Mali
bololabaara fɛnw jirali diɲɛmaa na (Siama) o san 2025 ta senfɛ, faso ka fɛn
kɔrɔ marayɔrɔ ɲɛmɔgɔ kɔrɔ ni nowanburukalo denfa fana don seko ni dɔnko san
hukumu kɔnɔ, Dr Samuyɛli Sidibe ye barosigi kɛ dɔgɔkun laban in na Bamakɔ
bolofɛnjira kɛnɛba kan, masalakun tun bɛ Mali ka sisan fɛn dilantaw disidakow
kan.
Seko ni
dɔnko minisiriso ka baarakɛjɛkulu kuntigi ka fara AES seko ni dɔnko baara kɛbaa
caman wɛrɛw kan, nin bɛɛ tun bɛ kɛnɛ kan. Denfa y’a jira a ka kɔrɔfɔ kɔnɔ,
ko dan sigilen don kalanw cogoyaw la seko ni dɔnko nasira la, sanni ka suman
jamana kɔnɔ ani seko ni dɔnko fangabulonw jɔyɔrɔ ka dɔgɔn a ko la. Dr Samuyɛli
Sidibe ye dantigɛli kɛ koɲuman Mali ka sisan fɛn dilantaw cogoya kan. A fɔlɔla
ka hakililajigin kɛ seko ni dɔnko cakɛda kɔrɔw jɔyɔrɔw la kalanko la, olu minnu
kɛra waati kuntaala jan kɔnɔ ni fiyɛbaaw ye kow la. Ani ka ɲɛfɔlinin kɛ, k’o
cakɛda minnu tun bɛ kalanw di u nafa tun ka bon kosɛbɛ. Wa halibi u b’a la ka
tɛmɛn n’o jɔyɔrɔ nafama ye. Seko ni dɔnko dɔnbaalajɛ minnu tɛmɛnna o kalanw fɛ
olu ye seere ɲumanw ye.
Barotigi ka fɔ la, a ɲuman ye ka kɛlenw lakali k’o minɛnw ɲɛ cogoya suman, o
minnu bilala denmisɛn dilannikɛlaw ka bolo kan. Fɛn min ye seko ni dɔnko an’a
kunnafoniko lamaraso sigili ye senkan, Dr Sidibe y’a faranfasiya, k’o cakɛda in
ma dabɔ kabini a jujɔn na dipulɔmu dilan dama kama. A daminɛ na, kalanso tun
don laadatigiw tun b’u ka dɔnniyaw latɛmɛn denmisɛnw ma. Bi, ne ma da a la ko
jɔyɔrɔba b’o laadatigiw bolo tuguni yen. O ye nimisako ye. Ani a ye
hakililajigin kɛ ko hakilijakabɔ ka kan ka kɛ min b’a to seko ni dɔnko an’a
kunnafoniko lamaraso bɛ se ka jɔyɔrɔ ɲuman sɔrɔ ka kɛ kalanminɛn lakiika ye,
min bɛ se ka sisan fɛn dilantaw labalo.
Faso ka fɛn
kɔrɔ marayɔrɔ ɲɛmɔgɔ kɔrɔ in sinsinna o kɔfɛ disidakoba kan : jama kunko. Ale
bolo, seko ni dɔnko fangabulonw jɔyɔrɔba dɔ ye ka sisan fɛn dilannaw jira diɲɛmaa
na. Fɛn kɔrɔ marayɔrɔ, bɔlɔnw ani seko ni dɔnko kalanyɔrɔw b’a ɲinin k’u jɔyɔrɔ
fa, nka sisan fɛn dilantaw selen tɛ ka sangaba sɔrɔ fɔlɔ.
Dr Sidibe ye
damakasili kɛ dɛnkɛrɛfɛ kana kɛ ani ka ba don sanni na jamana kɔnɔ. N’o tɛ a ko
bɛ dankan min na wasako tɛ : sanni tɛ ka kɛ jamana kɔnɔ. Seko ni dɔnko
tigilamɔgɔ minnu b’a la ka wonin ye a ko la, o caman ni diɲɛmaa bolo bɛ ɲɔgɔn
bolo. O siriliba kɔkannan na, a bɛ dan sigi cookoli la yɔrɔ la ani Mali ka
sisan fɛn dilanni senyɛrɛkɔrɔ la. O la a b’a kunbɔ ka sanni fanga bonya jamana
kɔnɔ, ka baara fana kɛ kosɛbɛ an ka se ka ye diɲɛ fana kɔnɔ. Seko ni dɔnko
kɛnɛw sigili fana ye sinsinyɔrɔ ye. A b’a to fɛn dilantaw ka se ka lakodɔn, i
n’a fɔ fotota. O siratigɛ la, faso ka fɛn kɔrɔ marayɔrɔ ye hakilila caman ta, nka
« baara kɛli tariku kɔnɔ, fɛn yetaw la ani seko ni dɔnko ɲɔgɔn kunbɛnbaw fana
kanunen don.
Dr Sidibe ka
fɔ la, sisan fɛn dilantaw ka kan ka senkɔrɔmadon ni dɔnkow ani dɔnniyaw ye. Cɛfɔli
seko ni dɔnko, seko ni dɔnko kalan ani kunnafonisɛbɛnko nasira la, olu ye
wajibi ye min b’a to jama bɛ se ka faamuyali kɛ koɲuman ani ka fɛn dilannenw
k’u yɛrɛ ta ye. A ye hakililajigin kɛ ko Mali ka sisan fɛnw dilanni ɲɛnamayali bɛ
bɔ kalan, sanni, fangabulonw, wulikajɔw ani seko ni dɔnko fanga farali la ɲɔgɔn
kan. O dun tɛ ko nɔgɔn ye ; nka wajibi don min b’a to Mali seko ni dɔnko
bɛ se ka mɛɛn k’a yɛrɛ kofɔ jamana kɔnɔ ani diɲɛ kɔnɔ.
Dɔkala
Yusufu JARA
Gawusu
TANGARA
Dɔkala Yusufu Jara
Page noire.
Sortie de promotion à l'EMIA.
Sport.
Lutte contre les terroristes.
Réunion ministres AES.
Fin des fils devant les stations d'essence.
