Gɔfεrεnaman tɔgɔla baarakεlaw hakε dɔnni : Minisiriɲεmɔgɔ ye baaraw daminεni nun don Segu

Mara kεcogo foroba cakεdaw la, o ɲuman basigilen dakun don ; paara ɲε kelen kεra a kɔnɔ kunun ɔkutɔburukalo tile 25 san 2023 lajε senfε, ni gɔfεrεnaman ani sigidaw tɔgɔla baarakεlaw hakε jateminεni ye. A ɲεmɔgɔya tun bε minisiriɲεmɔgɔ D^r Sogεli Kokala Mayiga bolo. A bilalen don poroze min hukumu kɔnɔ, o ye baarakεlaw hakε dɔnni ye. Lajε in kεra Segu mara gɔfεrεnεri ka baarakεyɔrɔ lajεkεso kɔnɔ.

Jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma Ibaraimu Ikasa Mayiga, baarako, gɔfεrεnaman baarako ni hadamadenya fɔkabεn minisiri D^r Fasun Kulubali, ani iziniko ni jako minisiri Musa Alasani Jalo tun b’a kεnε kan. Gɔfεrεnεriw, Segu mara laadaɲεmɔgɔw, a diinεɲεmɔgɔw ani gɔfεrεnaman tɔgɔla cakεdaw fεεrεko tigilamɔgɔw, nin bεε fana tun bε kεnε kan.

Gɔfεrεnaman ani sigidaw tɔgɔla baarakεlaw hakε dɔnni baaraw daminεni nun donni Segu, kumaɲɔgɔnya kεra fεεrεtigεjεkulu fε, ka sɔrɔ ka jatekεminεn in walanwalan ; n’o ye lozisiyεli-SIGRH ye, ka sɔrɔ k’a lafacogo misali dɔ ɲεjirali kε. Jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma, o ka laseli la, a y’a jira ko SIGRH bε furancεlafanga ka baarabolodalen (PAG) kɔnɔ, sigikafɔba min kεra jamana kɔnɔ o laɲinin fana don. Ibarahimu Ikasa Mayiga ye ɲεfɔli kε, ko ka kεɲε ni yεlεma donni ye jateminεni baara in sarati dalen na, a bε mɔɔnɔbɔ ka se san 2024 ma. Dakun 3 b’a waleyali kɔnɔ.

Dakun fɔlɔ ye gɔfεrεnaman ani sigidaw baarakεlaw hakεw dɔnni ye, walasa da jɔnjɔnw ka se ka sɔrɔ bolo kɔrɔ. Baara bε kε ni mɔgɔw ka kariti biyometiriki ye, o min sɔrɔla Arawεki senfε.

Dakun filanan baara de daminεna kunun. O ye ka baarakεla kofɔlen kelen-kelen ye ɲε na jateminεnikεlaw fε cakεda bεε la. O dakun bε dagu ni olu bugunnatigε donni ye lozisiyεli-SIGRH labεnnen kɔnɔ ; o min labεnna Maliden εnfɔrɔmatiki dɔnbaa ŋanaw fε, Gɔfεrεnaman yεrε ye a bεε musakabaa ye. Sεbεn nafama min bεna sɔrɔ baaraw senfε, o bεna lamara Mali kɔnɔ yan. A koɲε tε don jamana dunan si bolo, ka kε kunbalan wεrε ye an bolo kɔfε.

Poroze SIGRH waleyali siratigε la, an ka marakεlaw bεna baarakεminεn nafama sɔrɔ u bolo kɔrɔ. Gɔfεrεnaman ani sigidaw baarakεlaw ka kalosarako bεε bε ɲεnabɔ yɔrɔ kelen na ; Cakεdaw bε se ka ɲɔgɔn sɔrɔ a kunnafoni kuraw kan sanga ni waati bεε la baarakεlaw ka koɲεw na ; jate jεlen bε sɔrɔ bolo kɔrɔ baarako ni mɔgɔw sekow kan ani gɔfεrεnaman baarakεlaw tɔpɔtɔli ɲuman sεbεn don.

Minisiriɲεmɔgɔ y’a ka wasa jira kεnε in ɲεmɔgɔya kεli la baara daminεni nun donni na ; ka da a kan jamana jɔli kura sira dɔ don. D^r Sogεli Kokala Mayiga ka fɔ la, gɔgεrεnaman ye cεsiri caman kε baarakεlaw tɔpɔtɔcogo la ; o n’a ta bεε, gεlεyaw ma se ka ban fɔlɔ. O gεlεya dɔ ye a ka baarakεla hakε dɔnbaliya ye, kalosaraw donda jɔnjɔn fana tε ka dɔn. Walasa ka se ka caman bɔ nin gεlεyaw la, furancεlafanga jamanakuntigi Kolonεli Asimi Goyita y’a ɲinin nin poroze in ka sigi senkan : ka baarakεla da jɔnjɔn dɔn. O de baara daminεna kunun Sugu. Jamanakuntigi ye poroze SIGRH in waleyali yamaya dili lajε ɲεmɔgɔya kε san 2022 mεkalo tile 24. Yεlεma donni fangabulonw cogoya la, o y’an donnen ye o dakun kɔnɔ Mali foroba cakεdaw lasaniyali hukumu kɔnɔ.

D^r Sogεli Kokala Maïga y’a jira ko nafaba bε poroze in waleyali la. A bε namara sεbεkɔrɔ dɔgɔya baarakεjama ani sarako la ; a b’a to gɔfεrεnaman ka baarakεnafolo ka se ka lakanan, ka baarakεminεn ɲεnama sɔrɔ jamana baarakεla hakε kan baarako ni seko kan. Gɔfεrεnaman ani sigidaw tɔgɔla baarakεlaw hakε dɔnni, a bε kε jamana fan bεε fε ani Mali ka lasigidensow ni kɔnsulaw la kɔkan.

Lajε in kuncεlen, minisiriɲεmɔgɔ taara a ɲε da Komatεkisi kan, walasa k’a seereya ko baara wulila a ɲεma, ani k’a baarakεlaw hakili sigi n’a ka dεmεn ɲεsinni ye u ma.

Mamadu SI

Dɔkala Yusufu JARA