Nɛgɛ kanɲɛ 20 tun tɛmɛnna ni sanga 57 ye jumadon ɔkutɔburukalo tile 11 san 2024 « 26Mars » la, Uruwanda jamanaden Samuyɛli Uwikunda bɛ file laban fiyɛ tuma min na Mali ni Gine-Bisawo cɛ, KANI 2025 ɲɛbilantolantanw tile 3nan na.
O filekan in ma dogo Maliden si la. A kɛra kunnadiya ye ; sabula Tɔmu Sɛnfiye, Sɛgɛw degelikaramɔgɔ ni Bɛliziki jamanaden don, a n’a ka cɛdenw sera k’u kologɛlɛya Gine-Bisawo ɲɛ, u ye bi kelen min don Ɛli Bilali Ture fɛ sanga 62nan na, o ji kana se ka bɔ.
Balontan bilala a bila tuma na, o bɛnna Sɛgɛw ɲɛmɔgɔ Iwu Bisuma n’a tɔɲɔgɔnw ma kosɛbɛ ; sabula taali dɔ la Mozanbiki, Mali tun ye filaninbin kɛ 1-1, a ni Ɛsiwatini fana cɛ, o labanna Mali ka 1-0 la.
Sɛgɛw ka binin kelen ani balo tancogo ma se ka u senkɔrɔmadonbaaw jigisigi. Nka an bɛ se k’a fɔ ko wasa kɛra ; sabula kabini san 2023 nowanburukalo tile 17 ni Mali ye sebaaya min sɔrɔ Cadi kan 3-1 san 2026 kupudimɔni ɲɛbilantolantanw tile 1lɔ la, a tun famana sebaaya sɔrɔli ma. Mali bɛ jɔyɔrɔ fɔlɔ la kulu I kɔnɔ ni kuru 7 ye Mozanbiki ɲɛ. O ta ye kuru 5 ye ; ale ni Ɛsiwatini ye filaninbin kɛ u yɛrɛ bara 1-1. Gine-Bisawo bɛ jɔyɔrɔ 3nan na ni kuru 3 ye. Ɛsiwatini ye jɔyɔrɔ 4nan ye ni kuru 1 ye. O bɛ Ɛli Bilali Ture n’a tɔɲɔgɔnw ka nisɔndiya jirakun bɔ u senkɔrɔmadonbaaw la kɛnɛ kan ntolantan kuncɛlen.
Mali ka bi donna Mozanbiki la sɛgɛnnabɔ kɔfɛ sanga 62nan na. Adama Tarawele « Maluda » min donna kɛnɛ kɔnɔ kɔfɛ, o de ye balon min latɛmɛn Ɛli Bilali Ture ma, o kɛra bi ye. N’o tɛ Mali tun famana sebaaya sɔrɔli ma.
Ni Sɛgɛw ɲɛmɔgɔ Iwu Bisuma n’a tɔɲɔgɔnw sera ka Gine-Bisawo gosi bi ntolantan na, u bɛ sɔn ka sebaaya sɔrɔ KANI 2025 kupu janjo taali la. Ɛsiwatini ni Mozanbiki fana bɛ ɲɔgɔn sɔrɔ bi, Afirikidisidi jamana na.
Dɔkala Yusufu JARA
Laji M Jaabi
Dɔkala Yusufu Jara
Rencontre sur l'AES.
Rencontre Primature.
VBG.
Conseil des ministres.
Amélioration de la crise du carburant.
Arbitres.
