Minisiri Sanɔgɔ kɛwale bɛ gɔfɛrɛnaman hakilila kɔnɔ ka to jama kɛrɛfɛ
Nin taama in bɛ gɛrɛ ɲɔggɔnna kɔnɔ ani musow senkɔrɔmadonni gɛlɛya waati la. O cogoya in na, minisiri Jɛnɛba Sanɔgɔ bolo lankolon ma taa. A ni balow taara di musow ma. Balo tɔni seegin, malow ni ɲɔw ka bɔ muso, den ni denbaya ɲɛtaa minisiriso fɛ. U dira muso dɛsɛbaatɔw ma Sabalibugu, Woninda, Suguninkura ani Ɲamakɔrɔ Sugu-Kɔrɔ la. A dabɔra ka dɔ ta ka bɔ u ka degun fanga la, ani ka da u ka kologɛlɛya kan gɛlɛya in kɔnɔ.
Muso, den ni denbaya minisiri y’a jira ko a kɛwale in bɛ jamana ɲɛmɔgɔw hamina kɔnɔ, kɛrɛnkɛrɛnnenya la furancɛlafanga jamanakuntigi Zenerali darimɛ Asimi Goyita kuntilenna, ka to jama dafɛ, kɛrɛnkɛrɛnnenya la musow dafɛ. A ko nin taama suguya musow fanfɛ o bɛ dabɔ k’u haminankow dɔn, ani ka hakilila falen kɛ n’u ye u mako jɔnjɔnw kan, ka baara kɛtaw dantigɛ min b’a to yɛlɛma ɲuman bɛ se ka don u ka ɲɛnamaya kɛcogo la.
Madamu Jara Jɛnɛba Sanɔgɔ ko balodi in ye ŋaniya jira ye ani ka sugula musow ka cɛsiri lakodɔn u ye, k’a dɔn ko sigidalamɔgɔw sinsinnan ɲɛnamaw don. A y’u fo k’u waleɲumandɔn u ka don o don wulikajɔ la. A ye gɔfɛrɛnaman ka kandili lakuraya dɔ farali la u ka kologɛlɛya fanga kan ani musow ka hɛrɛ sɔrɔli la, ka hakililaw senkɔrɔmadon, minnu bɛ dɛmɛn don u ka senyɛrɛkɔrɔ la. A labanna ka wele bila kelenya ani ɲɔgɔndɛmɛn na, ka da a kan ko jamana kologɛlɛn jɔli, yɛrɛmahɔrɔn o sira dɔ ye musow ka senyɛrɛkɔrɔ sɔrɔli ɲɛtaa ye.
Mali suguw ka jɛkuluba (Cnam) ɲɛmɔgɔ Abudulayi Sise ye dɛmɛn in foli kɛ. Ka foli kɛrɛnkɛrɛnnen ɲɛsin jamana ɲɛmɔgɔw ma u ka cɛsiri tugulen na ka ɲɛsin jagokɛlaw ma. A y’a jira ko nin y’a siɲɛ fɔlɔ ye dɛmɛn ka ɲɛsin sugula musow ma ɲɔgɔndɛmɛn ni dɛnkɛrɛfɛ kɛlɛli kalo hukumu kɔnɔ. A ye hakililajigin kɛ, ko minisiri delila ka taa a ɲɛ da Suguninkura, Woninda ani Ɲamakɔrɔ Sugu-kɔrɔ kan.
A ye layidu ta fana, ko dɛmɛn min dilen filɛ, a bɛ se a seyɔrɔ la sugu kofɔlen ninnu musow ma. Musow yɛrɛ ye waleɲumandɔn foliw kɛ. Madamu Asetu Tangara ye Sabalibugu sugu musow ka tɔn ɲɛmɔgɔ ye, a y’a jira ko nin dɛmɛn in y’a siɲɛ fɔlɔ ye kabini u ka suguko daminɛna.
Wa ko balo ninnu bɛ sɔn k’a to u ka kalo damadɔ dunta sɔrɔ hakilisigi kɔnɔ. Mɔgɔ min ye dumuni diko kelen k’i ma, o ni foli ka kan. A k’u wasara ni muso, den ni denbaya ɲɛtaa minisiriso ka dɛmɛn ye yɛlɛma ɲuman donni na u ka ɲɛnamaya kɛcogo la ani ka dɔ fara u jɔyɔrɔ fanga kan jamana sɔrɔ, a hadamadenya yiriwali la.
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
