Tuma dɔw yɛrɛ la, a kunnafoni caman ye sigimajɔkumaw ye kɛnɛyako, kiiriko, walima dɔw ka kelennakow fana kan. Ka da nin danbetiɲɛ waleya ninnu kɔlɔlɔ jugu kan, cakɛda min ɲɛsinnen bɛ mɔgɔ bugunnatigɛ gansili dabilali ma, o ye hakililajigin kɛ, ko nin kunnafoni suguyaw gansili yamaruya tɛ mɔgɔ wɛrɛ si bolo, fo n’a kɛra kunnafonidila yamaruyalenw ye, wa u ka baara hukumu kɔnɔ dɔrɔn, i n’a fɔ sariya n°00-046 min tara zuluyekalo tile 07 san 2000, o b’a jira cogo min na kunnafonidi dansagonw kan.
O siratigɛ la, cakɛda in bɛ hakililajigin kɛ ko, fo n’a bɔra kunnafonidila yamaruyalenw na, mɔgɔ wɛrɛ bugunnatigɛ gansili sariya kɔkan, o ɲangicogow dantigɛlen don nin cogo la. A tigi ka alimani sarata bɛ se k’a daminɛ sefawari miliyɔn 5 la, ka se 20 ma. O dama tɛ, a bɛ se ka kiiri fana ka kɛɲɛ ni ɲangili sariya n°2019-056 kɔnɔko ye dansagonwalew kunkan erezo sosiyow kan.
O hukumu kɔnɔ, (APDP) b’a ɲinin mɔgɔw fɛ, bin kɛra minnu kan, ani bin b’a la ka kɛ minnu kan k’u danbe tiɲɛ erezo sosiyow kan, u ka kofɔli kɛ, sariya bɛ se ka jɔ u kɔkɔrɔ yɔrɔ minnu na.
Dɔkala Yusufu JARA
Aboubacar TRAORE
U ka wulikajɔw hukumu kɔnɔ jamana lafasali siratigɛ la, Mali sɔrɔdasiw b’a la ka sebaayaw sɔrɔ dɔrɔn kojugubakɛlaw kan ka taa a fɛ..
Kojugubakɛlaw kɛlɛli wulikajɔw bɛ sen na Mali sɔrɔdasiw fɛ. O siratigɛ la, u tigɛlen don a kan k’u bɛ faso dugukolo mumɛ lakanan fo ka se a dan na. U b’a la k’u daji, k’u dagayɔrɔw tiɲɛ jamana fan caman fɛ.
Furancɛlafanga faamaw wulilen don k’u jɔ, min b’a to basigi bɛ se ka don hadamadenya ko bɛɛ la ; kɛrɛnkɛrɛnnenya la, Bamakɔ faaba kɔnɔ. o min ye Mali yeyɔrɔ fɔlɔ ye diɲɛmaa bolo..
