Mali sɔrɔdasiw ye wulikajɔba min kɛ jamana fan bɛɛ fɛ, o bɛ to sen na ka balanw da kojugubakɛlaw ɲɛ. O hukumu kɔnɔ, wasa b’a la ka sɔrɔ u kɛlɛli la, k’a sababu kɛ kunnafoni jɛlenw ye. Sibiri tɛmɛnnen in, nin kunnafoni ninnu lasera Mali sɔrɔdasiw ɲɛmɔgɔsoba fɛ.
Seliba ɲɛkɔrɔ
lakananbaaw ka ɲɛmadaba sera k’a to u ka se ka kojugubakɛlaw ka jan dalen caman
waranga. Olu tun y’a dabɔ jasiran bilali kama mɔgɔw la, ka jamana fangabulonw
lonpolanpa n’u dɛmɛnbaaw wariko ni kunnafoniko la, o jigiya ye.
Kojugubakɛlaw tun y’u
mɔlɔnti jama na dugubaw kɔnɔ. U sera ka lakodɔn ka nkaba da u kan, k’u dɛmɛnbaa
caman fana minɛ. U tun ye dogoyɔrɔ minnu kɛrɛnkɛrɛnnen labɛnw kama ka tiɲɛniw
kɛ, olu yɔrɔdɔnna k’u tiɲɛ.
Sɔrɔdasiw ye wulikajɔ caman kɛ duguma ani sanfɛ. O la, zuwɛnkalo tile 6 tɛmɛnnen
in, kojugubakɛlaw ka minɛn dɔw ni tajimɔbiliw b’o la, olu lakodɔnna Bulukesi ni
Duna dafɛlanw na Bajangara mara la. O don kelen na, Mali sɔrɔdasiw ye
kojugubakɛlaw ka jan dɔw waranga k’u bon k’u tiɲɛ Karijiba, Guruma Ararusi ni
kɔrɔn cɛ Tumutu mara la. Tajibarikon 1.000 tun b’o la, minnu tun dabɔlen bɛ
kojugubakɛlaw kama ; nka pankurunw y’u bon k’u tiɲɛ.
Sibiri tɛmɛnnen in, kunnafoni jɛlenw kɛlen kɔ ka sɛmɛntiyali kɛ, sɔrɔdasiw ye kojugubakɛlaw dagayɔrɔ dɔ bon k’o tiɲɛ Zaro ni kɔrɔn cɛ Guruma Ararusi. O yɔrɔ in tun y’u ka binkanniw labɛnyɔrɔ ye ; kunnafoniminɛn caman tun b’u bolo yen, u ka kɛlɛcɛ donimɔbili saba fana tun b’o la.
Mali sɔrɔdasiw ɲɛmɔgɔsoba ka laseli la, o don kelen na, sɔrɔdasiw ye min da kojugubakɛlaw kan Zaro, o y’a sɔrɔ pankurun fana bɛ k’o da dɔw kan Esuku laminiw na, km45 Kidali ni kɛɲɛka cɛ ka digi tilebin kan. Wulikajɔw bɛ sen na halibi k’a tɔw yɔrɔɲinin ka tasuma da u tɛgɛ.
FUGARIYA BINKANNIW- Mali sɔrɔdasiw ka wulikajɔ hukumu kɔnɔ, ka sigidalamɔgɔw lakanan ka bɔ
kojugubakɛlaw mantɔɔrɔ ma, minnu bɛ k’a ɲinin ka tasuma don basigi la ani ka
jamana fangabulonw lonpolanpa, tɛmɛn bɛ ka kɛ n’u dogoyɔrɔw ɲininni ye k’u tiɲɛ. O siratigɛ la,
sibiridon zuwɛnkalo tile 7 san 2025 pankurunw ye kojugubakɛlaw dagayɔrɔ dɔ bon
k’o tiɲɛ jamana tilebinyanfan fɛ. O tun ye yɔrɔ fila ye : kelen bɛ Bawulen
kɔnɔ Jijɛnin ni tilebin cɛ ni km40 ye, k’u dagayɔrɔ fila fana tiɲɛ Sandare ni
kɛɲɛka cɛ ni km20 ye, ka kelen wɛrɛ bon k’o kɛ bugurinjɛ ye Bafarara lamini na,
ni km40 ye Awuru ni kɛɲɛka cɛ Kayi mara la.
Nin dɔgɔkun labanw kɛra
fugariya binkanniw na jamana yɔrɔ dɔw la, ka sigidalamɔgɔw bɔnɛ ten fu u m’a
min, u m’a bɔn. U binna an ka sɔrɔdasiw ani AES taw dagayɔrɔ dɔw fana kan. Nin
bɛɛ kɛra kojugubakɛlaw ka bolodiɲɔgɔnma kɔnɔ. Wa dɛmɛnbaaw b’u la jamana kɔnɔ
an’a kɔkan wariko, minɛnko ani kunnafoniko la. AES lakananbaaw bɛ wulikajɔ
suguya bɛɛ la, ka san fin u ni tilebin cɛ. Kojugubakɛlaw tun bɛ nimakaran
na ; nka u dɛmɛnbaaw jamana kɔnɔ an’a kɔkan, olu de b’a la ka ni kura fiyɛ
u la kɔsa in na.
