Afiriki musomanninw ka
KANI Marɔku san 2024 bonni kɛra
jumadon. A janjo bɛ daminɛ zuluyekalo tile 5 k’a kuncɛ a tile 26 san 2025. Jamana 12 minnu ye sebaaya sɔrɔ a ɲɛbila ntolantanw na, olu tilalen don ntolantankulu 3
ye, jamana 4 b’o kelenna kɔnɔ. Kulu A jamanaw ye Marɔku (jatigi), Zanbi, Sɛnɛgali ani RD Kongo ye. Kulu B jamanaw ye Nizeriya
(ale ye kupu in tako 11 kɛ), Tunizi, Alizeri ani Bɔsiwana ye.
Kulu C jamanaw ye Mali, Afirikidisidi (Afiriki ŋana),
Gana ani Tanzani ye. Bonni kuncɛlen, Mali
Sɛgɛ musomanw
degelikaramɔgɔ Mohamɛdi Salumu
n’a bɛ wele « Huseyi », a welela ka ɲininkaliw k’a la. A y’a jira k’an bɛ waati min na, ntolantantɔnw bɛ hakɛya kelen na ; nka, a k’a ɲuman ye cɛsiri de
ye kosɛbɛ walasa
ka se k’i kun bɔ ji la janjo in kɔnɔ. A ko an
ye jamanaw dɔn, an ni minnu bɛna
ɲɔgɔn sɔrɔ bawolo
sima kan ; wa kalo caman yɛrɛ b’an ni KANI in daminɛni cɛ, labɛnw sabatili kama. Mali sɛgɛ musow
degelikaramɔgɔ Mohamɛdi Salumu ko hali n’an ni Aifirikidisidi bɛ kulu kelen kɔnɔ, ko kupu tɛmɛnnen in b’ale bolo, an bɛna an fasa fili kosɛbɛ ka tɛmɛn san 2018 ta kan ; o min janjo kɛra Gana. Mali kɛra
jɔyɔrɔ 4nan ye yen.
Sɛgɛw
degelikaramɔgɔ ka fɔ la, u ye labɛnw daminɛ o bɛ dɔgɔkun damadɔ bɔ
sa ; wa ko tarata nata in yɛrɛ la, u bɛna taa Marɔku jamana saba ni ɲɔgɔn
cɛ janjo dɔ la : Marɔku, Mali ani Bɔsiwana. Mali
musobalontan ni Mali sennantolantan tɔnba
(Femafoot) tɔgɔlajɛkulu kɛrɛnkɛrɛnnen ɲɛmɔgɔ ye Mɛtiri Famakan Danbɛlɛ ye. Ale y’a jira ko
bonni in ma kɛ ko ye, min dadiyara Mali la fɔlɔ ; ka da a kan Tanzani ye
jamana ye, min ni Mali ka ɲɔgɔnkunbɛn tɛ ten kosɛbɛ ; wa o seli yɛrɛ man
ca nin janjow kɛnɛ kan. Nka, ko n’a ma
ɲɛ ko dulɔ donna, a
bɛ min sa de dɛ. A ɲuman kɔni ye Sɛgɛ musomanw
ka labɛn ɲuman kɛ ; sabula jamana
fila fɔlɔ minnu ka kuru hakɛ mana caya ni tɔw ta ye, ka fara jɔyɔrɔ sabanan ɲumanw
kan, olu saba de bɛ sebaaya sɔrɔ kulu kelenna na ka karidefinali balontanw kɛ.
Afiriki musomanninw ka
KANI bonni kɛra Afiriki sennantolantan tɔnba (Caf) ɲɛmɔgɔ Patirisi
Mɔtisepe ɲɛna ;
ale ye Afirikidisidi jamanaden ye. A y’a jira ko Musow ka KANI marɔku san 2024 bɛna kɛ janjo dumanba ye.
Dɔkala Yusufu JARA
Jɛnɛba
BAGAYƆGƆ
Dɔkala Yusufu Jara
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
Selen Marɔku sibiri su k’a dugu jɛ kari la, degelikaramɔgɔ Tɔmu Sɛnfiye n’a ka cɛdenw y’u ka farifoni balontanko fɔlɔ kɛ ntɛnɛn marisikalo tile 17 san 2025. Cidenkulu mɔgɔ tɔw ka kan ka se Ujuda bi tarata ni Ala sɔnna. Ujuda ye dugu ye, min bɛ Marɔku ni Alizeri dancɛ la.
