Afiriki sennabalontan tɔnba (CAF) ye U17 balontanw bolodacogo kunnafoni lase tarata marisikalo tile 11 san 2025. Jamana tan ni wɔɔrɔ bɛna janjon in kɛ Marɔku. Mali Sɛgɛ fitininw bɛ kulu D kɔnɔ. U ni Angola, Kɔnɔwari ani Santarafiriki bɛ kulu kelen kɔnɔ. Mali bɛ fɔlɔ ka tulon datigɛ ni Angola ye. Degelikaramɔgɔ Adama Jefila Jalo n’a ka cɛdenw b’u bɔko fɔlɔ kɛ tarata awirilikalo tile 1lɔ Kasabilanka farikoloɲɛnajɛkɛnɛ « Berrechid » la ni Angola ye, sanni k’a da se u ni Santarafiriki ma juma awirilikalo tile 4 o kɛnɛ kelen in kan, ka sɔrɔ ka kuluntolantan kuncɛ ni Kɔnɔwari ye awirilikalo tile 7. Degelikaramɔgɔ Adama Jefila Jalo ka fɔ la, u kɛlen ka baara bolodacogo dɔn kaban, k’u ka kulu fana dɔn, k’o bɛ se ka baara nɔgɔya u bolo. A k’u dalajɛra Kabala jumadon marisikalo tile 7, degeliw kama. A k’u bɛ laban ka taa labɛnni tɔ kuncɛ Tunizi k’a daminɛ marisikalo tile 18 na. Mali cidenkulu taali Marɔku, o ye alamisa ye marisikalo tile 27 san 2025. Hakililajigin na, jamana fila fɔlɔ minnu ka kuru hakɛ mana caya ni kulu tɔw ta ye, olu de bɛ yamaruya ni karidefinali balontanw ye, an’u ka kupudimɔni taali. Dɔkala Yusufu JARA Jɛnɛba BAGAYƆGƆ
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
