I n’a fɔ
diɲɛ jamana tɔw, an ka jamana ye musomannin tɔgɔladon diɲɛ kɔnɔ, o laɲɛnamaya
ɔkutɔburukalo tile 11 san 2025 ; jamana ka masalakun tun ye « gɛlɛya waati
ani denmisɛnninw furuli : kɔlɔlɔw ani siniɲɛsigiw ».
Nin don in b’a ɲinin ka mɔgɔw lafaamuya
damakɛɲɛbaliyaw la musomanninw kan
Wulikajɔba in baara
kɛta fanba kɛra muso, den ni denbaya ɲɛtaa minisiri Madamu Jara Jɛnɛba Sanɔgɔ
ye min ɲɛmɔgɔya kɛ Bamakɔ lajɛkɛsoba CICB la ɔkutɔburukalo tile 13 san 2025. A
minisiriɲɔgɔn caman, « Plan Mali » ɲɛmɔgɔba Dirisa Dabone, Unicef ka
ciden Alasani Wedarawogo, olu tun b’a kɛnɛ kan.
Don in b’a ɲinin ka
mɔgɔw lafaamuya damakɛɲɛbaliyaw la denmisɛnninw kan, ka da u ka musoya an’u si
hakɛ kan. Muso, den ni denbaya ɲɛtaa minisiri ka fɔ la, diɲɛmaa ka nin kandili
in msomannin ma, o ye damakasili baaraba tɔnɔ ye jɛkuluw fɛ ani jɛkulu minnu tɛ
politikitɔnw ye, n’u ɲɛsinnen bɛ denmisɛnnin ani suguya bɛrɛmakɛɲɛni hakɛw ɲɛtaa
an’u lakananni ma, « Plan mali » ani Kanada lahɔrɔma kɔnɔ.
Madamu Jara Jɛnɛba
Sanɔgɔ y’a jira ko ɲinan masalakun sugandilen in bɛ sigikafɔba min kɛra ka ɲɛsin
muso, den ni denbaya ɲɛtaako la, o hukumu kɔnɔ, kɛrɛnkɛrɛnnenya la a sigibɔlɔ
3, min y’a to gɛlɛya minnu bɛ denmisɛnninw ni hɛrɛ sɔrɔli cɛ, olu furakɛli sira
ka se ka dantigɛ ; kɛrɛnkɛrɛnnenya la musomanninw.
Sɛgɛsɛgɛli min kɛra
jama ani kɛnɛyako cogoya kan Mali kɔnɔ (EDSM) 2023-2025, salon musomannin 18,6%
minnu si tun bɛ san 17 la, olu tun ye denbatigiw ye, ani muso 46,8% minnu si
tun bɛ san 19 na. Ani fana, musomannin 54% minnu si tun b’a ta san 20 na ka se 24
ma, olu tun furula k’a sɔrɔ u si tɛ san 18 bɔ, ani u 16% minnu si tun tɛ san 15
bɔ. O jate ninnu bɛ hakililajigin kɛ, ko gonin dɔ kɛli la walasa ka se ka yɛlɛma
ɲuman don musomanninw dabolo jugu la. O siratigɛ la, minisiri Jɛnɛba Sanɔgɔ y’a
jira ko an ka kan ka baara kɛ ɲɔgɔn fɛ sigida furaw sɔrɔli la.
Denmisɛnninw ka
bulonba ɲɛmɔgɔ Kunba Jara ye hakililajigin kɛ, ko masalakun in ye musomanninw
haminankoba ye, ka da a kan olu de ye an ka jamana jigi an’a siniɲɛsigi
ye ; nka u fanba bɛ gɛlɛya kɔnɔ, Mali b’ a la ka gɛlɛya min kɛlɛ kabini
san 2012 ani n’o bɛ ka musomanninw bɔgɔ fɛgɛnya ka taa a fɛ.
« Plan Mali »
ɲɛmɔgɔ y’a jira ko nin don in b’a ɲinin janto ka kɛ musomanninw dabolo la, min
b’a to u ka hakɛw ɲɛtaa ka se ka sabati, balan minnu b’u ɲɛ k’olu dantigɛ k’u
furakɛ musomanninw ka se ka hɛrɛ sɔrɔ. Dirisa Dabone ko fana, musomanninw bɛ
dabolo jugu min kan, a tɛ
ɲɛ baara kɛbaaw ani gɔfɛrɛnaman ka cɛsiriw kɔ.
Unicef ka ciden y’a
jira ko gɛlɛya waati la, kɛrɛnkɛrɛnnenya la fɔɲɔgɔnkɔ kɔnɔ, waatiyɛlɛma
kasaaraw kɔnɔ walima sigiyɔrɔbilaw, musomanninw de fɔlɔ bɛ degunw sɔrɔ ;
wa u senkɔrɔma donni ka suman. Alasani Wedarawogo seginna Unicef ka kandili kan
dɛmɛn donni na gɔfɛrɛnaman na musomanninw donni ba la, o baara bolodalenw
waleyali la.
Dɔkala
Yusufu JARA
Aminata
SOUMA
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
