Mali: Jamana sεgεsεgεlikεlaba y’a ka san 2022 laselisεbεn di jamanakuntigi ma

Jamana sεgεsεgεlikεlaba ka laselisεbεn dili furancεlafanga jamanakuntigi ma Kuluba, o kεra a damana lajε ye. Minisiriɲεmɔgɔ D^r Sogεli Kokala Mayiga, fangabulonw ɲεmɔgɔw, minisiriw ani maaba caman wεrεw tun b’a kεnε kan. 

San 2022 laselisεbεn in bε boli ko naani kan : warikow cogoya sεgεsεgεli ; tenkansigili sεgεsεgεli, n’o ye pεrifɔrimansi ye tubabukan na ; kɔlɔsiliw ni laɲininw sεgεsεgεli ; ani foroba politiki kiimεni. 

Jamana sεgεsεgεlikεlaba ka laselisεbεn in ye gafeba ye ; fura ɲε 200 don. Sεgεsεgεlici 36 ani foroba politikiw kiimεni de waleyalen don a kɔnɔ, ka ɲεsin foroba cakεdaw, jεkulubaw, sigidaw, porozew ni foroba politikiw ma. O ciw tilalen don wariko sεgεsεgεli 23, tenkansigili sεgεsεgεli 3, kɔlɔsili ni laɲinin 8 ani foroba politikiw kiimεni 2.  

Sanba Alihamudu Babi ka ɲεfɔli la, a y’a jira ko sεgεsεgεli minnu kεra san 2022 kɔnɔ, fiɲεw kɔlɔsira baaraw kεcogo la. O tε mankutu duman ye o cakεda sεgεsεgεlenw ma. Sεgεsεgεlikεlaba ye sεgεn 21 don jamana kiiritigεsoba jateko kiiritigεso ɲεmɔgɔ bolo. 

Ka sεbεn 22 fana kεcogo jugu kofɔ Bamakɔ komini 3^nan, Kayi ani Moti kiiritigεsow porokirεriw ye ; olu minnu ɲεsinnen don foroba nafolo lakananni ma. Jamana Sεgεsεgεlikεlaba ka fɔ la, o sεbεn 22 dɔ dira jamana kunkangεlεyaw kiiritigεso ɲεmɔgɔba ma, walasa a ka se ka nɔminεniw kε, ani ka faso ka hakεw lafasa. 

Sεgεsεgεlikεlaba y’a sinsin a ka laselisεbεn dili kεnε kan, ka foli ni tanuni lase furancεlafanga jamanakuntigi ma a ka don o don cεsiri la, an ka jamana kunkangεlεyaw furakεli la. A labanna ka foli kεrεnkεrεnnen kε jamana lakananbaaw la u ka cεsiri la faso kunmabɔli kεlεdagaw la. Olu minnu bε wulikajɔ la sanga ni waati bεε la, ka hadamadenw n’u bolofεnw lakanan. 

Jamana sεgεsεgεlikεlaba bolo, yurugu-yurugu ani faso nafolo burujali kεlεli waleyaw talen don ba la jamanakuntigi fε, Mali kura jɔli hukumu kɔnɔ. 

Furancεlafanga jamanakuntigi y’a jira ko karan ka kan ka kε forobafεn lakananni ma, ni laɲinin ye jamana jɔli ye don jan kama. O sira ɲuman dɔ ye jɔyɔrɔ fali ye baara kεcogo ɲuman na ka kεɲε ni sariya ka dantigεcogow ye. O de kosɔn, jεlenya, kεtakε, yurugu-yurugu ani faso nafolo burujali kεlεli ye furancεlafanga ɲεmɔgɔw taabolo ye. 

Jamanakuntigi hami ye furancεlafanga ka waleya kεta bεε ka kε ɲεmadako ye mara kεcogo ani yεlεma ɲuman donni jogow la. 

Kolonεli Asimi Goyita ka fɔ la, laselisεbεn min dilen filε a ma, jamana kunkangεlεya caman kofɔlen don a kɔnɔ. A tɔ ye k’u fεsεfεsε ji ɲεmajɔlen na, k’u filiw latilen ani ka sira jεlen don faso baarakεlaw kɔrɔ faso tɔgɔlafεnw marali kεcogo ɲuman na. A ko nin ci waleyalenw jaabi bεna se k’a to dɔ ka fara yεlεma kεtaw fanga kan jamana jɔli kurako la. 

O siratigε la, jamanakuntigi y’a ɲinin gɔfεrεnaman fε a k’a hakili to nin laɲinin kεlen ninnu waleyali la, min b’a to u bε se ka kε yεlεma ɲuman donni sababu ye mara kεcogo la an ka jamana kɔnɔ. Kuntilenna minnu fana dilen don laselisεbεn in kɔnɔ, olu bεna ta ba la laɲininw waleyaliko la. 

Abubakari TARAWELE

Dɔkala Yusufu JARA