Kεnεya ani hadamadenya yiriwali minisiri Kolonεli Asa Bajalo Ture ye baaraw ɲεmɔgɔya kε. Tile fila lajε in ɲεmɔgɔya tun bε kεnεyako ani hadamadenya yiriwali minisiri Kolonεli Asa Bajalo Ture bolo. Burukina Faso kɔkankow ani diɲε tɔnbaw cε koɲεnabɔ minisiri dεmεnni minisiri Karamɔkɔ Zan Mari Tarawele, ani UNHCR ka ciden Mohamεdi Asikiya Ture tun bε kεnε kan.
Lajε in bolila u saba cε kow kan, ka yεlεma ɲuman don a sariyaw cogoya la bεnkanw tacogo la, min b’a to mɔgɔ minnu bε yεrεkunkalifayɔrɔw la, olu bε se ka kɔsegin cogo min na faso kɔnɔ. Burukina Faso minisiri dεmεnni minisiri y’a jira, ko hakilijakabɔ ka kan ka wara kosεbε an cε kow sabatili kama a ɲεma, ani yεlεma kura minnu donna fangabulonw cogoyaw la Burukina Faso, k’olu ta ba la. A ko dabali fεn o fεn bε se ka tigε jaabi ɲuman ka se ka sɔrɔ laɲininw na, o kanunen don.
Diɲε tɔnba ONU bolofara min ɲεsinnen bε yεrεkunkalifalaw kunko ɲεnabɔli ma n’a tubabukan daɲε surun ye (UNHCR) ye, o y’a jira, ko ka kɔseginni to yεrεkunkalifalaw yεrε ka laɲinin ma, k’o de ka fisa ; wa ko o kɔlɔlɔ ka dɔgɔ u kan. Ka da cεsiri min bε sen na jamana kɔrɔnyanfan an’a cεmancεyanfan fε, jεkulu in b’a ɲinin tεmεn ka kε ni fɔkabεnw ye yεrεkunkalifalaw kɔseginniko la u yεrε ma Mali kɔnɔ. A y’a ɲinin Mali gɔfεrεnaman fε, a ka to ka hakilila falenw kε ni Burukina Faso ye a ko la. Mohamεdi Asikiya Ture y’a jira k’u bε jamana fila in ka bila la, dɔ farali la u sekow kan yεrεkunkalifalaw ka koɲεw ɲεnabɔli siratigε la.
A jirala ko kow cogoya yɔrɔ dɔw la, o tε basigi kofɔ Maliden yεrεkunkalifalaw kɔseginni na. Ko a ɲuman ye wulikajɔw ka kε Mali ni Burukina Faso bε cεsiri min na a ko la, k’o senkɔrɔma don, ani k’a to yεrεkunkalifalaw yεrε ka kɔseginni ŋaniya u faso kɔnɔ basigi ani danbe kɔnɔ. Kεnεya ani hadamadenya yiriwali minisiri Kolonεli Asa Bajalo Ture ye hakililajigin kε, ko sεtanburukalo tile 30 san 2023 y’a sɔrɔ Maliden hakε min bε yεrεkunkalifayɔrɔ la, o ye mɔgɔ 85.484 ye.
Ka da nin lajε in ko bolodalenw kan ani jaabi ɲuman makɔnɔtaw, laɲinin ye fura kuntaala jan sɔrɔli ye kɔseginni na faso kɔnɔ. O de kosɔn Kolonεli Asa Bajalo Ture b’a ɲinin jεkulu in fε, a k’a seko damajira kε laɲinin sabatili la ; n’o ye yεrεkunkalifalaw kɔsegincogo ɲuman ye Mali kɔnɔ. A hami dɔ ye lafiya bada-bada ani basigi sɔrɔli ye, min b’a to an baden minnu filε tunga fε, u ka se ka kɔsegin nɔgɔya la. A ko jamana ɲεmɔgɔw bε tulomajɔ la ka hakilila ɲumanw kɔnɔ yεrεkunkalifalaw kɔsegincogo la Mali kɔnɔ ; n’o ye jεkulu in haminanko fana ye.
Fatoumata NAFO
Dɔkala Yusufu Jara
Page noire.
Sortie de promotion à l'EMIA.
Sport.
Lutte contre les terroristes.
Réunion ministres AES.
Fin des fils devant les stations d'essence.
