Minisiriw y’u ka laadalatɔnsigi kɛ araba ɔkutɔburukalo
tile 15 san 2025 jamanakuntigiso la Kuluba, a ɲɛmɔgɔya tun bɛ furancɛlafanga
jamanakuntigi Zenerali darimɛ Asimi Goyita bolo.
Don baara bolodalenw
fɛsɛfɛlen kɔfɛ, minisirilajɛ :
- jɛnna ni
sariya poroze dɔ ye ;
- ka mɔgɔ
dɔw sugandi ka bila jɔyɔrɔ dɔw la ;
- ani ka
kumaɲɔgɔnyaw lamɛn.
SARIYAKOW DAKUN NA
Ka kɛɲɛ ni
duguba jɔli, soko, dugukolokow, jamana dugukolo labɛnni ani jama minisiri ka
laselisɛbɛn kɔnɔko ye, minisirilajɛ jɛnna ni dekere poroze dɔ ye, min bɛ titiri
fɔnse n°5448 latɛmɛnni kofɔ fu la Mali kɔɔrisɛnɛ yiriwali cakɛda (CMDT) ma. O
titiri fɔnse in bɛ Kokofata, Kokofata komini kɔnɔ Kita mara la.
O dugukolo
min latɛmɛnna Sɛmudete ma Kokofata, Kokofata komini na, a fiyɛ ye taari 50 ye,
a bɛ dabɔ kɔɔrikolobɔ izinin dɔ jɔyɔrɔko kama.
Izinin in
jɔli b’a ɲinin ka dɛmɛn don kɔɔrisɛnɛyɔrɔw ani kɔɔrisɛnɛ yiriwali la, ka fara
yɛlɛma ɲuman donni kan sɛnɛkɛlaw ka ɲɛnamaya kɛcogo la.
MƆGƆW
SUGANDILI KA BILA JƆYƆRƆ DƆW LA
Minisirilajɛ
ye nin mɔgɔ ninnu sugandi ka bila nin jɔyɔrɔw la :
BASIGI NI SIWILIW LAKANANNI
MINISIRISO
- Siwiliw lakananni ɲɛmɔgɔba dankan :
Kolonɛli Sapɛri-pɔnpiye
Bakari DAWO.
KƆKANKOW NI DIƝƐ TƆNBAW CƐ KOƝƐNABƆ
MINISIRISO
- Mali ka lasigiden Luwanda (Angola jamana
na) :
An balimakɛ Seyidu
KULUBALI, kɔkankow laadibaa.
DENMISƐNYA, FARIKOLOƝƐNAJƐ
MINISIRISO, KA ƝƐSIN FASODENYA LADAMUNI NI FASODEN ƝUMAN DILANNI MA
- Faso ka wolɔntariya ɲɛtaa kalanso
ɲɛmɔgɔba Mali kɔnɔ :
An balimakɛ Usumani Sina JALO, hadamadenya
dɔnbaa ŋana.
MUSO, DEN NI DENBAYA ƝƐTAA
MINISIRISO
- Ciden :
Madamu
Fatumata TERERA, kumaɲɔgɔnya dɔnbaa ŋana.
- Faso ka
baarabolodalen ɲangataw dabilali la ka ɲɛsin suguya ma o ɲɛmɔgɔba : An balimakɛ
Yusufu BAGAYƆKƆ, cɛmancɛkalan karamɔgɔ.
KUNNAFONI, NUMERIKI SƆRƆ NI FANGA KA
BAARA YƐLƐMA KURA MINISIRISO
- Fɛɛrɛkow laadibaaw :
Madamu
Mosokura KONATE, kunnafonidila ; An balimakɛ Hamidu TOGO, karamɔgɔ-ɲininnikɛla.
BOLOLABAARA, SEKO NI DƆNKO, LOTOLIKO
NI ƝƐ DAAMUDA MINISIRISO
- Baarakɛkulu kuntigi :
An balimakɛ
Saliya MALE, karamɔgɔba
- Ciden :
An balimakɛ Adama
KOYITE, kunnafonidila.
KUMAƝƆGƆNYAW DAKUN
1. Sannayɛlɛnkalan
ni ɲininni minisiri ye minisirilajɛ ladɔnniya Iniwɛrite san 2025 kalanw tali
lajɛba kɛli la sɛtanburukalo tile 24, 25 ani 26 Bamakɔ.
O lajɛba in
laɲininw tun ye :
- ka cogoya
ɲuman di kalandenw, sannayɛlɛnkalandenw ani kalanden suguya wɛrɛw ma u
taayɔrɔkow la ;
- ka
sannayɛlɛnkalan kalanw sinsin an ka jamana yiriwali makow kan ;
- ka
kalandenw, sannayɛlɛnkalandenw ani kalanden somɔgɔw kunnafoni ani k’u lafaamuya
kalan nɔgɔyadaw la faso ka sannayɛlɛnkalan kalanw ani ɲininni ni baara sɔrɔli
kan.
San 2025 Iniwɛrite
kalanw tali lajɛba la, foroba ni kɛnyɛrɛye Iniwɛrisitew, kalansobaw, jɛɲɔgɔn
fangabulonw ka cidenw ani hadamadenya ni sɔrɔ tigilamɔgɔw ka cidenw tun bɛ yen,
k’a to yɛlɛma kura minnu bɛ sen na sannayaɛlɛnkalan na ani jamana ka kandili
kalan ɲuman dili la ani baara sɔrɔli dipulɔmutigiw fɛ, dɔ ka se ka fara o yeli
fanga kan.
