Fasokanw : Hakilijakabɔw bε sen na u labaaracogo sariya labεnni na

 Mali 4nan sariyasunba sariyasen 31 b’a jira, ko : « fasokanw ye forobakanw ye Mali kɔnɔ. Labεncogo sariya de b’o kεcogo an’a cogoyaw dantigε u labaarali la. Tubabukan ye baarakεkan ye. Gɔfεrεnaman bε se ka kan wεrε ta k’o kε baarakεkan ye ».

O siratigε la, tile kelen hakulijakabɔ kεra kunun, kalanko ani balikukalanko ɲεnabɔli cakεda (CNR-ENF) fε, « labεnni sariya dɔ ŋaniya sirili la, min bεna fasokanw labaaracogo an’u cogoyaw dantigε u labaarali kama ka kε forobakanw ye ». A lajε laɲinin tun ye ka hakilijakabɔba kε a ko la, min bε se ka bange ɲuman na, n’o ye labεncogo sariya ye bεnkan kɔnɔ, n’a bεna fasokanw labaaracogo an’u cogoyaw dantigε, forobakanko siratigε la.

Kalanko minisiri ka hakilila ye hakilijakabɔkεnε in sigili ye. A lajε ɲεmɔgɔya tun bε o minisiri yεrε, Amadu Si Sawanε bolo. A y’a jira ko fasodenw de ye fasokanw forobayali laɲinin kε jamana ka sigikafɔba (ANR) senfε Mali jɔli kurako la, walasa fasokanw ka se ka don ba la. Jamana sariyasunba kura y’a ko ta la ba la, jamanakuntigi y’o waleyali yamaruya di zuluyekalo tile 22 san 2023.

O kɔfε sa, a tɔ ye ka labεncogo sariya dɔ dilan, min bεna fasokan 13 kofɔlen ninnu forobayacogo an’u cogoyaw dantigε. « Jigi dalen don kalanko minisiri kɔrɔw, ɲεmɔgɔw, karamɔgɔw, ɲininnikεlaw ani fεεrεtigiw kan o baara in na ; wa jigi ma da u kan gansan. Dɔnniya min b’u la an’u ka yεrεdi an ka kanw donni na ba la, jigi dalen b’u kan o kosɔn. Minisiri ko laɲinin ye kumaɲɔgɔnyaw kɔfε, hakiila ɲumanw ka dajira yεlεma ɲuman donni na sεbεn in cogoya la.

 Hakililajigin na, labεnni sariya dɔ dilanni kofɔlen don sariyasunba kɔnɔ. A laɲinin ye ka faranfasiya di yɔrɔ dɔw kan, walima k’a sariyasen dɔw dafa. Labεnni sariya ye sariya ye, min bε jamana ɲεmɔgɔw ni maraɲεmɔgɔw ka kεtaw labεncogo an’u labaaracogo dantigε sariyasunba sariyasenw waleyali la. Ka fara o kan, Mali kanko politiki hami ye ka hakilijakabɔ kε an nɔrɔli la an danbe la an ka seko ni dɔnko kɔnɔ, ani an ka laada ɲumanw ladonni na. Sabula an ka jamana kɔrɔw ni fanga kɔrɔw sera ka mara ni laadaw ye.

Hakililajigin na, kan 13 de bε Mali kɔnɔ, a bε ka ɲinin minnu forobayacogo an’u cogoyaw ka dantigε u ɲεtaa kama. O kan 13 ye : Bamanankan, Bɔbɔkan (Boore), dɔgɔnɔkan (Dɔgɔsɔ), Fulakan (fulufulde), surakakan (hasaniya), Minyankakan (mamara), Maninkakan, Marakakan, Kɔrɔbɔrɔkan (sɔngɔyi), Sεnεfɔkan (siyenaare), Tamasεkikan, Bosokan (Tiyako) ani Kasɔnkakan.

Umaru SANKARE

Dɔkala Yusufu JARA