ kɛnɛ kan, ka fara
minisiri 13 kan ; kɛrɛnkɛrɛnnenya la mara ni desantaralizasɔn minisiri Kolonɛli Abudulayi Mayiga. Mali
cidenkulu ɲɛmɔgɔya tun bɛ denmisɛnya ni farikoloɲɛnajɛ minisiri ka ɲɛsin fasodenya ladamuni ani
fasodenɲuman
dilanni Abudulu Kasimu Ibarahimu Fɔnba
bolo
U18 musow n’a cɛw ka pankurun cunna Modibo Keyita tɔgɔla pankurunjiginkɛnɛ na
Bamakɔ-Senu nɛgɛ kanɲɛ 14 tɛmɛnnen ni sanga 30 ye. Mɔgɔ minnu b’u to sanfɛ ka farikoloɲɛnajɛw kɛ, olu tun b’u cɛla. Sabula olu tun taalen b’u tɔgɔla kupu Afiriki ŋanaɲinin tako 18nan janjo la Kɛri, Eziputi faaba la sɛtanburukalo tile 13 ka se a tile
15 ma. I n’a fɔ Mali
basikɛtitɔn fila cogoya la, o farikoloɲɛnajɛkɛla ninnu fana ye kunkɔrɔta sɔrɔ u ka ŋanaɲinin na ; u ye dedayi
sanunama saba sɔrɔ.
Minisiriɲɛmɔgɔ k’a wasara ni jaabi sɔrɔlenw ye kulu fila bɛɛ fɛ, minnu tun bɛ Afirikidisidi ani Kɛri. A k’u ye fasojama kunnawolo
farikoloɲɛnajɛko la. A k’u wasara ni yɛlɛda dili ye Malidenw ma. Ko denmisɛnw bɛ ka sebaayaw sɔrɔ u ka ko kɛtaw la i n’a fɔ lakananbaa minnu filɛ k’u yɛrɛ di faso kunmabɔli kɛnɛ kan. Minisiriɲɛmɔgɔ ko nin y’a siɲɛ fɔlɔ ye Aforobasikɛtiko la, jamana kelen ka wuli k’a
jɔ ni kupu
fila ye ɲɔgɔn fɛ. A fɔlɔ kɛra Mali ye muso kunda ani cɛ kunda. Mali cɛw n’a musow sera ka Afiriki basikɛtikɛ jamanabaw gosi ka kupu ta olu ɲɛkɔrɔ, n’o ye Nizeriya ni Kameruni ye.
A ko an wasara ni sanfɛ
farikoloɲɛnajɛkɛlaw fana ye. U bɔra ni medayi sanunama saba ye Kɛri. A ko ni denmisɛnya bɛ sebaaya sɔrɔ, o b’a ka jamana taa ɲɛ.
Bisimilali kɔfɛ, Eziputi ni Afirikidisidi ŋanaw ye farikoloɲɛnajɛsoba « Salamatu Mayiga » sira ta, jama tun b’a la k’u makɔrɔ yen. Mali fasa dalen kɔfɛ, kulu kunbɛnnen fila ninnu y’u ka dantigɛliw kɛ. Denmisɛnya ni farikoloɲɛnajɛ minisiri ka ɲɛsin fasodenya ladamuni ani fasodenɲuman dilanni ma Abudulu Kasimu Ibarahimu Fɔnba ye kɔrɔfɔ kunkurunnin lase. A k’a jira ko nin y’a siɲɛ fɔlɔ ye tariku kɔnɔ, Mali ka nin ɲɔgɔnna koba fila kɛ. A ko nin sebaayaw sababu bɔra furancɛlafanga ɲɛmɔgɔw ka cɛsiri la ka wari don ɲɔgɔndanbaw dafɛ, gɛlɛyaw n’u ta bɛɛ.
Minisiri ye foli ni tanuni lase Mali basikɛti tɔnba (FMBB) ma, ka foli di basikɛtikɛla cɛman ni musoman an’u bilasirabaaw
ma. FMBB ɲɛmɔgɔ Me Zan Kulodi Sidibe ye foli
lase farikoloɲɛnajɛkɛla ninnu ma, ka foli di federazɔn jɛɲɔgɔnw ma ani ka foli di denmisɛnya ni farikoloɲɛnajɛ minisiriso ma. A ko bɛɛ y’a jɔyɔrɔ fa nin ko la. Wa k’u kunbɛncogo bɛnna u ma kosɛbɛ, hali n’u tun ma sigi n’a ye nin
cogo in na.
U18 musow an’a cɛw bɛna ye u ka kupudimɔni nata kɛnɛ kan k’u seko fana jira yen.
Dɔkala Yusufu JARA
Seibou Sambri Kamissoko