Tajiko gɛlɛya kosɔn, taa ka segin tun sennasumanyana kosɛbɛ faaba kɔnɔ. Nka sisan segin kɛra ka taamaw daminɛ kura ye a cogo kɔrɔ la nɔgɔya donnen taji sɔrɔli la tajifereyɔrɔw la. O sababu ɲuman bɔra jamana ɲɛmɔgɔw ani tajitalaw ka cɛsiri la, ka fara jamana lakananbaaw ta kan
Dɔgɔkun caman biisibaasa
kɔfɛ ka da tajiko cogoya kan, Bamakɔ mɔbilitayɔrɔw seginna ka baara daminɛ kura
ye dɔɔnin-dɔɔnin. Kabini dɔgɔkun tɛmɛnnen in, o waleya in b’a la ka kɔlɔsi
Bamakɔ an’a lamini na.
A ko kɛlen bɛ fiɲɛbɔda ye taamadenw bolo ka fara taamako cakɛdatigiw yɛrɛ kan.
U ye foli di jamana ɲɛmɔgɔw ma u ka cɛsiri la tajiko gɛlɛya furakɛli la. Tarata
tɛmɛnnen in, an yaalala ka kɔlɔsili kɛ Bamakɔ kɔnɔ, a yera ko caman bɔra tajiko
gɛlɛya fanga la. Nɛgɛ kanɲɛ 6 tun sera Guwana sugu la. O waati in na julabaw
ani dɔgɔdɔgɔninfeerelaw tun bɛ ka u dafɛkinw magɛn, i n’a fɔ Garantigibugu walima
Sabalibugu.
Dɔgɔkun caman gɛlɛya kɔfɛ, a b’i n’a fɔ taamaw seginnen bɛ ka daminɛ ni fanga
ye. Mankan tun cilen bɛ ka don ɲɔgɔn na Sotaramatayɔrɔw la ani katakatanintayɔrɔw
la, bɛɛ b’a la k’a ka kiliyanw ɲinin. An tun famana o ɲɔgɔnna ma a bɛ dɔgɔkun
damadɔ bɔ ; mɔbiliw tun tɛ tɛmɛn damadɔnin kan siraw kan. Saka ye
Sotaramabolila ye, o y’a jira ko ale tun y’a taayɔrɔ surunya k’a sababu kɛ taji
sɔrɔli gɛlɛya ye. Nka ko kabini gɔfɛrɛnaman ye dabali kuraw sigi senkan, yɛlɛma
ɲuman donna baara kɛcogo la. A ko kabini tarata, ale sera ka siɲɛ 7 kɛ Sabalibugu
ni Guwana cɛ. Wa ko a jigi b’a kan ko kow bɛna segin u cogoya kɔrɔ la sɔɔnin, u
ka se ka siɲɛ caman sɔrɔ ka tɛmɛn o kan.
Salimata Tarawele ye
jagokɛla ye, o y’a ka nisɔndiya jira mɔbiliw sɔrɔli la siraw fɛ ka caya sisan. A
ko tajiko gɛlɛya waati la, ni Sotarama dɔ tun y’i dan kaban, i bɛ sanga 30
ɲɔgɔnna k’o kɔfɛ sanni dɔwɛrɛ ka na. K’o tun bɛ fiɲɛ bila ale ka jago cogoya la
kosɛbɛ, tuma dɔw la mɔbiliko gɛlɛya fɛ, mɔgɔ mugan ni kɔ tun bɛ wajibiya ka don
k’u sogolon ɲɔgɔn kan mɔbili kelen kɔnɔ, fo dɔw b’u dulon da la. Nka o bɛɛ la,
fɛn ma fara taamasaraw hakɛ kan, doniw tasara kɔni tun cayara.
Ayisata Sisɔkɔ ye
talɔnferela ye Kalaban-Kulubilennin na, a ko don o don ale tun bɛ sefawari
dɔrɔmɛ kɛmɛ duuru (d500) don taa ka segin dafɛ u ka kin ni Bamakɔ suguba cɛ. Kasɔrɔ
sanni tajiko gɛlɛya tun ka daminɛ dɔrɔmɛ kɛmɛ saba (d300) de tun don. A ka fɔ
la, an bɛ don min na yɛlɛma ɲuman b’a la ka don kow cogoya la, takisi bɛ sɔrɔ
nɔgɔya la. Lasana Jara ye takisibolila ye, ale fana y’a ka don gɛlɛn
tɛmɛnnenw baro bɔ. A ko mɔbilibolila dɔw tun ye baara jɔ. Ka da a kan ko i tun
bɛ se ka lɛrɛ fila jalen kɛ u jɔ-jɔlen bɛ ɲɔgɔn kɔ taji nɔfɛ. O la, bi ale bɛ
dabali kura tigɛlenw foli kɛ, taji bɛ sɔrɔ teliya la a sɔngɔ kɔrɔ fana na, mɔgɔ
tɛ si k’i jɔ tajifeereyɔrɔw la taji nɔfɛ tuguni.