Mali sɔrɔdasiw ɲɛmɔgɔsoba ka fɔ la, zuwɛnkali tile 4 san 2025, kojugubakɛlaw dogoyɔrɔw an’u ka kɛlɛminɛnw tiɲɛna Menaka mara kɔnɔ. « Dirpa » y’a jira ko kojugubakɛla minnu tun dagalen bɛ Bulukesi lamini na, olu bonna k’u tiɲɛ duguma sɔrɔdasiw fɛ Duwazan mara la. Minnu fana tun dogolen bɛ Susan jiritu kɔnɔ Kulukɔrɔ mara la, olu fana kɛra ten. Kojugubakɛlaw n’u ka mɔbili dɔ bonna Yensesi, km50 Kidali ni tilebin cɛ. Kojugubakɛla tan ni kɔ fana tun bɛ pikɔpu saba kɔnɔ Kidali ni kɛɲɛka cɛ, olu yɛrɛ bonna k’u ta tiɲɛ.
SU 41 TORA U KƆ- O y’a sɔrɔ
kojugubakɛlaw, mɔbili caman na, u taatɔ bin Tesiti sɔrɔdasikan kan Gawo mara
la, olu kunbɛnna k’u bunten Mali sɔrɔdasiw fɛ, u kɛlen kɔ ka kɔseginbɛlɛ da. Nin
binkanni minnu kɛra zuwɛnkalo tile 4, Mali sɔrɔdasiw ye jate bɔ. A jirala ko su
41 tora kojugubakɛlaw kɔ, nka u sera ka taa ni suw ni joginnen caman fana ye.
Nizɛri jamanaden kojugubakɛla ɲɛmɔgɔ min bɛ wele Mamudu Akilu, o n’a ka kɛlɛcɛ
farin naani fagara o senfɛ.
Zuwɛnkalo tile 5 san
2025, kojugubakɛlaw tun y’a ɲinin ka tasuma don lakananbaaw dagayɔrɔ la Mawu,
Yoroso sɛrɛkili kɔnɔ Kucala mara la. Mali sɔrɔdasiw ye tasuma da olu tɛgɛ. U
taara ka su 25 to u kɔ ani moto 16 ; fila tun sisilen b’olu la ; nka
u bolila n’u ka su tan ni duuru y’u bolo.
Kabini lafasa ni
sɔrɔdasi kɔrɔw ka minisiri Zenerali de kɔri darimɛ Sajo Kamara y’a fɔ Mali kura
taasira 3 kɔnɔ ko juguw ka ɲɛnamaya bɛ ɲinin ka ban, u b’a fɛ k’o kuma in de
nkalontigiya ni binkanni cayali ye sisan. Wa kow taacogo bɛ tiɲɛ di minisiri ma.
Ani fana, furancɛlafanga jamanakuntigi Zenerali darimɛ Asimi Goyita, selikɛnɛ jiginnen kɔ, a ye foli ni tanuni lase jamana lakananbaaw ma u ka cɛsiri ni sebaayasɔrɔw la kɛlɛdagaw la, kojugubakɛlaw n’u ka binkanni kelen-kelenw n’u ta bɛɛ. A ye jigisigi kɛ Malidenw ani AES fasojama ye kojugubakɛlaw kɛlɛli la ; n’o ye cɛsirikoba ye jamana kɔnɔ an’a kɔkan, AES jamanaw bɛ k’u ɲɛsin min ma. A labanna k’a jira k’u tɛna kojugubakɛ kɛlɛli bila fiyewu k’u tasuma fiyenke kelen to jamana kɔnɔ. U mana kɛ jamana fan o fan fɛ, u b’u yɔrɔ ɲinin ka tasuma da u tɛgɛ.
Dɔkala Yusufu JARA
Souleymane SIDIBE
Mali sɔrɔdasiw ɲɛmɔgɔso ka kunnafoniko cakɛda « Dirpa » ye laseli kɛ mɛkalo tile 24, k’a jira ko mɛkalo tile 23 san 2025 walaha tile bantɔ, Mali sɔrɔdasiw sera ka jan da bafolo fɛ kojugubakɛlaw jamaba ɲɛ Sofara sɛrɛkili kɔnɔ..
Furancɛlafanga jamanakuntigi Kolonɛli Asimi Goyita yaafara kasoladen 390 ma. O mɔgɔ labilalen ninnu tun bɛ jamana kasobon caman na. Nin kunnafoni in lasera arabadon sɛtanburukalo tile 25 san 2024, kiirikow, hadamadenw ka hakɛw labatoli ani jamana taamasiyɛnw lamarali minisiri Mamudu Kasoge f.
Kiiritigɛso in ka kiiri dɔw tigɛcogo ye gɛlɛya caman sun ye kalataw kɛlen kɔ an ka jamana kɔnɔ. O la, a ɲuman ye bɛn ni fɔkabɛn bɛnkansɛbɛn ɲɛbila-poroze labɛnkulu ka se kiiriso ma, min bɛ jamanakuntigisigi ni depitesigi kalataw kiiriw tigɛ. Sabula o mana a bila yɔrɔ min na ki.
