Bεnkan kɔnɔ UNTM ka lajεba 14nan senfε, min kεra
jumadon awirilikalo tile 26 san 2024 Bamakɔ lajεkεsoba CICB la, Yakuba Katile min tun ye biro kɔrɔ sekeretεri zenerli ye, a sugandira ka sigi a yεrε nɔ
na san 5 kuntaala sarati kama.
Tile fila baara lajε in ɲεmɔgɔya
tun bε baarako, gɔfεrεnaman baarako, hadamadenya fɔkabεn minisirisi Dr
Fasun Kulubali bolo. Afiriki kelenya lafasatɔ (Oussa) sekeretεri zenerali
Areziki Mεsihudu, Afiriki jamana dɔw ka lafasatɔnw sekeretεri zeneraliw, i n’a
fɔ Burukina Faso ni Nizεri, olu tun b’a kεnε kan.
UNTM sekeretεri zenerali bε
biro kunna, min mɔgɔ hakε ye 53 ye. AMAP lafasatɔn sekeretεri zenerali y’a
kunnafonidila ye. Yakuba Katile ka ɲεfɔli la, nin lajεba in kεra demokarasi kɔnɔ ;
jama de y’a fanga fara ɲɔgɔn kan ka bεn kelen ma. A ko kabini UNTM sigira
senkan, a ka wulikajɔ ma kε fosi ye ni fasojama haminanko ɲεnabɔli tε ;
kabini jamana m’a ka yεrεmahɔrɔnya sɔrɔ fo sisan.
Yakuba Katile y’a jira ko
lajεba in senfε, u ye Mali gεlεya sεbεkɔrɔ fεsεfεsε, ka mɔgɔw sendoncogo dɔn a
la, ka fara lafasatɔn dɔw ka yεlεma-yεlεmani kan. A k’u ye sigikafɔ minnu kε,
olu sera k’a to u ka yuruguyurugu, masurunnamɔgɔko baaraw la, ani ɲεnawolomani
kεlεli jaabiw cogoya dɔn, ka fara cεsiri minnu kεra baara sɔrɔliko la. Sannifεnw
sɔngɔw gεlεyali baarakεlaw ma, kuma kεra nin bεε kan.
Furakεcogo minnu dantigεra ani
laɲinin minnu kεra, olu bεna kε sinsinnan ye biro kura ka san 5 sarati kuntaala
kɔnɔ, Yakuba Katile ka fɔ la. A ye foli ni tanuni lase a teriw ma, basigibaliya
gεlεyaw n’u ta bεε, u sera ka Bamakɔ lasɔrɔ nin lajεba in na. O de ye badenya
ani teriya jεlen ye, a bε ɲɔgɔndεmεn kofɔ. A ye foli di Burukina Faso ni Nizεri
lafasatɔnw sekeretεri zeneraliw ma u yeli la nin kεnε in kan ; ka da a kan
u ni Mali bε ɲɔgɔn bolo AES kɔnɔ. A ye layidu ta, ko ni Ala sɔnna, lafasatɔnba
bεna sigi AES tɔgɔ la.
Baarako, gɔfεrεnaman baara ani
hadamadenya fɔkabεn minisiri ka fɔ la, kɔrɔfɔw cogoya kama nafako la, o b’ale
bila k’a jira ko baara ɲεna. A k’u bɔra ka cεw ni muso minnu bila biro kɔnɔ jɔyɔrɔw
la, i b’a sɔrɔ o dannaya de b’u kan. O siratigε la, ale b’a ɲinin u fε, u k’o jɔyɔrɔw
fa a ɲεma, UNTM ka tɔgɔdiya kama.
Dr Fasun Kulubali ka
fɔ la, gɔfεrεnaman bε jamanadenw ka gεlεya kalama ; kεrεnkεrεnnenya la,
baarakεlaw ta. O de kosɔn a bε ka san 2021 feburuyekalo tile 5 sigikafɔ laɲininw
ta ba la dɔɔnin-dɔɔnin a ka baarakεnafolo kɔnɔ. O ye bεnkan ye, min tεmεnna gɔfεrεnaman
ni Mali makobatigiw ka jεkuluba (CNPM) ani UNTM cε, ka fara bεnkan wεrεw kɔnɔkow
waleyali kan.
Lajεkεlaw ye UNTM biro kɔrɔ mɔgɔw
ka seereyaw lamεn, ka kala turu u kan. O baara ɲuman kεli lakodɔnsεbεn kεra k’a
bεε jansan.
Cεjε Dunbiya
Dɔkala Yusufu JARA
Dɔkala Yusufu Jara
Rencontre sur l'AES.
Rencontre Primature.
VBG.
Conseil des ministres.
Amélioration de la crise du carburant.
Arbitres.
