Furancɛlafanga bulonba kɔnseyejɛkulu jɛnna alamisa desanburukalo tile 12 san 2024, ni Mali ka san 2025 baarakɛnafolo fan fɔlɔ bolodalen ye. A baaraw ɲɛmɔgɔya tun bɛ bulonba kuntigi Zenerai de kɔri darimɛ Maliki Jawu bolo. Nafoloko ni wariko minisiri Aluseyini Sanu de tun b’a la ka sariyasɛbɛn in lafasa kɔnseyew ɲɛkɔrɔ. Jamana jɔli kura minisiri Bakari Tarawele ka ɲɛsin gɔfɛrɛnaman ni fangabulonw cɛ koɲɛnabɔ ma, o tun b’a kɛnɛ kan.
San 2025 wariko sariyasɛbɛn in kɔnɔ, a jiralen don ko Mali ka baarakɛnafolo ɲɛsigilen sɔrɔw ni musakaw ye sefawari miliyari 3.229,886 ye ; kasɔrɔ san 2024 ta tun ye miliyari 3.070,740 ye ; jigin kɛra o jukɔrɔ ni miliyari 159,146 ye. Kandili minnu kɛlen don a ko la, o bɛ se sefawari miliyari 972,754 ma san 2025 baarakɛnafolo in na ; kasɔrɔ o tun ye miliyari 943,756 ye san 2024 ta la. Yɛlɛn kɛra o ni san cɛ ni miliyari 28,998 ye.
San 2025 baarakɛnafolo bolodalen in na, musakaw bɛ bɛn miliyari 3.107,247 ma ; o la musaka ɲɛsigilenw (depansi ɔridinɛri) ye miliyari 2.389,999 ye, a tɔ miliyari 717,248 ye depansi kapitali ye. Musaka minnu dabɔlen bɛ san 2025 depansi ɔridinɛriw sarali kama, o ye miliyari 2.389,999 ye ; kasɔrɔ o tun ye miliyari 2.323,248 ye san 2024 ta la. Yɛlɛn kɛra o ni san cɛ ni miliyari 66,751 ye.
Jigi dalen don sɔrɔ minnu kan baarakɛnafoloko in na, o ye sefawari miliyari 2.648,900 ye ; kasɔrɔ jigi tun dalen bɛ hakɛ min kan san 2024 ta la, o ye miliyari 2.387,872. Wari sɔrɔta yɛrɛ (eresɛti zenerali) bɛ se sefawari miliyari 2.526,261 ma ; kasɔrɔ o tun ye miliyari 2.265,402 ye san 2024 ta la. Yɛlɛn kɛra o ni san cɛ ni miliyari 260,860 ye.
Wusuruko sɔrɔw n’o ye lɛnpo minɛtaw ye, olu kiimɛna ka se sefawari miliyari 2.334,491 ma san 2025 in na ; kasɔrɔ o tun ye miliyari 2.071,369 ye san 2024 ta la. Yɛlɛn kɛra o ni san cɛ ni miliyari 2.63,122 ye. O sababu bɔra sɔrɔ minnu bɛna kɛ ka da dugujukɔrɔfɛnko sariya kɔnɔko waleyali kan ka fara wariw sarali ɛntɛrinɛti sira fɛ, o musakaw kan.
Jigi dalen bɛ wari sɔrɔta minnu kan k’a sɔrɔ wuruko sira tɛ, o kiimɛna ka se sefawari miliyari 24,403 ma san 2025 baarakɛnafolo la ; kasɔrɔ o tun ye miliyari 21,525 ye san 2024 ta la ; jigin kɛra o jukɔrɔ ni miliyari 2,878 ye. Baarakɛnafolo wari sɔrɔta wɛrɛw ye wari minnu bɛna sɔrɔ Mali ka minɛnlamarayɔrɔ la Sɛnɛgali, Kɔnɔwari, Togo, Lajinɛ, Gana, Moritani ani Benɛn batondankanw na. Jigi dalen don sefawari miliyari 8,903 kan san 2025 in kɔnɔ ; kasɔrɔ o tun ye miliyari 8,684 ye san 2024 ta la. Sɔrɔ minnu bɛna kɛ faso wagandeba la, jigi bɛ sefawari miliyari 113,736 kan san 2025 in na ; kasɔrɔ o tun ye miliyari 113,786 ye san 2024 ta la.
Kalosara minnu bɛna di lakananbaaw, siwiliw, sigidaw tɔgɔla baarakɛlaw ma, o bɛ se sefawari miliyari 1.056,105 ma san 2025 kɔnɔ ; kasɔrɔ o tun ye miliyari 1.055,031 ye san 2024 ta la. Baarakɛminɛn santaw ani baara kɛtaw musaka min tun ye miliyari 566,799 ye san 2024, o kɛra miliyari 652,518 ye san 2025. Wariko doni sarataw ye sefawari miliyari 214,468 ye ; kasɔrɔ o tun ye miliyari 223,049 ye. Jamanakɔnɔjuru miliyarai 173,311 tata ani kɔkanjuru miliyari 41,157 tata nafaw (ɛnterɛ) sarali kama.