Taamako cakɛda « Air
Zana » ka mɔbiliw bɛ Bamakɔ ni sigida dɔw cɛ, i n’a fɔ Dɔyila ani Masigi. Tajiko
gɛlɛya kosɔn olu tun ye dɔ bɔ u ka kaariba hakɛ la, k’a bɔ 6 la k’a to 2 ma don
o don (n’o ye minnu tun bɛ wuli lɛrɛ 9 ani lɛrɛ 13 tɛmɛnnen in sanga 30 ye).
Mahamadu Kamara y’o cakɛda in mɔgɔ ye, min y’a jira ko yɛlɛma ɲuman donna taji
sɔrɔli la o bɛ dɔgɔkun kelen ɲɔgɔnna bɔ bi. A ko sisan taji bɛ sɔrɔ hali ni
mɔgɔw bɛ muɲun ɲɔgɔn kɔrɔ a nɔfɛ halibi. Tajifeerela dɔw bɛ dan sagon sɔngɔko
la o de ka jugun a ko la, sabula o bɛ degun lase taamadenw ma. Mari Hamadu
Sumarɛ ye taamako cakɛda « Air » Ɲɔnɔn mɔgɔ ye Ŋoloninna Bamakɔ, o
y’a jira ko kow ma segin u cogoya kɔrɔ la koɲuman halibi, ka da a kan ko kɔrɔlen,
nɛgɛ kanɲɛ 6 ani a kanɲɛ 10, olu tun bɛ se ka kaariba 6 bɔ ka tugu ɲɔgɔn kɔ.
Nka sisan u tɛ ka se ka
tɛmɛn kaariba 2 kan tile kɔnɔ fɔlɔ. Nka ko dabali kura min tigɛlen filɛ, a ka
ca a la o bɛna nɔgɔyaba don kow cogoya la. Ko gasiwali sɔrɔli bɛ ka nɔgɔya ani
ko a jigi b’a kan ko a bɛna nɔgɔya kosɛbɛ ka tɛmɛn nin bɛɛ kan don nataw la.
Kasimu Kulubali ye
taamako cakɛda dɔ fana mɔgɔ ye, a ko n’i tun b’a fɛ ka gasiwali san Kucala, i
tun wajibiyalen don ka sefawari dɔrɔmɛ kɛmɛ saba ni bi duuru (d350) bɔ a litiri
kelen nɔfɛ, yɔrɔ dɔw yɛrɛ la dɔrɔmɛ kɛmɛ naani (d400). Kaariba kelen dun bɛ se
ka gasiwali litiri 300 min Kucala ni Bamakɔ cɛ taa ka segin na. O n’a ta bɛɛ,
olu ma fɛn fara taamasara hakɛ kan.
Nin don labanw na,
gɔfɛrɛnaman ye cɛsiriw kɛ taji kɛcogo la ka taajifeerɔrɔw labɔ Bamakɔ kɔnɔ. O
siratigɛ la, gɔfɛrɛnaman ani tajitalaw ye bɛnkan kɛ u ni ɲɔgɔn cɛ juma tɛmɛnnen
in na, o bɛnkan kɔnɔ sitɛrinin tun bɛ lɛrɛ 72 de kɛ depo la, dɔ bɔra o kuntaala
la k’o kɛ lɛrɛ 24 ye.
Ntɛnɛndon a kɔlɔsira k’o
waleya in bɛ ka labato (Omap) la. Jago ni izininko minisiri Musa Alasani Jalo
y’a jira ko kabini bolonɔ bilala bɛnkan in na, sitɛrinin 114 minnu tun donna
depo la, 110 ma tɛmɛn lɛrɛ 24 kan yen. O b’a jira ko bɛnkan bɛ ka labato, wa a
nafa bɛ ka kɔlɔsi. Jago ni izininko minisiri ka nin taama in bɛnna ni sitɛrinin
200 wɛrɛ dontɔ ye Bamakɔ. Musa Alasani Jalo y’a jira fana, k’o waati kelen y’a
sɔrɔ sitɛrinin 900 wɛrɛ bɛ sira fɛ ka na. A ko laɲinin tɛ dɔwɛrɛ ye jɔli janba
min bɛ kɛ taji nɔfɛ tajifereyɔrɔw la ka se k’o dabila.
Dɔkala
Yusufu JARA
Mahawa DANBƐLƐ
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
