Ɲɔgɔndεmεn kalo : Jamanakuntigi Asimi Goyita ye laada latilen bεε la mɔgɔkɔrɔba bara

 Kεnεyako ani hadamadenya sabatili minisiri Kolonεli Asa Bajalo Ture, ɲɔgɔndεmεn kalo denba Madamu Ture Lɔbɔ Tarawele, ka fara maaba caman wεrεw kan, olu tun bε kεnε kan.

Nεgε kanɲε 16 tεmεnnen ni sanga 40 ɲɔgɔnna ye, jamanakuntigi sera san kεmε ni kɔ maakɔrɔba in bara, k’o nisɔndiyabaatɔ sɔrɔ a ɲε. Basan nuguji sanankolen tun b’a kanna, ka disa jεman biri o kan, kɔlɔsi b’a bolo. Musokɔrɔba san 114 in b’i n’a fɔ kεnεyako dεsε b’a la bi. Kologεlεyaba t’a la tuguni. Nka si hakε kɔrɔya n’a ta bεε, Mayimuna Sangare kannεgε ka di halibi. A ye dugawu kε jamanakuntigi Kolonεli Asimi Goyita ye.

A yεrε ka fɔ la, kabini a denmisεnnama, jago misεnnin de tun ka di a ye ; wa, a tora o la fo ka se maakɔrɔbaya ma. Nka, Ala la, a ɲεw minεnen don a la o bε san tan bɔ bi. Cεsabaatɔ fana don o bε san bi saba bɔ. Mɔgɔ basigilen don, arajo lamεnni ka di a ye. Mayimuna Sangare ye den naani sɔrɔ ; musoman kelen b’o la. Naji ani nɔnɔ de y’a sagoladunfεnw ye sisan. Nin bɔnye in senfε, a ye jamanakuntigi fo, k’a waleɲumandɔn. A ma ɲε min kɔ, a ye nisɔndiyajira dɔnkilinin da jamanakuntigi la.

O fana ma laada tiɲε. A y’a sɔn sagajigi kelen, birifini kelen, selitapi kelen, kɔlɔsi kelen ani kunnabiriw la, ka laban ka sefawari miliyɔn kelen donbolo k’a ye.

Bamakɔ komini 3nan Meri fana y’a ka donbolo fara o kan. O y’o ci kɔrɔ ye kalo wɔɔrɔ o kalo wɔɔrɔ. Jamanakuntigi ye nin bɔnye min kε Bamakɔ bεε la mɔgɔkɔrɔba la, o kεra sira dilen ye o waleyaw kama ka ɲεsin a ma. Mɔgɔkɔrɔbaw ka koɲεw bilalen don ɲɔgɔndεmεn ni kεrεfεdεn kεlεli dɔgɔkun fɔlɔ kɔnɔ. A masalakun ye : « ɲɔgɔndεmεn, lafiya sɔrɔli la ani basigi ni yiriwali, Mali kura kɔnɔ ».

Ɲininkali dɔ senfε, kεnεyako ani hadamadenya sabatili minisiri Kolonεli Asa Bajalo Ture y’a jira, ko furancεlafanga jamanakuntigi ye ka nin waleya min kε, gɔfεrεnεriw fana b’o la u ka maraw kɔnɔ. A kun ye ka mɔgɔkɔrɔba ninnu maalandiya, ani ka waleɲumandɔn k’u ye, ka laban ka dugawu ɲinin u fε. Ɲɔgɔndεmεn taamasiyεn dɔ don an danbe kɔnɔ.

Mohamεdi Jawara

Dɔkala Yusufu Jara