Kolonεli -Mazɔri Suleyimani Danbεlε : «Bi Mali dugukolo yɔrɔ kelen tε yen, sɔrɔdasiw tε min na»

O kunnafinidilajε senfε, a ye ɲεfɔli kε kεlεdagaw cogoya kan ; n’o ye Minusima dagayɔrɔw latεmεnni ye Mali sɔrɔdasiw ma. A ye ɲεfɔli fana kε mɔgɔtaba kan sisan ka fara jamana lakananbaaw kan.

O ɲεfɔliw kɔnɔna na, a y’a jira ko sɔrɔdasiw b’u bilakun na ; n’o ye jamana basigili waleyaw ye, hadamadenw ka se ka taakaseginw kε u fεrε ma n’u bolofεnw ye. O de kosɔn u b’a la ka gεrεntε sigi kojugubakεlaw da kan fan bεε fε. U bε se ka sɔrɔ yɔrɔ o sɔrɔ la, u b’u ɲinin, ka bɔnε jigin u kan, k’u dogoyɔrɔw fana tiɲε k ‘a sababu kε kεlεbolo « kεlεtigi » ani kεlεbolo « Maliko » ka cεsiriw ye.

O siratgε la, Kolonεli-Mazɔri Suleyimani Danbεlε sinsinna sɔrɔdasiw ka baara ɲεdɔnni kan hadamadenw ka hakεw labatoli kɔnɔ, ka kεɲε ni hadamadenya lakananni sariyaw ye diɲε kɔnɔ. O sariyaw labatoli n’a ta bεε, sɔrɔdasiw tεna jεn n’a ye mɔgɔ si kelen bolo, walima jεkulu si kelen bolo, k’i b’a ɲinin ka sira da u ɲε jamana dugukolo mumε bɔɔsili la juguw la.

Kalo salen in na, kεlεw kεra ni pankurunw ye ani dugumasɔrɔdasiw fε Moti ani Boni maraw kɔnɔ. U sera ka kojugubakεla caman sɔrɔ k’u bɔ baara la, k’u ka mɔbili pikɔpuw ni motow tiɲε. Ka kεlεminεn ani kunnafonidiminεn caman fana sɔrɔ u kɔ.

O siratigε la, u b’a da sigidalamɔgɔw tulo kan, u ka taa u ciw fε hεrε ni baaden na. Minnu bε suman ladilanw na u k’u ka baaraw kε ni hakili sigi ye ; kεrεnkεrεnnenya la Jalasagu n’a lamini mɔgɔ, Bankasi sεrεkili kɔnɔ. Yenyɔrɔw la, sεnεkεla caman tun jigi tun bε ɲinin ka tigε u ka forow ladilanniko la nin waati in na.

« Dirpa » ɲεmɔgɔba da sera Minusima taaliko kunnafoni ma, ka kεɲε ni diɲε tɔnba ONU ka basigi sabatilijεkulu ka sariya 2690 ye. O min ye Minusima ka baara ban zuwεnkalo tile 30 san 2023, ka da Mali furancεlafanga ɲεmɔgɔw ka laɲinin kan.  Minusima bɔli bolodara ka kε dakun fila ye. Dakun fɔlɔ daminεna zuluyekalo tile 1^lɔ ka kuncε utikalo tile 30 san 2023. O kɔnɔna na, Minusima dagayɔrɔ minnu bε Ogosagu, Bεri, Gundamu ani Menaka, olu latεmεnna Mali sɔrɔdasiw ma.

Minusima ka bɔli dakun filanan daminεna ɔkutɔburukalo tile 1^lɔ la. Minusima dagayɔrɔ minnu bε Duwazan, Agelihɔku ani Kidali, olu tun ka kan ka latεmεn Mali sɔrɔdasiw ma. An bε don min na, Minusma dagayɔrɔ tɔ minnu ka kan ka latεmεn u ma, o ye Ansɔngo, Moti, Gawo ani Bamakɔ taw ye. Nin bεε de ka kan ka latεmεn Mali sɔrɔdasiw ma ka bεn ni desanburukalo nata tile 15 ye.

Kolonεli-Mazɔri Suleyimani Danbεlε y’a jira ko an bε waati min na, mɔgɔtaba bε sen na ka fara jamana lakananbaaw kan. O sεbεnw ladonni daminεna ɔkutɔburukalo tile 23, a tun ka kan ka kuncε a tile 29 san 2023 ; nka ka da jama cayacogo kan sεbεnbilayɔrɔw la Bamakɔ ani marayɔrɔ tɔw la, jamana ɲεmɔgɔw y’a ŋaniya ka mɔɔnɔbɔli kε, walasa jamaba in ka se ka wasa sɔrɔ a ko la. A ka kan ka kuncε bi juma nowanburukalo tile 03 san 2023. U ye nɔgɔya fana don sεbεnko la. Jate y’a jira ko nowanburukalo tile 1^lɔ y’a sɔrɔ denmisεn 181.633 sera k’u ka sεbεnw bila u bilayɔrɔ kofɔlenw na. Olu la mɔgɔ 72.783 bε ka zandaramaya ɲinin, 47.460 bε ka dugumakεlε sɔrɔdasiya ɲinin, 40.000 bε ka polisiya ɲinin, 29.474 bε ka garidiya ɲinin, 20.000 bε ka sapεri pɔnpiyeya ɲinin.

Nin jate minnu fɔlen filε « Dirpa » ɲεmɔgɔba fε, o b’a jira ko an bε don min na denmisεnw hami ye u jɔyɔrɔ fako ɲuman ye jamana lakananni na.

Kolonεli-Mazɔri Suleyimani Danbεlε y’a ɲinin kunnafonidilaw fε, u k’u hakili o kunnafoni lankolonw na erezo sosiyo kan. O siratigε la, a y’ jira u la, u k’u hakili to sɔrɔdasiw ka kunnafoni kɔdi la ; n’o ye « code QR » ye. Ani ko a tεnna mεεn tuguni, u b’a fε ka jεmukan dɔ sigi senkan ORTM na, min bε wele « Ka tiɲε ni nkalon fara ka bɔ ɲɔgɔn na ». A bε dabɔ ka se ka kunnafoni ɲεnamaw lase jamanadenw ma, ka sira da kunnafoni lankolonw ɲε.

Abubakari TARAWELE

Dɔkala Yusufu JARA