Kamori Dunbiya (jεman na) ni Nizeriya kɔfεmɔgɔw filε ɲɔgɔn na
Mali y’a ka teriyantolantan fila minnu kε Marɔku, a y’a fila bεε sebaaya sɔrɔ. A kεlen kɔ ka Moritani gosi 2 ni 0 jumadon marisikalo tile 22, a y’a da Nizeriya fana kan ni 2 ni 0 ye tarata kalo tile 26 Marakεsi ntolantankεnε in na. Mali ni Nizeriya ka ntolantan in na, degelikaramɔgɔ Eriki Seku Sεli ye yεlεmani saba kε ka tεmεn a ni Moritani ta kan.
Jɔkɔlɔsilaw la, Jigi Jara y’a jɔyɔrɔ di Mamadu Samasa ma, ale ni jɔli Sεgεw kɔfε, u tun ye kabini marisikalo tile 26 ye san 2019, Sεnεgali ɲεkɔrɔ. Bubakari Kiki Kuyatε ni ntolantannaw ɲεmɔgɔ Hamari Tarawele donna kɔfε Abudulayi Jabi ni Falayi Sakɔ nɔ na. Modibo Saɲan tora cεmancε la, ka Jaajε Samaseku, Lasana Kulubali, Amadu Hayidara ani Kamori Dunbiya to cεmancε la. Ɛli Bilali Ture ni Lasinε Sinayɔkɔ tun bε ɲεfε.
I n’a fɔ Mali cogoya, Nizeriya fana tun ye sabaaya sɔrɔ Gana kan 2 ni 1 a ka ntolantan fɔlɔ la jumadon kalo tile 22. Sεgεw ka bi fɔlɔ donna Ɛli Bilali Ture fε sanga 18nan na, a kεlen ka balon porokolen dɔ sɔrɔ Nizeriya kɔfεmɔgɔ Sidozi Awaziyεmu bolo.
Sεgεw ka bi filanan donna Kamori Dunbiya fε sanga 87nan na. O y’a sɔrɔ ntolantan tɔ tε tεmεn sanga saba kan bilen. Nin bε bidonna fila ninnu kelenna ka bi donnen hakε dafa 7 la sεgεw fε ; nka Ɛli Bilali Ture ka balontan hakε Sεgεw fε, o ka ca ni Kamori ta ye (17 ni 16). A kɔni bε Lasinε Sinayɔkɔ ɲε bi hakε la. O ta ye bi 6 ye balontanko 18. Kalifa Kulubali ta ye bi 6 ye balontanko 28. Mamadu Samasa ta ye bi 7 ye balontanko 19. Abudulayi Jabi min tun ye Sεgεw ɲεmɔgɔ kɔrɔ ye, o ta ye bi 7 ye balontanko 25. Bakari Sakɔ ta ye bi 8 ye balontanko 20.
Ni nin sebaaya fila ye, Mali bε Gana kunbεnni labεn koɲuman, ka sɔrɔ k’a kunda Madagasikari kan o kɔfε zuwεnkalo kɔnɔ kupudimɔni 2026 tile 3nan ni 4nan ɲεbilantolantanw na. Eriki Seku sεli bε Sεgεw kunna kabini san 2022 mεkalo. A ye balontanko 20 kε n’u ye, ka 14 sebaaya sɔrɔ, filaninbin 4, gosiko 2. U ye bi 41 don, bi 12 donna u la.
Jεnεba BAGAYƆKƆ et
Dɔkala Yusufu Jara
Rencontre sur l'AES.
Rencontre Primature.
VBG.
Conseil des ministres.
Amélioration de la crise du carburant.
Arbitres.
