Ka kɛɲɛ ni
tajiko baarakɛlaw kɛwale ye, jago minisiri Musa Alasani Jalo ye sɔngɔ dantɛmɛn
yɛlɛnni in lagosili kɛ, o min b’a la ka kɛ cogoya saba la : ka ban ka esansi
feere, sɔngɔw yɛlɛnniba ani kunnafoni kolonw dili jamana labɔcogo kan esansi la
ka na ni hakiliwuli ye
Jago minisiri Musa Alasani Jalo (numan fɛ) ani Mali
jagoko soba ɲɛmɔgɔ Maju Sɛnpara
An ka jamana labɔli taji la o bɛ kɛnyɛrɛye cakɛdaw bolo. Bi, kɛnyɛrɛye cakɛdaw t’a la ka kuma nin
ko in kan. Se dun b’u bolo k’u fɛla di a kan faamuko ɲuman ka se ka sɔrɔ. O de
b’a to dannaya ka to u kan, ka sɔrɔko kannabila sɛmɛntiya. Jago ni izininko
minisiri Musa Alasani Jalo ye nin kuma in fɔ kunun kunnafonidi ani lafaamuyali
dɔ senfɛ ka ɲɛsin tajiko cakɛdaw ma Mali jago ni izininko soba ɲɛmɔgɔso la, o ɲɛmɔgɔ
Maju Sɛnpara ɲɛna.
A bɛ tile
damadɔ bɔ, tajiko gɛlɛya b’an ka jamana kɔnɔ. O de kosɔn julabaw ni jago
minisiri Musa Alasani Jalo ye lajɛ kɛ. A ka fɔ la, gɔfɛrɛnaman bɛ wulikajɔ la
min b’a to fura bɛ se ka sɔrɔ tajiko gɛlɛya in na jamanadenw ka lafiya ani sɔrɔ
jiidili kama jamana kɔnɔ. Wa o de kosɔn gɔfɛrɛnaman bɛ k’a kun don gɛlɛya in
kɔrɔ ni fura mabɛnnenw ɲininni ye a la. A fɔlɔ ye tɛmɛn bɛ se ka kɛ ni jamana labɔli ye taji la cogo min na. A filanan ye taji ladonbaaw an’a
dibaaw ka baara kɛtaw mabɛnni ye. A sabanan ye sɔngɔ sigilenw kɔlɔsili ye ka fara taji ladontaw cogoyaw
jateminɛni kan jamana fan bɛɛ fɛ.
Nin tajiko gɛlɛya in
bɛnna ni waati gɛlɛn ye an ka jamana kɔnɔ, ka da a kan binkannniw b’a la ka
caya kojugubakɛlaw fɛ, kɛrɛnkɛrɛnnenya la ka ɲɛsin izininw ma. Fo mɔgɔw k’o
waleya in gɛlɛyaw an’a nafaw dɔn ka bɔ ɲɔgɔn na jamana kan. Bi, kojugubakɛkuluw
b’a dɔn wa u y’a ye sɛtanburukalo tile 22 san 2025 yɛrɛjiraba senfɛ, k’u tɛ se
Mali kɔrɔ tuguni. O la, u ye kɛlɛ yɛlɛma bolo wɛrɛ kan n’u ɲɛsininni ye izininw
ma, minisiri ka ɲɛfɔli la. Ale bolo, binkanni ninnu laɲinin jɛlen don kosɛbɛ : ka
caman bɔ jamana ka sɔrɔ la fɛn dilantaw ka dɛsɛ sugu kɔnɔ, min b’a to feerefɛnw
sɔngɔw bɛ se ka dantɛmɛn yɛlɛn cogo min na.
Musa Alasani
Jalo ye taji sɔngɔ dantɛmɛn yɛlɛnni lagosili kɛ gɛlɛya in kɔnɔ. O min b’a la ka kɛ cogoya saba la : ka ban
ka esansi feere, sɔngɔ dantɛmɛn yɛlɛnni ani kunnafoni kolonw dili tajiko cogoya
kan jamana kɔnɔ, k’a ɲinin ka mɔgɔw hakili wuli. Ka da nin cogoya kan, jago ni
izininko minisiri b’a ɲinin julabaw fɛ u k’u jɔyɔrɔ fa ka ɲɔgɔn dɛmɛn fasodenɲumanya
kɔnɔ. Mali jago ni iziniko soba ka fara julabaw kan, u ka kan ka wuli k’u jɔ ka
kunnafoni ɲumanw di jamanadenw ma ; ka da a kan u b’a dɔn ko taji bɛ yen. Fɛn
min ye gɔfɛrɛnaman fanfɛla ye, minisiri ko jagoko, dunfɛnko ani sangaɲɔgɔnma ɲɛmɔgɔsoba
(DGCC) bɛ tɛmɛn ni baara kɛtaw kɔlɔsili ani tajifeereyɔrɔw jateminɛni ye.
Musa Alasani
jalo ko a tɛ bɛn mɔgɔw b’u ban ka taji feere. O siratigɛ la, gɔfɛrɛnaman bɛna
yaala ka tajifeereyɔrɔw jate minɛ jamana fan bɛɛ fɛ taji bɛ minnu bolo n’u b’a
la ka layidu tiimɛ. N’a yera ko minnu
bɛ ka ban ka taji feere, walima k’a sɔngɔ dantɛmɛn yɛlɛn, u ka yɔrɔw bɛ datugu.
Minnu fana b’a la ka kunnafoni lankolonw di, olu ka koɲɛw bɛ don kiiri tigilamɔgɔw
bolo.
Mali jagoko
soba ɲɛmɔgɔ ye minisiri jaabi a jɔrɛnankow kan. A y’a jira ko sɔɔnin nin tajiko
gɛlɛya in bɛ ban, k’a kɛ kuma kɔrɔ ye malidenw bolo. Maju Sɛnpara y’a ɲinin tajiko baarakɛlaw fɛ
u ka wuli k’u jɔ ka don jamana jigi kɔnɔ.
Dɔkala
Yusufu JARA
Fadi SISE
Dɔkala Yusufu Jara
Coupe du monde.
Le contrôle de services publics.
Journée internationale de la Jeune fille édition 2025.
Journée internationale de la Jeune fille édition 2025.
Mali - Etats-Unis.
Texte sur la phase éliminatoire de la coupe du monde.
