Jamana polisiya : Komisεri 232 kura ka kalanw kuncεra

Mali furancεlafanga jamanakuntigi Kolonεli Asimi Goyita ye Mali polisikulu 18nan tɔgɔdali lajε ɲεmɔgɔya kε jumadon ɔkutɔburukalo tile 27 san 2023 polisikalanso « Amadu Ture la » n’a bε wele Gandi. Minisiriɲεmɔgɔ D^r Sogεli Kokala Mayiga, furancεlafanga bulonba kuntigi Kolonεli Maliki Jawu, basigi ani siwiliw lakananni minisiri zenerali de birigadi Dawudu Ali Mohamedini, ani Mali polisiw ɲεmɔgɔba komisεri zenerali de biribadi Sulayimani Tarawele, olu tun b’a kεnε kan.

Mali polisikulu 18nan tɔgɔ dara « Ala m’an hinεna εnsipεkitεri zenerali Aliyuni Badara Jamuntεnε » na. Polisi 232 kura don ; muso 34 b’u cεla. Kalo 7 kuntaala kɔnɔ, u kalanna polisiw kuntigiya taabolow la.

Lajε in senfε, komisεriya jala ani npanmuru dira u ma. Jalatigiya taamasiyεn y’olu ye.

U bɔtɔ ye kiimεni laban min kε, Komisεri Sunkalo Umaru Jara kεra ŋana ye o la ni kuru 15,10 ye, kuru mumε 20 ɲininta kan.

 Yanni ka se jaladi ma komisεri kura ninnu ma, kɔntorolεri pεrεnsipali de polisi Isa Fɔnba min ye polisiya kalanyɔrɔ ɲεmɔgɔba ye, o ye ɲεfɔliw kε u tɔgɔ dara cεba min na, o ka ɲεnamaya kan ; ka sɔrɔ ka laadilikan kεrεnkεrεnenw di u ma u jɔyɔrɔw facogo ɲuman na. O kɔfε u kelenna y’u kali jamanakuntigi ani Mali darapo kɔrɔ, k’u bε sariya bonya ani k’a bonyani wajibiya, ka polisiya tɔgɔ duman to a la, ka fasobaara kε ni laadiriya ani bonya ye , ka fasodenw ka hakεw lakanan ; wa u t’u ka fanga jira mɔgɔ la, fo ni o kεli kεra wajibi ye u kan waati min na.

Mali polisiw ɲεmɔgɔba ye foli ni tanuni lase furancεlafanga jamanakuntigi ma a ka cεsiri la yεlεma ɲuman donni na lakananbaaw dabolo la. Polisiw niyɔrɔ ye min ye kεlεdagaw la, o kunnafoniw an’u kalanw dira u ma. A y’a jira ko kojugubakε kεlεli ye don n’a dugu jε baara ye. O siratigε la, a y’a ɲinin komisεri kuraw fε, u k’u ɲεmada kosεbε, ani k’u janto u yεrε la. Jamanakuntigi y’a seko jira ni baarakεminεn nafamaw laseli ye lakananbaaw ma, ani ka polisisow jɔ ; fama tun kεra o waleyaw ma Mali kɔnɔ lakananko la.

Furancεlafanga jamanakuntigi Kolonεli Asimi Goyita y’a jira a ka kɔrɔfɔw la, ko Mali polisikulu 18nan bɔli, o ye donba ye Mali kɔnɔ ; sabula a bε dɔ fara basigi sabatili waleyaw fanga kan ka taa a fε. Lakananko nasira la, jɔyɔrɔba bε polisiw la ; ka da a kan olu ni siwiliw de donnen don ɲɔgɔn na kosεbε. O la, a ɲuman ye u ka wasa baarakεminεnko la ani faamuko ɲuman kalanw na.

Jamanakuntigi y’a jira ko nin y’a siɲε fɔlɔ ye kabini polisiw bilala sɔrɔdasiya minεn kɔnɔ, komisεrikulu kura ka bɔ. Fasodenw ka laɲinin dɔ tun ye nin ye sigikafɔba senfε ; o min kεra san 2021 desanburukalo kɔnɔ. A sɔrɔla k’a ɲinin komisεri kura ninnu fε, u k’u jɔyɔrɔ fa a ɲεma jamaɲεmɔgɔya siratigε la jamana basigili kama.

U tɔgɔ dalen filε mɔgɔ min na, n’o ye Ala m’an hinεna Aliyuni Badara Jamuntεnε ye, o mankutura ni jogo ani danbe min ye, u k’u jilaja ka to o tɔgɔ duman kɔrɔ. Sanga kelen taasibila kεra ka ɲεsin mɔgɔw ma, minnu ni tora an ka jamana kunmabɔli kεlεw la.