2. Muso, den
ni denbaya ɲɛtaa minisiri ye minisirilajɛ ladɔnniya Mali yeli la Afiriki tilebinyanfan
an’a cɛmancɛyanfan musomanninw tɔgɔladon lajɛba 1lɔ kɛnɛ kan
ɔkutɔburukalo tile 10 ka se a tile 11 ma san 2025, Dakaro Sɛnɛgali faaba la.
O lajɛba in
laɲinin tun ye ka se ka musomanninw ka hakɛw waleyali taa ɲɛ ni kandili jɔnjɔnw
ye tɔndenjamana bɛɛ fɛ ani jɛnni ni marayɔrɔ baara bolodacogo ye.
O lajɛba in
senfɛ, barosigiw ni jiraliw kɛra jama na ani ɛntɛrinɛti fɛ, a kɛra cogoya ye
muso, den ni denbaya ɲɛtaa minisiri bolo ka Mali ka cɛsiri kɛlenw dantigɛ
denmisɛnninw ka hakɛw ɲɛtaa an’u lakananni siratigɛ la bakurubafɔ la, ani
kɛrɛnkɛrɛnnenya la musomanninw ka hakɛw.
Lajɛba
kɔrɔfɔ labanw kɛra :
- ladamuko
ɲuman lasɔrɔli bɛrɛmakɛɲɛ ani bɛɛ sen bɛ min na ;
- dabali
teliman tigɛli tɛmɛn kɛli la ni ladamuni ye ni fɔɲɔgɔnkɔw kɛra walima kasaaraw ;
- kɛnɛyasow,
kɛnɛyakow, ji, lasaniyali ani saniya lasɔrɔli ;
- lakananni
ka bɔ ɲangatawale suguya bɛɛ ma ka ɲɛsin suguya ma.
Lajɛba senfɛ,
minisiri ye ɲɔgɔnye kɛ ni Maliden sigilenw ye Dakaro.
3. Izininko
ni jago minisiri ye minisirilajɛ ladɔnniya Mali yeli la kɔɔri tɔgɔladon diɲɛ
kɔnɔ, o lajɛba sigiko 7nan kɛnɛ kan ɔkutɔburukalo tile 7 san 2025, Ɔrɔmu, Itali
faaba la.
Kɔɔri
tɔgɔladon diɲɛ kɔnɔ o laɲinin ye ka jigisigi kɛ kɔɔri sɔrɔ yiriwali la C4 +
Kɔnɔwari tɔndenjamanaw kɔnɔ, min b’a to a bɛ se ka dɛmɛn don tɔndenjamanaw na ka
taa a fɛ sɔrɔ kuntaala jan yiriwali la bɛɛ sen bɛ min na.
Nin lajɛba
7nan in masalakun tun ye : « Kɔɔri, an ka ɲɛnamaya fini », C4 + Kɔnɔwari
tɔndenjamanw ka ciden minisiriw, diɲɛ jagoko cakɛda ɲɛmɔgɔmuso- dankan, lasigiden
minnu bɛ Berezili, Ɛndijamana ani Nansarajɛkulu kɔnɔ, diɲɛ jɛkulu min hakilila
bɛ ɲinin kɔɔriko la, diɲɛ tɔnba ka izininko yiriwali jɛkulu, diɲɛ tɔnba
bolofara min ɲɛsinnen bɛ baarako ma ani diɲɛ cakɛda enɛrizi atomikiko la, nin
bɛɛ ka cidenw tun b’a kɛnɛ kan.
Mali
izininko ni jago minisiri de ye jɛkulu C4 + Kɔnɔwari baaraw mabɛnbaa ye, ale ka
kɔrɔfɔ kɔnɔ, a da sera kɔnɔna dɛmɛn ma jamana dɔw fɛ, kɔɔri sɔrɔli ani
fɔɲɔgɔnkɔ min bɛ kɔɔri sɔngɔko la k’a sababu kɛ dɛmɛn min bɛ kɛ kɔɔri labɔli
la, ani dɔ bɔko jugu kɔɔri sɔngɔ la, fo ka se kɔɔri sɔngɔ binni ma, o dɛmɛn in
ye cogoya ye kɔɔrisɛnɛ ka ɲɛnamaya la.
A y’a ɲinin
diɲɛ jagoko jɛkulu fɛ a k’a sinsin minisirilajɛba 14nan kan, o min bɛna kɛ san
2026 marisikalo la Yawunde Kameruni, ka jaabi ɲuman di Hɔngi Kɔngi ka kɛta la
kɔɔriko la, ka kɛɲɛ ni kɔnɔna dɛmɛn ye.
4. Kɛnɛyako,
hadamadenya yiriwali minisiri ye minisirilajɛ ladɔnniya banako cogoya la jamana
kɔnɔ, kɛrɛnkɛrɛnnenya la dɔ farala sumayaba ka mɔgɔ minɛnen hakɛ kan ka kɛɲɛ ni
dɔgɔkun tɛmɛnnen in ta cogoya ye.
Fuarncɛlafanga
jamanakuntigi b’a ɲinin jamanadenw fɛ, dabali minnu tigɛra banaw kunbɛnni an’u
kɛlɛli la, olu ka labato a ɲɛma.
Bamakɔ, ɔkutɔburukalo tile 15 san
2025
Gɔfɛrɛnaman sekeretɛri zenerali,
Birama KULUBALI
Sewaliye de lɔrɔduru nasiyolai
Dɔkala Yusufu Jara
Femme de Siby.
Coupe UEFOA U17.
Coupe UEFOA.
Coupe de la confédération.
Pénurie de carburant au Mali.
Coupe du monde.