Kalata jɛkulu kɛrɛnkɛrɛnnen « Aige » baarakɛlaw- Kabini san 2022, jamana jɔli kura waleyali musakaw talen don ba la baarakɛnafolo kɔnɔ. Wa tɛmɛn bɛ kɛ n’o ye san 2025 in baarakɛnafolo fana kɔnɔ n’a wari sarataw ye an’a wari kɛrɛnkɛrɛnnen sarataw ye. Mali ka san 2025 baarakɛnafolo bolodalen kɔnɔ, sefawari miliyari 2025, 80,750 ɲɛsigilen bɛ kalataw musakakow kama, ani miliyari 17,297 wɛrɛ sariyasunba ye jɔsen minnu sigili kofɔ, olu musakaw sarali kama, ka fara kɔlɔsilikɛ cakɛda minnu ɲɛsinnen bɛ yɛlɛma donni ma fangabulonw cogoyaw la, o musakaw kan. Kalata jɛkulu kɛrɛnkɛrɛnnen « Aige » yɛrɛ ka baaraw musaka sarata ye miliyari 6,093 ye.
Lafasa ni basigi hukumu kɔnɔ, dɔ farala o minisirisow ka musakaw kan ka tɛmɛn u san 2024 taw kan. Lafasa, sɔrɔdasi kɔrɔw minisiriso ta ye miliyari 485,059 ye ; kasɔrɔ o tun kɛra miliyari 472,661 ye, ka laban k’a yɛlɛn ka se miliyari 565,706 ma san 2024 kɔnɔ. basigi ni siwiliw lakananni minisiriso ta ye miliyari 184,885 ye ; kasɔrɔ o tun ye miliyari 195,192 ye ; wa fɛn ma fara o hakɛ in kan san 2024 tɔ kɔnɔ. Baarada kura minnu sigira senkan, olu fana labaarali musaka miliyari 0,986 talen don ba la san 2025 baarakɛnafolo kɔnɔ.
Kɔnseyew ye minisiri ɲininka dugujukɔrɔfɛnko sariya kura bɛna nafa min ladon gɔfɛrɛnaman kun sɔrɔ yiriwali nasira la. Jaabili la, Aluseni Sanu y’a jira ko gɔfɛrɛnaman ye fɔkabɛn kɛ o la, fo ka sefawari miliyari 750 ɲɔgɔnna layidu sɔrɔ. Fɛn min ye a nafa ye san 2025 baarakɛnafoloko la, minisiri ka fɔ la, o ye miliyari 1.025 ye.
O bɛna ni miliyari 600 sɔrɔli ye baarakɛnafoloko la ka tɛmɛn san tɛmɛnnenw kan. Fɛn min ye sigida kɔnɔko sariya fanfɛla ye, minisiri y’a sɛmɛntiya ko k’a sababu kɛ dugujukɔrɔfɛnko cakɛda 10 ɲɔgɔnna ye, miliyari 2.500 bɛna se ka kɛ nɔgɔyada ye Malidenw ka dugujukɔrɔfɛnko cakɛdaw ma. Aluseni Sanu ye jigisigi kɛ ko san 2025 baarakɛnafolo mabɛnnen don ; wa ko dɔ b’a la ka bɔ baarakɛnafolo dɛsɛliba la.
Woteliw kɛra dakun ni dakun, a cogoya kɔrɔ la. Bulonba kɔnseye 125 minnu tun bɛ kɛnɛ kan, o bɛɛ jɛnna ni Mali ka san 2025 baarakɛnafolo sɔrɔ bolodalen ye, 127 jɛnna ni a musaka bolodalenw ye, 128 jɛnna ni faso wagandeba ka jatew ye, 128 jɛnna ni faso wagandeba ka sɔrɔw ye. 129 jɛnna ni baarakɛkɛnafoloba musakaw sanfɛdan bolodalen ye, 131 jɛnna ni farankanw ye baarakɛnafoloko la. Ani fana hakɛ min sigilen don mɔgɔw tali la gɔfɛrɛnaman ka baarako la, faso wagandeba doniw kiimɛni ani baarakɛnafolo bɛna dɛsɛ ni hakɛ min ye, jɛn kɛra n’o bolodacogow ye kɔnseye 129 fɛ, minnu tun b’o kɛnɛ kan.
Nin y’a sɔrɔ bulonba kɔnseyew jɛnna ni sariya ŋaniya sirilen dɔw ye ; i n’a fɔ min bɛ basigi ni jisigi kan nimafɛnko la ani poroze min bɛ tile kuranko cakɛda (Anerb) sigilila senkan. Sariya fɔlɔ tun kɔkɔrɔmadonnen don lamini, lasaniyali ani yiriwali kuntaala jan minisiri Madamu Dunbiya Mariyamu Tangara fɛ. Sariya filanan lafasabaa tun ye yeelenko ni jiko minisiri Bubakari Janɛ ye. Kɔnseye 128 minnu tun b’o kɛnɛ kan, o bɛɛ jɛnna n’o sariyaw ye.
Dɔkala Yusufu JARA
Jedone JAMA
Dɔkala Yusufu Jara
Femme de Siby.
Coupe UEFOA U17.
Coupe UEFOA.
Coupe de la confédération.
Pénurie de carburant au Mali.
Conseil des ministres.
