KANI Kɔnɔwari san 2023 : Mali sen bɔra tulon na, dusukasiko

A bε ɲinin ka kε laada ye, sanga ni waati bεε la, Mali ni Kɔnɔwari mana ɲɔgɔn sɔrɔ ntolantan na, dugumara cεbaa caman ye Mali ye. Angilεw ka ntolantanna kɔrɔba Gari Layinekεri ka fɔ la, « ntolantanna ye mɔgɔ 11 ye kεnε kan, nka a bε kuncε Alimaɲi ka sebaaya la ». An bε se k’a fɔ bi, ko hali ni balon koorilen don diɲε bεε bolo, Mali ni Kɔnɔwari cε, a bε cogoya wεrε la ; ka da a kan, tuma bεε la Kɔnɔwari de bε se sɔrɔ. Jatew b’o jira : ɲɔgɔn bεnko 40 na Mali ni Kɔnɔwari cε, Samatasεgεw gosira siɲε 26, Mali ka sebaaya 4, u ye filaninbinko 10 kε.

Mali ka se sɔrɔ Kɔnɔwari kan, o kεra san 1995, o ka ca ni san 25 ye bi. Ni Alimanjamana ka sisεkasidondonya banna bi fɔlɔ, mɔgɔ tε se k’o ɲɔgɔnna bisigiya ni Kɔnɔwari ye a ni Mali cε halibi ; sabula u kε o kε ka ɲɔgɔn sɔrɔ, Mali bε duguma.

Mali k’o dεsε a ni Kɔnɔwari cε, o n’a ta bεε, san 1962 kεra a ni Kɔnɔwari ɲɔgɔn sɔrɔko fɔlɔ ye ntolantan na. A ye Mali gosi o la Bamakɔ 4 ni 0 ; nka Mali gosili min kεra sibiridon feburuyekalo tile 3 san 2024 karidefinali la, o sɔnja na mεεn Malidenw na. Degelikaramɔgɔ Eriki Seku Sεli n’a ka cεdenw sen bɔra ntulon na KANI labεnbaa Kɔnɔwari fε. O yεrε de kεra a sɔnjayɔrɔ ye ; a dusukasi bonyana sekɔrɔmadonnaw kan. Ntolantan sanga 90 mumε kɔnɔ Mali tun bε Kɔnɔwari kan kosεbε.

Mali ye penaliti kelen sɔrɔ sanga 16nan na, Adama Tarawele « Nɔsi » y’o tan k’o jε. Karitɔn bilenman jirala Kɔnɔwari cεden Kosonu na, k’o gεn ka bɔ tɔw cεla. Mali ye bi 1 don sanga 71nan na. O bi donbaa kεra Kɔnɔwarikaden min bε ntolantan na Mali kɔnɔ, Nene Dɔrizelεsi ye, a donnen kura kεnε na. Samatasεgεw ɲεmɔgɔ Hamari Tarawele n’a tɔɲɔgɔnw tun bε se k’u jigi da sebaaya sɔrɔli kan u ni Kɔnɔwari cε nin KANI in na wa ? A tun kεra an ɲεna ko Buwakε ntolantankεnε « lafiya » mεlεkε ɲumanw tun bε ka Kɔnɔwari janfa, ka tugu Mali kɔ. Kɔlɔsili la, Mali cεdenw tun ka ɲi kosεbε n’u ye an ɲεkɔrɔ, wa u tun ka ca ni Kɔnɔwari cεdenw ye kεnε na. K’a daminε Mali jɔda la, ka se cεmancε la fo ɲεfε Kɔnɔwari jɔda la, Samatasεgεw tun y’a bεε minε Kɔnɔwari Samaw na ; nka, u muɲunna ka jateminεw kε, ka baara kε ni hakilisigi ye.

FILIW Da-DARA ƝƆGƆN KAN- I n’a fɔ san 2019 ta cogoya Eziputi, Samatasεgεw tun ye Samaw sεbεkɔrɔ koron, ka kεnε tigε u la, ka laban ka bin Kɔnɔwari jan kɔnɔ. Kɔnɔwari ntolantanna Zεriwino y’o bi kelen don. Nin karidenili min kεra Mali ni Kɔnɔwari cε, a na mεεn Malidenw hakili la. U ye mununmunun dɔw kε Mali jɔda la, min labanna kuru jibɔli la Simɔn Adingara fε sanga 90nan na. O waati de la, an y’a ye a bε ka fɔ Kɔnɔwari senkɔrɔmadonnaw ye, k’u ka wuli ka dusu don u ka ntolantannaw kɔnɔ ka taa a fε. U ka degelikaramɔgɔ Emerise Faye n’a ka cεdenw fariyara ; u tεmεnna ni kow ye Mali ka bisili n'a ta bεε.

U ka degelikaramɔgɔ ye yεlεmani dɔw kε, o fisayara u ma kosεbε. Kuru jibɔli de sɔrɔla o kɔnɔ. Mali ka degelikaramɔgɔ fana ye yεlεmani minnu kε, o ma se ka kε wasa ye ; sabula mɔgɔ kura fila minnu donna Kɔnɔwari fanfε, Mali cεdenw ma se ka kunbεncogo sɔrɔ olu la. Min yεrε y’a tɔ kolon k’a la, o kεra Kamori Dunbiya ni Lasinε Sinayɔkɔ labɔli ye. Kasɔrɔ olu de tun bε ka gεrεntε sigi Kɔnɔwari cεdenw kan. Ibarahima Sisɔkɔ, Iwu Bisuma, Mamadu Fofana, Fuseni Jabatε, Bubakari Tarawele ani Nene Dɔrizelεsi donnen ma kε fura ɲuman ye Samatasεgεw bolo bilen.

Hali n’i y’a sɔrɔ Nene Dɔrizelεsi de ye Mali ka bi kelennin don sanga 71nan na, a ma se ka galabu sɔrɔ o kɔfε bilen. O b’a jira ko mɔgɔ minnu bilalen tun don kεrεfε Eriki Seku Sεli fε, u cogoya tun man ɲi ntolantan in na. Bidonbaantanya faralen o kan, nin bεε kεra Mali binkun ye. Jateminε na, ko caman bε Samatasεgεw jε halibi, min b’a to u bε se ka mεεn ka ntolan tan waati kuntaala jan kɔnɔ. Bi, a jεyalen don ko Mali bε se k’a yεrε suman ni Afiriki ntolantan jamana ŋana bεε ye ; nka, kuma tε yen. Kuma bε bi donni de kan. Min bε ɲinin Samatasεgεw fε, o ye kupu tali de ye ; kuma wεrε t’o kɔfε.

Solomani Bobo Tunkara

Dɔkala Yusufu JARA