Wula kɔnɔ baarakɛlaw nisɔndiyabaatɔ bɛ samiyɛ makɔnɔ (sɛnɛkɛlaw, baganmaralaw,
adw.). Nka samiyɛ fana bɛ se ka kɛ jɔrɛ ye a caman bolo ; i n’a fɔ duguba
kɔnɔ mɔgɔw. Bamakɔ, sanji hakɛ caya ye jɔrɛnankoba ye faratimaso tigiw bolo,
kɛrɛnkɛrɛnnenya la minnu bɛ kɔdingɛw kɔnɔ.
Hali ni ji ye ɲɛnamaya ye, bagabagali fana don ɲɛnamaya ma. Sabula, Bamakɔ
kin dɔw kɔnɔ, kabini san mana kulu, denbaya dɔw bɛ u ka minɛnw cɛ ka taa u yɛrɛ
kundogo sigiɲɔgɔnw bara, dɔw bɛ sow ta luwanse la walima ka duguba bila siɲɛ
kelen. Taayɔrɔ bɛɛ dama ka kan olu bolo, min ka gɛlɛn u ma, o de ye kundogoyɔrɔ
sɔrɔli ye ji kasaaraw ɲɛ ani kɛrɛnkɛrɛnnenya la ji kana u bolofɛn bɛɛ daji.
Faso tɔgɔla pilatifɔrɔmu sekeretariya min ɲɛsinnen bɛ dɔ bɔli ma jisonko
faratiw la (PNRRC), o y’a jira ko jisonko kɛra siɲɛ 711 san 2024 kɔnɔ ka degun
lase denbaya 70.000 ɲɔgɔnna ma ka minɛn caman fana tiɲɛ. Mali-Metewo barakɛlaw
ka fɔ la, san 2025 in na, jisonko faratiw, kɛrɛnkɛrɛnnenya la siga b’o la
zuluyekalo, utikalo ani sɛtanburukalo in na, hali n’i y’a sɔrɔ jatew la, a
jirala ko ɲinan sanjiko tɛna kɛ i n’a fɔ salon ta cogoya, nka k’a bɛ sɔn ka
surunya a la.
IFABako kin na Sebeninkɔrɔ Bamakɔ komini 4nan na, sigidalamɔgɔw ma ɲinɛ
salon jisonko kɔ fɔlɔ. Yaye Jalo san 27, o y’a jira ko sanji y’olu ka dukɛnɛ fa
tewu kalo kelen kuntaala. A tiɲɛni bonyana kojugu. A k’u sera ka bɔ du kɔnɔ ni
fini damadɔw ani malo dɔɔnin ye. Madamu Dunbiya Jɛnɛba Dunbiya ka so b’o sira
kelen in kan. Ale ye dɔgɔtɔrɔba ye min bolo bɔlen don baara la k’a sababu kɛ si
kɔrɔbayali ye. A k’o mɔgɔkɔrɔbaya n’a ta bɛɛ, a hakili bɛ salon jikasaara la i
n’a fɔ a kɛra kunun i kɔrɔ.
A ko nin tun y’a siɲɛ fɔlɔ ye ji ka don olu kan nin cogo la ka u bolofɛn bɛɛ
tiɲɛ. Bolofɛnw tiɲɛni kɔfɛ, musokɔrɔba san 70 ni kɔ in y’a jira ko ale ka somɔgɔw
ye waati jan kɛ a siran an’a gɛlɛya kɔnɔ. Ji ma dan dukɛnɛ ni sow fali dama ma,
a nana ni sa juguw ye. A k’ale de bolila ka taa a ɲɛmadogo fo a denmuso bara
kin wɛrɛ la. Ɲinan, Madamu Dunbiya ko n’o ɲɔgɔnna kunbɔra, ale bɛ taa tuguni
fiyɛ.
BOLOMAGƐNNI WAATI NI WAATI- Lasina Tarawele ye site kɔlɔsibaa ye. Ale ɲɛ ye ko caman seereya. A ka fɔ la, ji donna du 13 ɲɔgɔnna kɔnɔ. O duden dɔw taara halibi u ma kɔsegin. Denmisɛn dɔ kɔni y’a fasa fili kosɛbɛ ka dɛmɛn don mɔgɔ caman na ji bolo. Nka Ala ye du dɔw fana tagan jikasaara ma, hali ni sanji sigilen mɛɛnna kosɛbɛ bɔlɔnw kɔnɔ k’u fɛtɛmɛnni gɛlɛya. O denmisɛn in ye kurun ta ka dɛmɛn don sigidalamɔgɔw la n’o ye, minnu tun dɛsɛlen bɛ ka bɔ u ka duw kɔnɔ ji fanga bolo. A tun b’u ta ka taa u bila yɔrɔ jan ji kɔfɛ, u ka taa u makow la, wa a tun bɛ segin n’u ye kurun na tuguni.
Denbaya dɔw ye du bila pewu ka taa u
yɛrɛ kundogo u balimaw bara walima so lankolonw kɔnɔ
Kurun ye taa ka segin caman min kɛ sigidalamɔgɔ degunnenw bolomagɛnni na, o
kunnafoni ye erezo sosiyow labɔ salon, ka jiko in kasaara yangan bonya kosɛbɛ,
ka fara mɔgɔw ka yɛrɛtaganfɛɛrɛ matarafalen tɔw kan. Misabugu Bamakɔ
komini 6nan na, jison ye sigidalamɔgɔ caman yɛrɛ degun salon.
