Yeli tɔgɔladon kεrεnkεrεnnen diɲε kɔnɔ : Mali ye ɲεjalandimi banni ɲεnajε kε

Yeli tɔgɔladon diɲε kɔnɔ, o sigira masalakun min kan Mali fε, o ye : « Ɲεjalandimi banni Mali kɔnɔ, se sɔrɔlenw mεεni si la ». Kasɔrɔ diɲε masalakun tun ye « an ka kε an ɲεw fε ». A laɲinin ye ka sigidalamɔgɔw lafaamuya fiyentɔya sɔrɔli banaw kunbεncogo an’u furakεcogo la. A bε damakasiliw kun bɔ ka ɲεsin sigidaw ɲεmɔgɔw ani dεmεnbaaw ma.

Diɲε tɔnba bolofara min ɲεsinnen bε kεnεyako ma (OMS), o ka ciden D^r Kirisitiyan Itama ye ɲεfɔli kε, k’a jira ko ɲεjalandimi ye fiyentɔya sababu ye Afiriki Sahara woroduguyanfan fε, ka fara ɲεnabugun kan, ani witamini A dεsε farikolo la. A ka fɔ la, Mali y’a faamuya joona, k’a ɲεsin bana in kεlεli ma n’a furakεyɔrɔba (IOTA) sigili ye senkan.

Ɲεjalandimi banni, OMS y’o sεmεntiya diɲε jamana 17 kɔnɔ ; Mali b’o la. O siratigε la, laɲinin ye ka Mali senkɔrɔmadon, k’o se sɔrɔlenw sinsin ni waleya kεrεnkεrεnnenw ye ani kɔlɔsili fanga bonyani. A bε ɲinin baara kεbaa bεε fε, u k’u fangaw fara ɲɔgɔn kan fiyentɔya balili la.

O b’a to laɲinin min kεra yanni san 2030 cε, o ka se ka sabati ɲε banako la. Ɲεjalandimi ka fiyentɔya ka se ka ban pewu diɲε kɔnɔ. Minisiriɲεmɔgɔ ka fɔ la, ɲεfurakεlaw jɔyɔrɔ ka bon kosεbε hadamadenya kɔnɔ. Mɔgɔ min mana i tanga fiyentɔya ma, a y’i tanga koba ma, a ye ɲεnamaya di i ma. Yelikεbaliya bε diɲε tunun mɔgɔ la. Mali ye fura hakε min san ɲεjalandimi furakεliko la, o cayara ni furabuteli miliyɔn 29,1 ye, ka laban ka lagamuniko 12.469 kε a kunnafonidiw ni lafaamuyaliw la.

Minisiriɲεmɔgɔ ye foli ni waleɲumandɔn kε IOTA la ani ɲεfurakε cakεda bεε la ɲεjalandimi banni hukumu kɔnɔ. Kεnε kuncεra ni lakodɔnsεbεnw dili ye ɲεjalandimi banni ŋanaw ma.
Mohamεdi Jawara

dɔkala Yusufu Jara