Mɔgɔ wɛrɛ y’a jira ko ale yɛlɛmana kin wɛrɛ la a hakili la ko basigi bɛ sɔrɔ
yen. Wa k’o de kɛra lafiya ani hakilisigi y’a bolo. Fuseyini Tarawele fana y’o
kin mɔgɔ ye, o k’ale yɛrɛ ye dɛmɛn don mɔgɔ caman na. A ko a ɲuman ye ka dabali
jɔnjɔn tigɛ jibolisirabako la, min b’a to ni sanji nana, ji ka sin ka tɛmɛn ka
bɔ kinw kɔnɔ ka taa bajoliba la.
JISON KASAARA FARATI KA BON- Bakari Manganɛ ye lasɔmini biro ɲɛmɔgɔ ye
Mali-Metewo la. O ka fɔ la, jisonko farati de ka bon kosɛbɛ zuluyekalo, utikalo
ani sɛtanburukalo la. Sanjiw bɛ sɛbɛkɔrɔ caya o waatiw de la ka marayɔrɔ caman
labɔ ɲɔgɔn fɛ. A ko hali ni sanji ma kɛ caya fɛn ye ka san 2024 ta bɔ, farati
bɛ jisonko la Sikaso, Moti, Segu, Kulukɔrɔ, Kayi ani Bamakɔ faaba maraw kɔnɔ.
Jiko dɔnbaa ŋanaw ka fɔ la, samiyɛ kuntaala bɛ sɔn ka janya kosɛbɛ ka se fo
nowanburukalo ma, wa sanji sɔrɔta hakɛ bɛ se ka caya walima ka se a cogoya kɔrɔ
ma. O cogoya kelen na, Bakari Manganɛ y’a jia ko dabali dɔ tigɛlen don min bɛna
dɔ bɔ ji fanga la. Mali-Metewo b’o dabali in kunnafoni lase don o don ka kɛɲɛ
n’a cogoya ye. A k’u b’a dɔw ci sigidaw ɲɛmɔgɔw ni maraɲɛmɔgɔw ma telefɔni
cikanw fɛ ani faso jiko n’a sɛnɛko ɲɛmɔgɔso ma. Walasa k’an tagan jisonw
mantɔɔrɔ ma, a b’a ɲinin sigidalamɔgɔw fɛ u ka kɔdingɛw fɛgɛn ani ka bɔ
badingɛw kɔnɔ.
San 2024 jisonko kasaara kunbɛnni na, jamana ye cakɛda dɔ sigi senkan min bɛ
wele tubabukan daɲɛ surun na (Cecogec), o ye dabali dɔ tigɛ dɔ bɔcogo la jiko
kasaara degun na. O dɔ kɛra kasaaraw tɔpɔtɔli jɛkulu dɔ sigili ye senkan, jibolisiraw
labɔli ani jitɛmɛnsiraw labilali. Lasɔmini dabali farala o kan a bɛ fɔ min ma
tubabukan daɲɛ surun na (SAP). O tun bɛ kunnafoni jɛlenw di kow kan. Lasɔrɔsira
min ye SOS ye, o fana tun bɛ lasɔmini kunnafiniw di.
Dɔkala
Yusufu JARA
DANBƐLƐ Sigeta
Salimata
Dɔkala Yusufu Jara
Tasuma kasaara dɔ kɛra kunun ntɛnɛn nowanburukalo tile 10 san 2025 KAFO JIGINƐW dagayɔrɔ la ACI 2000 kɔnɔ Bamakɔ. Sapɛri-pɔnpiyew ka wuli ka jɔ joona ani baara kɛtaw mabɛnni kosɔn, kasaara in sera ka dalasa a tuma na mɔgɔ si kelen ni ma to a la. An ye kunnafoniw sɔrɔ Bamakɔ mara.
Ni kumaɲɔgɔnya dɔgɔyara furu kɔnɔ, a bɛ fiɲɛ bila kowkɛcogo ɲuman na furu ɲɔgɔnw cɛ. Sigi gɛlɛyali sababu dɔw bɛse ka kɛ, ɲɔgɔn faamubaliya, yaafabaliya, erezo sosiyowkɔlɔlɔ ani k’i furu ɲɔgɔn jate i n’a fɔ nkunankunan tɛ mɔgɔmin na.
Kunnafoni, numeriki sɔrɔ ni fanga ka baara yɛlɛma kura minisiri ye Mali ka kunnafoni ni lagamuni cakɛda (Amap) ka baara kɛtaw wulili kura ye o ɲɛmɔgɔya kɛ kunun ntɛnɛn ɔkutɔburukalo tile 27 san 2025 Bamakɔ lajɛkɛsoba Seyisebe (CICB) la..
A bɛ tile caman bɔ sa, Mali faaba Bamakɔ tajiko gɛlɛya fanga ka bon yen, o bɛ ka jama dɔgɔya siraw kan k’u tonnen ton tajitayɔrɔw la. Nka o degun n’a ta bɛɛ, mɔgɔw b’a la k’u kologɛlɛya, ka muɲun a ko kɔrɔ, k’a ɲinin ɲɔgɔn fɛ halibi u k’u fanga kɛ kelen ye.
Gɔfɛrɛnaman ye kalanw jɔ fɔlɔ k’a daminɛ ɔkutɔburukalo tile 7 san 2025 jamana fan bɛɛ fɛ ; kalanw wulili kura ye kalo in tile 10 ye..
Ɲɔgɔndɛmɛn ani dɛnkɛrɛ kɛlɛli kalo hukumu kɔnɔ ani musow ka hɛrɛ ɲɛtaa kama, muso, den ni denbaya ɲɛtaa minisiri Madamu Jara Jɛnɛba Sanɔgɔ taara a ɲɛ da Sabalibugu sugu kan sibiri tɛmɛnnen in Bamakɔ faaba komini 5nan na..
